For di Nos Lectornan

Scolnan den Crísis Mi tabata pará sperando bus ora un hende a duná mi e revista “Scolnan den Crísis.” (¡Despertad! di 22 di december, 1995) El a resultá di ta mas beneficioso cu un buki henter cu mi a lesa recientemente tocante e asuntu. Lo mi keda mashá gradicidu si un abonament pa Spierta! por ta mandá na mi cas.

V. C., Merca

E seccion tocante e Scol di Ministerio Teocrático a hací mi corda ora mi tabata na scol. Mi tabatin cu duna un informe oral pero mi tabata mashá limitá den ingles n’e tempu ei. Ora mi a caba mi presentacion, e meneer a bisa cu el a keda hopi impresioná i a bisa cu mi tabata e único cu tabatin bon postura i contacto di wowo cu e auditorio. Mi por a haci esei debí n’e entrenamentu excelente cu nos ta ricibí den e Scol di Ministerio Teocrático na Salon di Reino.

G. A., Merca

Mi no tabata sa cu e artículonan aki por a instigá un reaccion emocional fuerte den mi. Ora mi tabata bai scol, mi mayornan tabata muchu preocupá cu nan mes problemanan pa yudá mi. Como resultado, mi a pasa un tempu mashá solitario ora mi tabata na scol. Debí na artículonan manera esakinan, mi a realisá cu Jehova ta stima hóbennan i no kier pa nan sinti nan so den e mundu aki.

M. M., Merca

Mali E artículo “Un Primicia pa Mali” (8 di januari, 1996) tabata tremendo. Mi a les’é tres bes. Cuantu mi ta deseá pa mi circunstancia permití mi bira un misionero! Tambe, e artículo a duná mi di sa cu tin hopi hende cu no tin cumbinencia cu nos tin i tog nan ta felis. Ki un yamada pa lanta for di soño!

D. L., Merca

Piedra Bulador Un poco dia pasá so, mi tabata puntra mi mes ki diferencia tin entre strea cu ta cai i meteorita. Imaginá mi sorpresa ora mi a lesa e artículo “Piedranan cu Ta Bula” (¡Despertad! di 8 di december, 1995), cu a splica net esei. Danki p’e publicacion di artículonan cu ta familiarisá nos cu e creacion di Jehova.

R. P., Suisa

Siñando for di Andrew Mi a caba di lesa e artículo tocante e hóben cu síndrome di Down, “Loke Nos A Siña for di Andrew.” (¡Despertad! di 8 di december, 1995) Nos tambe tin un yu cu defecto mental, i hopi comentario dje mayornan di Andrew ta reflehá con nos ta sinti nos. Hopi bes ta difícil pa nos rumannan cristian comprendé e dificultad special cu yu mentalmente retardá ta causa i e presion emocional cu ta poní riba e famia. Pues, danki p’e artículo.

J. B., Inglatera

Mi ta kere cu esei tabata un dje artículonan di mas bunita i sensibel cu boso a publicá. Riba tres página so, boso a presentá un tratamentu completo dje manera cu nos mester considerá hende cu impedimentu. El a comunicá un les profundo tocante relacion humano.

M. L., Spaña

Poco tempu pasá e aña aki mi esposa a duna lus na un yu homber cu síndrome di Down. Mescos cu e mayornan di Andrew, nos a experencia loke hopi mayornan a sinti ora nan haña sa cu nan yu tabatin defecto—afliccion i tristesa i tambe preguntanan tocante e tempu actual i e futuro. Di nos parti, nos por a aceptá e defecto di nos yu. Pronto lo e haci seis luna di edad, i e ta progresá bon. E dia despues cu el a nace, mi esposa tabata literalmente inundá pa hopi bishita di nos rumannan cristian. Nos berdaderamente a sinti loke kier men di tin un famia spiritual. I ademas dje amor di nos rumannan, tin Jehova. Danki p’e artículo aki.

G. C., Francia