Tur Religion Ta Agrada Dios? — BIBLIOTEKA ONLINE Watchtower

Tur Religion Ta Agrada Dios?

Bo ta kere cu tur religion ta agradá Dios? Probablemente cualkier forma di adoracion cu bo conocé ta animá bon conducta, por lo ménos te na un cierto grado. Pero esei ta suficiente pa agradá Dios?

ALGUN hende ta bisa, ‘Djis sea sincero den bo adoracion, i lo bo agradá Dios. Tin algu bon den tur religion.’ Por ehempel, e religion bahai a bai asina leu cu e punto di bista aki cu el a adoptá e nuebe religionnan principal di mundu den su creencianan. E grupo religioso aki ta kere cu tur e religionnan aki tin un orígen divino i ta facetanan di un solo berdad. Con esaki por ta e caso?

Ademas, bo tin motibu pa puntra bo mes con un religion por agradá Dios si e ta manda su miembronan pone gas cu ta afectá nervio di hende den lugánan público, cu e posibilidad di mata hopi hende. E acusacion ei a ser presentá contra un grupo religioso na Hapon. Of Dios ta contentu cu un religion cu ta manda su miembronan cometé suicidio? Algun aña pasá, esei ta loke a sosodé cu siguidornan dje lider religioso Jim Jones.

Mirando bek mas aleu den pasado, nos por wel puntra, Religionnan por agradá Dios si nan ta promové guera, manera den e caso dje Guera di Trinta Aña, cu a ser bringá for di 1618 pa 1648? Segun The Universal History of the World (E Historia Universal di Mundu), e conflicto religioso ei entre católiconan i protestantnan tabata “un dje gueranan di mas teribel di historia europeo.”

E Crusadanan religioso for di siglo 11 pa 13 tambe a resultá den teribel dramamentu di sanger. Den e promé Crusada, por ehempel, e asina yamá cristiannan cu a tuma parti den e Crusada a mata brutalmente e residentenan moslim i hudiu di Jerusalem.

Considerá, tambe, loke a sosodé durante e Inkisicion, cu a cuminsá den siglo 13 i a dura rond di 600 aña. Miles di hende a ser torturá i matá dor di a ser kimá bibu riba ordu di lidernan religioso. Den su buki Vicars of Christ—The Dark Side of the Papacy (Vicarionan di Cristo—E Aspectonan Desagradabel di Papado), Peter De Rosa ta declará: “Den e nomber di papa, [e inkisidornan] tabata responsabel p’e atake di mas feros i prolongá riba decencia humano den e historia dje rasa [humano].” Relacioná cu e inkisidor dominicano Torquemada di Spaña, De Rosa ta bisa: “Nombrá na 1483, el a goberná den un forma tiránico pa diescincu aña. Su víctimanan a pasa 114.000 di cua 10.220 a ser kimá.”

Naturalmente, e religionnan di cristiandad no ta e úniconan cu ta culpabel di sanger. Den su obra Pensées (Pensamentunan), e filósofo frances Blaise Pascal a remarcá: “Hende nunca ta haci maldad asina completamente i alegremente manera ora nan ta haci esei motivá pa un conviccion religioso.”

Reconocé na Nan Frutanan

For dje punto di bista di Dios, no ta un solo factor ta determiná si e ta aceptá un religion. Pa un religion ser aceptabel p’e, su siñansanan i actividadnan mester ta na armonia cu su Palabra skirbí dje berdad, e Bijbel. (Salmo 119:160; Juan 17:17) E fruta dje adoracion cu Dios ta aprobá mester ta na armonia cu e normanan di Jehova Dios.

