Bo A Haya E Religion Berdadero?

“E forma di adoracion cu ta limpi i sin contaminacion desde e punto di bista di nos Dios i Tata ta esaki.”​—⁠SANTIAGO 1:​27.

1, 2. (a) Segun e pensamento di hopi hende, kico ta determina si nan religion ta e religion berdadero? (b) Kico nos mester considera seriamente den nos huzgamento di religion?

NOS ta biba den un tempo ora hopi hende ta keda satisfecho dedicando un parti relativamente chikito di nan bida na religion. Nan por bai misa de bez en cuando, pero poco hende ta bai regularmente. Casi ningun hende ta kere cu tur otro religion ta malu i cu nan religion so ta bon. Nan por simplemente kere cu nan religion ta bon pa nan.

² Den bista di esei, e pregunta, Bo a haya e religion berdadero? simplemente kier men, Bo a haya un religion cu bo ta gusta? Kico ta determina loke bo ta gusta? Bo famía? Bo socionan? Bo mes sintimento? Ki seriamente bo a considera e punto di bista di Dios dje asunto?

Con nos por conoce e punto di bista di Dios?

3. (a) Pa nos conoce e punto di bista di Dios, kico mester ta disponibel pa nos? (b) Cua pregunta nos mester haci en cuanto pakico nos personalmente ta kere cu e Bijbel ta bini di Dios?

³ Pa nos sa loke Dios mes ta pensa, anto mester tin un revelacion di dje. E Bijbel ta e buki di mas antigua cu ta afirma di ser inspirá di Dios. (2 Timoteo 3:​16, 17) Pero, ta posibel pa bisa berdaderamente cu e Bijbel, na contraste cu tur otro buki, ta contene e mensahe di Dios pa tur humanidad? Con bo ta contesta e pregunta, i pakico? Pa motibo cu bo mayornan a kere esei? Pa motibo dje actitud di bo socionan? Bo mes a examina e prueba? Pakico no haci esei awor, usando e sigiente cuater clase di prueba?

4. En cuanto disponibilidad, kico ta indica cu e Bijbel, en bez di un otro buki, ta di Dios?

⁴ Ser disponibel: Un mensahe cu berdaderamente ta bini di Dios i cu ta pa henter e famía humano mester ta disponibel pa nan. Esei ta cierto di e Bijbel? Tuma lo sigiente na cuenta: E Bijbel, henter of algun parti di dje, ta ser publicá awor den mas cu 2.000 idioma. Segun e Sociedad Bíblica Americana, casi diez aña pasá, idioma den locual e Bijbel ta publicá ta hacié disponibel pa mas cu 98 porciento di poblacion di mundo. Segun cu e Guinness Book of World Records ta bisa, e Bijbel inequibocadamente ta “e buki mas plamá di mundo.” Esei ta loke nos por spera di un mensahe di Dios cu supuestamente ta pa tur raza i nacion i grupo di idioma. (Compara cu Revelacion 14:⁠6.) No ta existi otro buki den mundo cu tin un record sikiera comparable cu esei.

5. Pakico e fundeshi histórico dje Bijbel ta significante?

⁵ Autenticidad histórico: Un examinacion cuidadoso di relato bíblico ta revela un otro manera cu e Bijbel ta distinto di otro buki cu ta afirma di ser santo. E Bijbel ta contene echo histórico, i no leyenda sin prueba. Irwin Linton, cu tabata un abogado cu tabatin e costumber di analiza loke ta ser exigí como prueba den corte di ley, a skirbi: “Aunque romance, leyenda i testimonio falso ta percura cu cuidao pa pone suceso relacioná cu e caso den un lugar leu i na un tempo indefinitivo, . . . relato bíblico ta dúnanos fecha i lugar dje cosnan relatá cu sumo precision.” (Por ehempel, mira 1 Rey 14:25; Isaías 36:1; Lucas 3:​1, 2.) Pa hende cu ta acudi na religion pa síñanan e berdad i no pa scapa for dje realidad, esei ta un consideracion importante.

6. (a) Con e Bijbel realmente ta yuda hende cu problema di bida? (b) Menciona tres manera cu e Bijbel ta yuda hende enfrenta realidad severo.

⁶ Practicalidad: Hende cu ta examina e Bijbel seriamente ta realiza pronto cu mandamento i principio di dje no tin como nan propósito e explotacion inhusto di hende. Mas bien, tal mandamento i principio ta siña un moda di biba cu ta resulta den beneficio pa hende cu ta síginan cuidadosamente. (Isaías 48:​17, 18) E consuelo cu e Bijbel ta ofrece hende den afliccion no ta insincero, fundá riba filosofía bano. Mas bien, e Bijbel ta yuda hende enfrenta e realidad severo di bida. Di ki manera? Di tres manera: (1) cu dunamento di conseho sano en cuanto con pa trata cu dificultad, (2) cu splicacion dje manera pa recibi e apoyo amoroso cu Dios ta duna sirbidor di dje awor, i (3) dunando un revelacion dje futuro maraviyoso cu Dios tin wardá pa hende cu ta sirbié, dunando nan motibo sólido pa pone confianza den su promesa.

