Un Solo Pueblo Mundial Pero Tog Desuni

DJE CORESPONSAL DI SPIERTA! NA NIGERIA

BO a yega di tende e cuentanan tocante un rasa di hende cu no tabatin boca i p’esei no por a come ni bebe? E cuenta ta bisa cu holor a sostené nan, principalmente e holor di apel. Mal holor lo por a mata nan.

Tambe, tabatin cuentanan di un pueblo di West Africa cu tabatin oro pa bende. E capitan di un barcu portugues dje tempu ei a bisa: “Mil kilometer mas ayá cu [e] reino di [Mali], tin un pais di hende cu tin cabes i djente di cachó i rabu manera cachó. Eseinan ta e hendenan scur cu ta nenga di combersá pasobra nan no kier mira otro hende.” Eseinan ta algun dje ideanan straño cu hende tabatin hopi aña pasá, promé cu e época di biahamentu i descubrimentu.

Pueblo Ta Haci Contacto

Hende a tuma cuentanan asina na serio pa hopi siglo. Pero, ora exploradornan a explorá e planeta, nan no a contra cu ningun hende sin boca cu a hole apel, ni hende cu cabes di cachó. Awe casi no tin misterio tocante hende cu ta biba mas ayá di nos frontera. Mundu a bira un solo pueblo mundial. Television ta trece informacion tocante tera i pueblonan di estranheria te den e sala di nos cas. Biahamentu cu avion ta haci posibel pa bishitá e teranan ei den poco ora; miyones di hende ta biaha tur aña. Otronan ta biaha pa motibunan económico of político. Segun un informe di Fondo di Poblacion di Nacionnan Uní: “Na un escala desconocí den pasado—locual siguramente lo aumentá—hende rond mundu ta muda i ta imigrá en busca di un mihó bida.” Rond di 100 miyon hende no ta biba den e pais unda nan a nace.

Tin un aumento di interdependencia económico den e nacionnan. Tin un red di comunicacion mundial manera un sistema gigantesco di central di nervio, locual ta conectá tur nacion di mundu. Miéntras cu tin un intercambio di idea, informacion, i tecnologia, culturanan ta uni i ta adaptá na otro. Den tur e mundu hende ta bisti mas cu nunca mescos cu otro. Stadnan di mundu tin hopi cos en comun—polis, hotel luhoso, tráfico, tienda, banco, contaminacion. Pues, segun cu pueblo di mundu ta uni huntu, nos ta mira loke algun hende ta yama nacementu di un cultura mundial.

Pakico Pueblo Ta Keda Desuní

Pero, aunke pueblo i culturanan ta mescla un cu otro, ta keda bisto cu no ta tur hende ta considerá otro como ruman. Un dramaturgo griego di mas cu 2.000 aña pasá a skirbi: “Tur hende ta lihé pa tira culpa riba hende stranhero.” Lástimamente, mescos ta cierto den e dia djawe. E evidencia di esei ta tantu cerca como informe di corant di intolerancia, odio di stranhero, “exterminacion di rasa (limpiamentu étnico),” lucha racial, disturbio religioso, matamentu di hende civil, campo di matamentu, campo di violacion di hende muher, tortura, of genocidio.

Naturalmente, e mayoria di nos por haci poco of nada pa cambia e rumbo di conflicto racial. Kisas nan no ta afectá nos directamente. Sin embargo, pa hopi di nos, problema ta presentá dor di un falta di comunicacion cu e stranheronan cu ken nos ta bin den contacto—bisiña, colega di trabou, of compañero di scol.

No ta parce straño cu hende di diferente grupo étnico hopi bes ta haña cu ta difícil pa confia i apreciá un e otro? En todo caso, nos planeta tin diferencia enorme, i variedad sin fin. E mayor parti di nos ta apreciá e variedad abundante di cuminda, música, i color, i tambe e hopi sorto di mata, para, i bestia. Pero, di algun manera, nos aprecio pa variedad no semper ta incluí hende cu no ta pensa ni actua mescos cu nos.

En bes di mira e aspectonan positivo dje diferencia den hende, hopi hende tin e tendencia di enfocá riba e diferencianan i ta usa nan como base pa contencion. Pakico esaki ta asina? Ta di ki probecho pa haci esfuerso pa comunicá cu hende cu tin cultura distinto cu nos cultura? Con nos por eliminá obstáculonan pa comunicacion i vence e falta di comunicacion? E siguiente artículonan lo haci esfuerso pa contestá e preguntanan ei.