Den su Sermon Riba Ceru, Jesucristo a indicá cu lo tin profetanan cu ta pretendé falsamente di ta representá Dios. Jesus a bisa: “Vigilá contra e profetanan falsu cu ta bini cerca boso den bistí di carné, pero cu di paden nan ta lobonan golos. Na nan frutanan boso lo reconocé nan. Hende nunca ta piki druif for di mata di sumpiña ni figu for di bringamosa, no ta berdad? Di igual manera tur bon palu ta producí fruta excelente, pero tur palu putrí ta producí fruta sin balor; un bon palu no por producí fruta sin balor, ni un palu putrí no por producí fruta excelente. Tur palu cu no ta producí fruta excelente ta ser cortá i tirá den candela. Realmente, anto, na nan frutanan boso lo reconocé e hombernan ei.” (Mateo 7:15-20) E palabranan aki ta mustra cu nos mester ta spiritualmente alerto. Nos por pensa cu un lider of grupo religioso ta aceptabel pa Dios i pa Cristo, pero nos por ta ekibocá.

Un Necesidad pa Cautela

Aunke un religion ta pretendé di tin e aprobacion di Dios i su ministernan ta lesa pasashinan for di Bijbel, esei no kier men cu e ta un forma di adoracion cu ta agradá Dios. Su lidernan por asta haci cosnan impresionante cu ta haci parce como si fuera Dios ta obrando mediante nan. No obstante, e religion por ta falsu tog dor cu e no ta producí fruta cu Dios ta aceptá. E sacerdotenan egipcio practicante di magia den tempu di Moises tabata capas pa haci cosnan impresionante, pero nan siguramente no tabatin e aprobacion di Dios.—Exodo 7:8-22.

Awe, mescos cu den pasado, hopi religion ta promové ideanan i filosofianan humano en bes di pega na loke Dios ta declará como e berdad. Specialmente apropiado, anto, ta e spiertamentu bíblico: “Tene cuidou: tal bes por tin un hende cu lo hiba boso como su víctima mediante e filosofia i engaño bano segun e tradicion di hende, segun e cosnan elemental dje mundu i no segun Cristo.”—Colosensenan 2:8.

Despues di a papia tocante bon i mal fruta, Jesus a bisa: “No ta tur hende cu ta bisá mi, ‘Señor, Señor,’ lo drenta den e reino di shelu, sino esun cu ta haci e boluntad di mi Tata cu ta den shelu. Hopi lo bisá mi den e dia ei, ‘Señor, Señor, nos no a profetisá den bo nomber, i a expulsá demoñonan den bo nomber, i a efectuá hopi obra poderoso den bo nomber?’ I sin embargo, e ora ei lo mi confesá na nan: Nunca mi a conocé boso! Bai for di mi, boso, hacidornan di maldad.”—Mateo 7:21-23.

Examiná e Fruta

Claramente, anto, ta esencial pa wak e fruta di un religion promé cu concluí cu e ta aceptabel pa Dios. Por ehempel, e religion ta enbolbí den política? Anto tuma nota dje palabranan aki, registrá na Santiago 4:4: “Ken . . . cu kier ta amigu di mundu ta haci su mes enemigu di Dios.” Ademas, Jesus a bisa di su berdadero siguidornan: “Nan no ta parti dje mundu, mescos cu ami no ta parti dje mundu.” (Juan 17:16) E religion cu ta bon den bista di Dios no ta enbolbí den política dje mundu aki, cu “ta drumí den poder dje malbado,” e criatura spiritual invisibel, Satanas e Diabel. (1 Juan 5:19) Mas bien, e religion cu Dios ta aprobá ta boga lealmente pa su Reino bou di Jesucristo i ta declará e bon nobo relacioná cu e gobiernu celestial ei.—Marco 13:10.

Un religion ta aceptabel pa Dios si e ta boga pa desobedencia civil? E contesta ta obvio si nos tuma e conseho di apostel Pablo na cuenta: “Sigui recordá nan pa ta sumiso i obediente na gobiernu i autoridad como gobernante, pa ta cla pa tur bon obra.” (Tito 3:1) Naturalmente, Jesus a mustra cu su siguidornan mester a “paga bek e cosnan di César na César, pero e cosnan di Dios na Dios.”—Marco 12:17.