7. (a) Usando texto citá den e nota, splica e solucion bíblico pa un cuestion principal cu ta toca hende djawe. (b) Mustra con conseho bíblico ta protehános of ta yúdanos enfrenta un situacion yen di tension.

⁷ Aunque conseho bíblico hopi bez no ta popular cu hende cu ta rechaza autoridad i ta hiba un bida di complacencia, hopi hende a yega di realiza cu un bida asina no ta dúnanan berdadero felicidad. (Galatio 6:​7, 8) E Bijbel ta duna contesta francu pa pregunta tocante aborto, divorcio, i homosexualidad. Su conseho ta un proteccion contra droga i abuso di alcohol i contra contagio di AIDS (SIDA) via sanger contaminá of inmoralidad sexual. E ta mústranos con pa tene un famía feliz. E ta duna contesta cu ta haci posibel pa hende enfrenta situacion di mas dificultoso di bida, incluyendo rechazamento di parti di miembro íntimo di famía, enfermedad catastrófico, i e morto di hende stimá. E Bijbel ta yúdanos distingi prioridad di manera cu nos bida ta yená cu nificacion en bez di duele.a

8, 9. (a) Cua profecía ta impresionábo personalmente dunando prueba di inspiracion dje Bijbel? (b) Profecía den e Bijbel ta duna prueba di kico en cuanto nan origen?

⁸ Profecía: E Bijbel ta único como un buki di profecía, un buki cu ta bisa loke lo sosode den e futuro i ta profetiza e futuro en detaye. El a profetiza e destruccion di Tiro di antigua, e caimento di Babilonia, e reedificacion di Jerusalem, i subimento i caimento di rey di Medo-Persia i Grecia, i hopi suceso den e bida di Jesucristo. També el a profetiza en detaye di estado di mundo cu a desaroya den e siglo aki, i ta splica su nificacion. E ta mustra con problema cu ta vence gobernante humano lo ser resolví, i ta identifica e Gobernante cu lo trece paz permanente i berdadero siguridad pa humanidad.b​—⁠Isaías 9:​6, 7; 11:​1-5, 9; 53:​4-6.

⁹ Significantemente, e Bijbel ta mencioná e capacidad di profetiza e futuro cu exactitud pa duna prueba di divinidad. (Isaías 41:1–46:13) E Persona cu por haci esei of cu por inspira otronan pa hacié no ta simplemente un imagen sin bida. E no ta simplemente un hende deboto. E ta e Dios berdadero, i e buki cu ta contene tal profecía ta su Palabra.​—⁠1 Tesalonicense 2:⁠13.

Tur religion cu ta usa e Bijbel ta siña e religion berdadero?

10, 11. Segun cu Jesús a mustra, aunque pastor por usa e Bijbel, kico por haci sin balor e religion cu e ta representa?

¹⁰ Ta razonabel​—⁠mas importante, ta bíblico​—⁠pa conclui, anto, cu tur grupo religioso cu ta bisa cu nan ta usa e Bijbel ta siña e religion berdadero? Tur hende cu tin e Bijbel of ta cita e Bijbel ta practica e religion berdadero?

¹¹ Hopi clero, aunque nan tin e Bijbel, ta usa religion como un medio pa glorifica nan mes. Nan ta debilita e berdad puro cu tradicion i filosofía humano. Nan adoracion ta aceptabel pa Dios? Jesucristo a aplica aptamente e declaracion di Dios mediante profeta Isaías na guía religioso di Jerusalem dje promé siglo cu tabata haci precisamente esei, ora el a bisa: “E pueblo aki ta onrámi cu nan lip, pero nan curazón ta kitá leu foi mi. Ta en bano cu nan ta sigi adorámi, pasobra nan ta siña mandamento di hende como doctrina.” (Mateo 15:​8, 9; 23:​5-10) Claramente, religion dje clase ei no ta e religion berdadero.

