Superando Tragedia cu e Poder di Jehova

DJE CORESPONSAL DI SPIERTA! NA SPAÑA

NA FEBRUARI dje aña aki, hopi hende dje Congregacion di Testigonan di Jehova di Bailén, Spaña, a disfrutá di un dia bunita huntu den e Cerunan di Sierra Nevada no masha leu. Pero, solamente 5 kilometer for di nan cas, un auto biniendo dje otro direccion a drenta e banda di caminda unda e bus tabata core, causando un dalmentu frontal. Tabatin un explosion, i e bus a yena cu vlam di candela. Algun pasahero por a baha na ora, pero hopi hende den e parti patras dje bus a sofocá di huma i a muri.

Na tur, 26 Testigo di Jehova a perde nan bida, incluyendo cuater evangelisador di tempu completo i vários mucha—casi un cuart dje Congregacion di Bailén. E rey di Spaña, Juan Carlos, a expresá e sintimentu di mayoria di pueblo spañó ora el a skirbi den su telegram p’e alcalde di Bailén: “Profundamente conmoví p’e accidente trágico ricibí nos mas sincero condolencia. Haci fabor di expresá na famia dje víctimanan nos sintimentu di mas profundo di duele i apoyo den e tempu doloroso aki.”

Un pregunta di algun dje miles di hende cu a asistí n’e servicio funerario tabata, Pakico tragedianan asina ta sosodé? Claramente, accidentenan cu “tempu i suceso imprevisto” ta causa por afectá e pueblo di Jehova mescos cu tur otro hende. (Eclesiástes 9:11, 12) No obstante, Jehova sí ta primintí cu pronto tragedianan asina lo ser eliminá.—Revelacion 21:4, 5.

Hopi miembro dje famia dje sucursal di Testigonan di Jehova na Spaña i miles di Testigonan di Jehova di otro parti dje pais a bishitá Bailén pa duna e rumannan local consuelo i apoyo. E pueblo di Bailén, huntu cu e autoridadnan local i regional, tambe a sinti e duele di famia di Testigonan di Jehova. Hopi observador a keda impresioná p’e fortalesa dje Testigonan afligí.

Antonio Gómez, alcalde di Bailén, a bisa, “Mi a conocé e Testigonan di Jehova pa hopi aña, i aunke personalmente mi ta un agnóstico, mi ta admirá boso fe. Ora e accidente a sosodé, mi a pensa mesora cu boso unidad religioso i humano lo fortalecé boso pa superá e tragedia mihó cu otro gruponan. Mi a mira con henter e pueblo a duna su apoyo n’e famianan afligí. Kisas ántes, hende tabatin malcomprendimentu tocante e tipo di hende cu boso ta, pero mi tin gustu di bisa cu e malcomprendimentu aki a disparcé. Boso tin e fortalesa interno cu ta difícil pa un hende cu no ta Testigo di Jehova comprendé.”

José Borrell, minister di obra público cu a asistí n’e entiero como representante dje gobiernu di Spaña, a admití: “Kico bo por bisa na esnan cu prácticamente a perde di golpi tur nan famia? Nada cu nan mes no por haña den nan fe. . . . Boso tin un fe maraviyoso.”

“Sigui Consolá Un e Otro”

Kico nan a “haña den nan fe”? Riba tur cos, nan a haña consuelo for di Jehova, “e Dios di tur consuelo, cu ta consolá nos den tur nos tribulacion.” (2 Corintionan 1:3, 4) Apesar di nan afliccion, nan a haña e fortalesa pa consolá un e otro, tumando na pechu e palabranan di Pablo n’e Tesalonicensenan: “Sigui consolá un e otro i edificá un e otro.”—1 Tesalonicensenan 5:11.

Tabata un experencia conmovedor pa mira rumannan cristian, algun di locual a perde te cu ocho miembro di nan famia, haci bishita cerca otro miembronan afligí dje congregacion. Francisco Saez, superintendente presidente, cu a perde e único dos yunan cu e tabatin, a splica “Ora nos a mira otro, nos a yora. Pero durante e lágrimanan nos a recordá nos mes dje speransa di resureccion, i nos a sinti nos consolá.”

“Nos no a neglishá nos actividad di predicá, i nos a haci un esfuerso special pa bishitá miembronan di famia dje fayecidonan cu no ta Testigo, usando e foyeto Ora un Persona Stimá Muri.” Francisco a sigui: “Personalmente, mi kier a predicá, pasobra mi tabata sa cu dor di predicá na otronan lo mi sintí mi mihó. I siguramente, aunke mi a sali na yoramentu, mi a bolbe cas consolá.”

E pueblo di Bailén a reaccioná mashá faborablemente n’e trabou di duna testimonio aki. Un siman despues dje accidente, Encarna, cu tabata yora e pérdida di dos yu muher i cuater nietu, a bishitá un señora cu locual el a caba di cuminsá un studio bíblico. Encarna tabata duna consuelo bíblico n’e señora cu a perde su esposo cuater luna promé. El a bisa, “Awor nos tin cu consolá otro,” miéntras cu nan a sigui nan studio dje foyeto Ora un Persona Stimá Muri.

Apoyo dje hermandad mundial tambe a yega mesora. Francisco Capilla, e secretario dje congregacion, a splica, “Henter e congregacion ta sintié asina animá p’e miles di carta i telegram cu nos a ricibí. E postkantoor tin cu manda un van directamente na nos cas tur dia pa entregá nan tur. Nos ta mashá gradicidu debí n’e interes amoroso dje rumannan.”

Tragedia Ta Producí Speransa

Algu bon por resultá for di un tragedia asina? Rey Sálomon di antigwedad a skirbi: “E curason di esnan sabí ta den e cas di luto.” (Eclesiástes 7:4) Conforme cu e principio aki, e tragedia di Bailén a haci algun hende pensa mas seriamente tocante nan relacion cu Dios. Faustino, un esposo no-creyente cu a perde dos di su seis yunan den e accidente, a bisa su esposa Dolores: “Mi tin bon noticia pa bisá bo. Mi ta bai cuminsá studia e Bijbel, siendo cu mi kier mira mi yunan den e mundu nobo.”

Aunke nos rumannan na Bailén lo no superá nan afliccion lihé, nan ta consolá otro hende i nan mes ta keda consolá. Jehova ta fortalecé nan cu su spiritu i cu e apoyo di hopi rumannan amoroso. Nos oracion ta sigui subi na nos Tata celestial pa nan.

[Plachinan na página 26]

Cuater di esnan cu a perecé