Suponé un religion ta animá participacion den e gueranan dje nacionnan. Promé Pedro 3:11 ta urgi nos pa “haci loke ta bon” i pa “busca pas i sigui tras di dje.” Con un religion por agradá Dios si su miembronan ta dispuesto pa mata nan co-adoradornan di un otro pais den guera? Miembronan dje religion cu tin e aprobacion di Dios ta reflehá Su cualidad principal—amor. I Jesus a bisa: “Den esaki tur lo sa cu boso ta mi disipelnan, si boso tin amor entre boso.” (Juan 13:35) E amor ei no tin nada en comun cu e odio violento cu ta ser fomentá den e gueranan dje nacionnan.

E religion berdadero ta cambia hende cu gusta guera den stimadornan di pas. Esaki a ser profetisá cu e palabranan aki: “Nan lo tin cu bati nan spada na ploeg i nan lansa na sker di corta mata. Nacion lo no hisa spada contra nacion, ni nan lo no siña mas di guera.” (Isaías 2:4) En bes di arohá palabranan di odio, esnan cu ta practicá adoracion berdadero ta cumpli cu e mandamentu: “Bo mester stima bo próhimo mescos cu bo mes.”—Mateo 22:39.

Esnan cu ta practicá e religion berdadero ta haci lo posibel pa biba segun e normanan haltu di Jehova Dios, nengando di adoptá un estilo di bida inmoral. E Palabra di Dios ta declará: “Kico! Boso no sa cu hende inhustu lo no heredá e reino di Dios? No sea gañá. Ni fornicador, ni idólatra, ni adúltero, ni homber wardá pa propósitonan innatural, ni homber cu ta drumi cu homber, ni ladron, ni haragan, ni buraché, ni zundrador, ni estafador lo heredá e reino di Dios. I tog esei ta loke algun di boso tabata. Pero boso a ser labá limpi, pero boso a ser santificá, pero boso a ser declará hustu den e nomber di nos Señor Jesucristo i cu e spiritu di nos Dios.”—1 Corintionan 6:9-11.

Un Tempu pa Accion Decisivo

Ta esencial pa dicerní e diferencia entre adoracion falsu i religion berdadero. Den e buki bíblico di Revelacion, e imperio mundial di religion falsu ta ser identificá como “Babilonia e Grandi,” un muher di mala bida simbólico “cu ken e reynan dje tera a cometé fornicacion.” E ta culpabel di sanger i e tin den su man un copa di oro “yen di cosnan repugnante i e cosnan impuru di su fornicacion.” (Revelacion 17:1-6) Nada di dje Dios ta haña aceptabel.

Esaki ta un tempu pa accion decisivo. Pa hende sincero cu ainda ta den Babilonia e Grandi, nos Creador amoroso ta haci e yamamentu aki: “Sali for di dje, mi pueblo, si boso no kier participá cuné den su picánan, i si boso no kier ricibí parti di su plaganan.”—Revelacion 18:4.

Si bo ta deseá di practicá e religion cu ta agradá Dios, pakico no conocé Testigonan di Jehova mas mihó? E cuadro acompañante ta duna un lista di algun di nan creencianan, huntu cu e motibunan bíblico pa esakinan. Comprobá cu bo Bijbel pa mira si e creencianan dje Testigonan ta na armonia cu e Palabra di Dios. Investigá pa haña sa si nan religion ta producí e clase di fruta cu lo bo spera di adoracion berdadero. Si bo haña cu esei ta e caso, lo bo a descubrí e religion cu ta agradá Dios.

[Kuadro na página 5]

LOKE TESTIGONAN DI JEHOVA TA KERE

CREENCIA BASE BIBLICO

E nomber di Dios ta Jehova Exodo 6:3; Salmo 83:18

Bijbel ta e Palabra di Dios Juan 17:17; 2 Timoteo 3:16, 17

Jesucristo ta e Yu di Dios Mateo 3:16, 17; Juan 14:28

Humanidad no a evolucioná Génesis 1:27; 2:7

sino a ser creá

Morto humano ta debí na Romanonan 5:12

picá dje promé homber

E alma ta stop di existí Eclesiástes 9:5, 10; Ezekiel 18:4

na morto