12, 13. (a) Con e conducta di miembro di un religion por yuda hende determina si nan religion ta e religion berdadero? (b) Con Dios lo considera nos adoracion si nos ta scoge como nos socio hende cu e ta rechaza? (2 Crónica 19:⁠2)

¹² Con ta para si e fruta cu e siñanza di cierto religion ta produci ta putrí, locual ta manifestá den e bida di hende cu ta bon miembro di nan religion? Den su Sermón di Monte, Jesús a adverti: “Warda boso di profeta falso . . . Na nan fruta boso ta reconocénan. . . . Tur bon palu ta produci fruta excelente, pero tur palu putrí ta produci fruta sin balor.” (Mateo 7:​15-17) Ta cierto cu hende individual por haci malu i tin mester di correccion. Pero e situacion ta otro ora miembro di un religion, asta e clero, ta practica fornicacion i adulterio, gera, burachería, golosidad, gañamento, spiritismo, i e adoracion di imagen​—⁠practicando uno, of tur e cosnan ei​—⁠sin embargo, nan no ta recibi ningun disiplina, i hende cu ta sigi den tal camina ni sikiera ta wordu expulsá for dje congregacion. E Bijbel ta bisa claramente cu hende cu ta practica tal cosnan mester ta expulsá for dje congregacion; nan lo no haya lugar den e Reino di Dios. (Galatio 5:​19-21) Nan adoracion no ta agradabel pa Dios, ni nos adoracion lo no agrada Dios si nos ta decidi di asociá cu hende cu e ta rechaza.​—⁠1 Corintio 5:​11-13; 6:​9, 10; Revelacion 21:⁠8.

¹³ Ta keda bisto cu tur grupo cu ta bisa cu nan ta usa e Bijbel no ta practica e religion berdadero cu e Bijbel ta detayá. Kico, anto, e Bijbel ta declara como marca di identificacion dje religion berdadero?

Marca di identificacion dje religion berdadero

14. (a) Tur siñanza di e religion berdadero ta fundá riba kico? (b) Con e siñanza di cristiandad tocante Dios i e alma ta wanta tal prueba?

¹⁴ Su siñanza ta fundá firmemente riba e Scritura inspirá. “Tur Scritura ta inspirá di Dios i ta probechoso pa siñamento, pa reprendimento, pa rectificacion di cosnan.” (2 Timoteo 3:16) Pero, unda e Bijbel Santo ta menciona e trinidad di cristiandad? I unda e Bijbel ta siña, manera e clero ta haci, cu hende ta muri pero tin un alma cu ta spiritu cu no ta muri nunca? Bo nunca a pidi pastor mustrábo tal siñanza den bo mes Bijbel? The New Encyclopædia Britannica ta bisa: “Ni e palabra trinidad ni e doctrina claro di dje ta presenta den e Testament Nobo.” (1992, Micropædia, Volumen 11, bladji 928) I e New Catholic Encyclopedia ta admiti: “Den Pader Apostólico, no tabatin nada cu sikiera a parce remotamente tal mentalidad of perspectiva.” (1967, Volumen XIV, bladji 299) En cuanto e concepto di cristiandad di alma cu ta sali for di curpa ora e ta muri, escolástico religioso ta admiti cu nan a fia e idea for di filosofía griego. Sin embargo, e religion berdadero no ta rechaza berdad bíblico pa acepta filosofía humano.​—⁠Génesis 2:7; Deuteronomio 6:4; Ezekiel 18:4; Juan 14:⁠28.

15. (a) Con e Bijbel ta identifica e solo Persona cu mester ta adorá? (b) Con adorador berdadero ta síntinan tocante halamento cerca Jehova?

¹⁵ E religion berdadero ta boga pe adoracion dje solo i único Dios berdadero, Jehova. (Deuteronomio 4:35; Juan 17:⁠3) Citando Deuteronomio 5:​9 i 6:13, Jesucristo a declara firmemente: “Ta Jehova bo Dios bo mester adora, i na ne so bo mester rindi sirbishi sagrado.” (Mateo 4:10) Consistente cu esei, Jesús a duna di conoce e nomber di su Tata na su disípelnan. (Juan 17:26) Bo religion ta siñábo adora Jehova Dios? Bo a yega di conoce e Persona cu e nomber ei ta identifica​—⁠su propósito, su actividad, su calidadnan​—⁠di manera cu bo ta kere cu bo por hala cerca dje íntimamente cu confianza? Si bo religion ta e religion berdadero, anto bo por contestá cu sí.​—⁠Lucas 10:22; 1 Juan 5:⁠14.

16. Kico fe den Cristo ta nifica pa hende cu ta practica e religion berdadero?

¹⁶ Un parti importante di e adoracion cu ta agrada Dios ta fe den su Yiu, Jesucristo. (Juan 3:36; Echo 4:12) Esei no kier men simplemente kere cu el a existi of cu e tabata un persona sobresaliente. Esei ta inclui aprecio di loke e Bijbel ta siña tocante e balor dje sacrificio dje bida humano perfecto di Jesús i reconocimento di su puesto awe como Rey celestial. (Salmo 2:​6-8; Juan 3:16; Revelacion 12:10) Si bo ta asocia cu hende cu ta practica e religion berdadero, bo sa cu den nan bida diario nan ta haci esfuerzo conciencial pa obedece Jesús, pa imita su ehempel, i pa participa personal i celosamente den e trabao cu el a asigná na disípel di dje. (Mateo 28:​19, 20; Juan 15:14; 1 Pedro 2:21) Si esei no ta cierto di hende cu locual bo ta adora, bo tin cu busca na otro parti.

