Hañando e Solucion Ideal

E PALABRA di Dios, e Bijbel, ta mencioná e tempu ora e gobiernu celestial di Dios lo resolvé tur problema di humanidad, locual awor ta incluí e problema di contaminacion causá dor di auto. E Reino Mesiánico aki, cu hopi hende a wordu siñá pa pidi den oracion, por percurá e solucion ideal, produciendo un auto completamente liber di contaminacion? Of nan por yega n’e solucion ideal eliminando for dje planeta tur vehículo di motor? Siendo cu Bijbel no ta duna nos un contesta definitivo, tur loke nos por haci ta di solamente spera i mira.—Mateo 6:9, 10.

Pero, nos por ta sigur di esaki: E gobiernu di Dios lo no permití contaminacion daña e bunitesa di creacion den e Paradijs restorá cu e Reino lo efectuá.—Isaías 35:1, 2, 7; 65:17-25.

Siendo cu esnan cu ta pega n’e Palabra di Dios ta ser entrená caba pa bida den un mundu nobo liber di contaminacion, con nan mester sinti nan tocante e uso di auto awe? E ¡Despertad! di 22 di juni di 1987 a trata cu e asuntu di “Kico Ta Sosodiendo cu Nos Selvanan?” El a informá di cu algun científico ta kere cu tin un relacion entre contaminante den gas di auto i selva muribundo. Esaki a haci un lector preocupá skirbi e Sociedad Watchtower pa puntra si den bista di tal echo ta corecto pa cristiannan core auto. El a puntra si corementu di auto ta demostrá un falta di respet p’e creacion di Jehova.

Un parti dje contesta pa su pregunta ta lo siguiente: “Testigonan di Jehova ta obedecé fielmente reglamentu tocante e medio ambiente cu autoridad civil ta pone na vigor pa reducí contaminacion. (Romanonan 13:1, 7; Tito 3:1) E tumamentu di medida mas ayá di loke e gobiernu ta exigí ta pa hende individual dicidí. Si un persona ta dicidí di no core auto mas, esei ta su mes asuntu personal. Sin embargo, e artículo di ¡Despertad! a mustra con algun hende ta sinti nan, bisando na blachi 8: ‘Hopi hende ta dal paso práctico pa reducí contaminacion di aire te n’e grado razonablemente posibel. Nan ta core mas lento, ta biaha ménos, ta bai cu grupo den un auto, ta usa gasolin sin lood, i ta obedecé reglamentu contra contaminacion cu e gobiernu ta decretá.’”

Ekilibrio Cristian

E contesta aki a manifestá ekilibrio cristian. Nos tin cu corda cu no ta auto so ta contaminá. Avion i trein—realmente, casi tur moda moderno di transportacion—ta contaminá. Pero, tal moda di transportacion no a ser desaroyá cu intencion expres di contaminá. E contaminacion resultante ta un efecto secundario, lamentabel pero debí na conocimentu limitá i actitud imperfecto.

La Atalaya di 1 di januari di 1993, blachi 31, a considerá e asuntu aki, bisando: “Como Testigonan di Jehova, nos ta profundamente preocupá en cuanto hopi problema ecológico cu awor ta afectá nos habitacion terenal. Mas cu mayoria hende, nos ta comprendé cu Dios a crea e tera pa ser un habitacion puru i saludabel p’e famia humano perfecto. (Génesis 1:31; 2:15-17; Isaías 45:18) . . . Pues, ta apropiado pa haci esfuerso balansá i razonabel pa evitá di aumentá innecesariamente e daño continuo cu hende ta haci na nos planeta. Pero, tuma nota dje palabra ‘razonabel.’ . . . E pueblo di Dios no mag pasa por haltu di asuntu ecológico. Jehova Dios a exigí pa su pueblo di antigua dal paso pa disponé di afval, paso cu tabata importante pa ecologia i limpiesa. (Deuteronomio 23:9-14) I siendo cu nos ta conocé su punto di bista di hende cu ta ruiná e tera, nos siguramente no mag pasa por haltu di loke nos por haci pa mantené limpi e medio ambiente. . . . Pero, e grado cu un cristian ta bai den tal direccion ta un asuntu personal aménos cu e ley ta exigí esei. . . . Hende imperfecto ta cai fácilmente den trampa di ser extremista. . . . Esfuerso humano pa eliminá problema ecológico principal for dje tera, incluyendo contaminacion, lo no tin éxito completo. Por tin algun progreso p’aki i p’aya, pero ta necesario pa Dios entremeté pa efectuá e único solucion duradero. P’esei nos ta concentrá nos esfuerso i recurso riba e solucion divino, en bes di purba di aliviá síntomanan superficial.”

Hende cristian ta keda balansá miéntras cu nan ta observá principio bíblico, teniendo presente e comision divino cu nan a ricibí di predicá e mensahe dje Reino di Dios den tur e mundu. (Mateo 24:14) Nada ta mas importante ni no tin mayor urgencia! Si e moda moderno di transportacion i comunicacion por yuda hende cristian cumpli cu e obligacion aki, nan tin tur motibu pa usa esei. Alabes, nan ta evitá contaminacion indebidamente of sin motibu. Asina nan ta mantené un bon concenshi dilanti hende i Dios.

Pues, aunke nos djawe no sa realmente con e problema di contaminacion i auto lo ser solucioná finalmente, nos sí sa cu lo e ser solucioná. Realmente, e solucion ideal ta mashá cerca.

[Kuadro na página 9]

Combatiendo Contaminacion

• Bai na pia of cu baiskel ora ta posibel

• Bai cu grupo den un auto

• ‘Service’ vehículonan di motor cu regularidad

• Corda pa usa combustibel cu ta causa ménos contaminacion

• Evitá biahamentu innecesario

• Core na un velocidad moderá pero constante

• Usa transportacion público ora ta posibel i razonabel

• Paga e motor en bes di laga e motor sigui traha por nada miéntras e vehículo ta pará pa cualkier duracion di tempu