17. Pakico adorador berdadero ta percura cuidadosamente pa keda sin mancha di mundo, i kico esei ta inclui?

¹⁷ E adoracion berdadero ta sin mancha di inbolucramento den conflicto político i mundano. (Santiago 1:27) Pakico? Pasobra Jesús a bisa tocante sigidor di dje: “Nan no ta parti di mundo, mescos cu mi no ta parti di mundo.” (Juan 17:16) Jesús no a meté den político, i el a prohibi sigidor di dje di usa arma carnal. (Mateo 26:52) Hende cu ta tuma na pecho loke e Palabra di Dios ta bisa ‘no ta siña gera mas.’ (Isaías 2:​2-4) Si cualkier religion cu locual bo tin sikiera un afiliacion nominal cuné no ta cuadra cu tal cuadro, ta ora pa bo descontinuá bo asociacion cuné.​—⁠Santiago 4:4; Revelacion 18:​4, 5.

18. (a) Kico Juan 13:35 ta identifica como un característica sobresaliente dje religion berdadero? (b) Con bo por yuda hende determina cua grupo realmente ta cuadra cu Juan 13:35?

¹⁸ E religion berdadero ta siña i ta practica amor sin egoísmo. (Juan 13:35; 1 Juan 3:​10-12) Tal amor no ta ser mencioná den sermón so. E realmente ta uni hunto den berdadero hermandad hende di tur raza, tur grupo económico, tur idioma, i tur nacion. (Revelacion 7:​9, 10) E ta aleha cristian berdadero for dje mundo rond di nan. Si bo no a asisti caba, asisti na reunion den Salón di Reino di Testigo di Jehova, i també na nan asamblea grandi. Wak nan ora nan ta traha hunto den construccion di un Salón di Reino. Tuma nota di nan palabra i nan accion en cuanto hende di edad (incluyendo biuda) i també hovenan (incluyendo esnan cu tin un mayor so of ningun mes). (Santiago 1:27) Compara loke bo ta mira cu loke bo a mira den cualkier otro religion. Anto puntra bo mes, ‘Ken ta practica e religion berdadero?’

19. (a) E religion berdadero ta presenta cua solucion pa problema di humanidad? (b) Kico miembro dje grupo cu ta sigi e religion berdadero mester haci?

¹⁹ E religion berdadero ta boga pe Reino di Dios como e solucion permanente pa problema di humanidad. (Daniel 2:44; 7:​13, 14; 2 Pedro 3:13; Revelacion 21:​4, 5) Cualkier religion di cristiandad ta haci esei? Na ki tempo bo a tende un pastor splica e Reino di Dios i loke e Scritura ta mustra tocante su logramento? E organizacion di locual bo ta miembro ta animábo pa papia cu otro hende tocante e Reino di Dios, i si e ta hacié, tur miembro di dje ta participa den e hacimento di dje? Jesús a duna testimonio asina; disípel di dje di promé a haci mescos. Abo també por tin e privilegio di participacion den tal actividad. Esei ta e trabao di mas importante cu ta ser hací den tur e mundo djawe.​—⁠Mateo 24:⁠14.

²⁰ Aunque tin miles di religion, e Bijbel ta yúdanos rápidamente elimina confusion afin di identifica e religion berdadero. Pero, nos tin cu haci mas cu identifiqué. Ta vital pa nos practiqué. Loke esei ta encerra lo ser considerá en mas detaye den e sigiente artículo.

[Footnotes]

Con bo ta contestá?

◻ Den e identificacion dje religion berdadero, e punto di bista di ken ta mas importante?

◻ Cua cuater clase di prueba ta indica e Bijbel como e Palabra di Dios?

◻ Pakico tur religion cu ta usa e Bijbel no ta aceptabel pa Dios?

◻ Menciona seis marca di identificacion di e solo religion berdadero.

20. Además di identifica e religion berdadero, kico nos tin cu haci?

[Box on page 10]

Testigo di Jehova . . .

◆ Ta funda tur nan siñanza riba e Bijbel.

◆ Ta adora e solo Dios berdadero, Jehova.

◆ Ta biba na armonía cu nan fe den Jesucristo.

◆ No ta enbolbí ni den político ni den conflicto di mundo.

◆ Ta purba di manifesta amor sin egoísmo den nan bida diario.

◆ Ta boga pe Reino di Dios como e solucion permanente pa problema di humanidad.

[Caption on page 9]

E BIJBEL​—kico ta indica cu e ta contene e mensahe di Dios pa tur humanidad?