Hóbennan Sa Puntra . . .

Con Mi Por Pasa Bon?

“Ami ta haña cu nos ta logra haci hopi cos leuk. Den nos congregacion nos ta haci un berdadero esfuerso pa bini huntu. Nos ta logra pasa pret di un manera saludabel. Mayoria mucha den mundu no por bisa esei.”—Jennifer.

RECREO—tur hende mester di dje de bes en cuando. The World Book Encyclopedia ta bisa cu recreo por asta haci “un aporte importante n’e salú mental i físico di un individuo.” Sí, Bijbel mes ta bisa cu tin “un tempu pa hari,” esta, un tempu pa pasa bon!—Eclesiástes 3:1, 4.a

E palabra “recreo” ta derivá dje término latin cu ta nificá “crea di nobo, restorá, refrescá.” (Webster’s New Collegiate Dictionary) Lamentablemente, hopi dje cosnan cu hóbennan ta haci pa “pret”—manera fiestanan desenfrená of abusu di droga i alcohol of haci sex sin ta casá—no ta nada refrescante, sino destructivo. P’esei por ta berdaderamente difícil pa haña actividadnan recreativo cu ta dushi i a la bes saludabel. Pero, manera Jennifer, citá na cuminsamentu, ta indicá, esei ta posibel!

Haci Cos Huntu

Recientemente Spierta! a entrevistá un cantidad di hóben tocante e tópico aki. Mayoria di nan a bisa cu nan ta disfrutá di bini huntu cu otro hóbennan. Abo tambe ta haña esei—pero hopi biaha ta hañá bo sin un invitacion? Anto pakico no tuma e iniciativa? Por ehempel, un mucha muher di Sur Africa cu yama Leigh, ta bisa: “Si mi tin hopi gana di bai wak un cierto película, mi ta yama un di mi amigunan na telefon, i entre nos otro amigunan, un boca ta bisa otro.” Por lo general nan ta bai un funcion trempan dje película. Despues di esei, nan mayornan ta pasa busca nan i huntu nan ta bai come na un restaurant local.

Actividadnan deportivo tambe ta ofrecé oportunidadnan pa haña ehercicio i asociacion saludabel. (1 Timoteo 4:8) E hóben Roelien ta bisa: “Promé mi ta papia cu mi famia tocante unda mi tin gana di bai, anto e ora ei nos ta invitá un grupo chikitu pa djoin nos.” En berdad, hóbennan cristian a descubrí un cantidad impresionante di deportenan saludabel den cua nan por participá cu otronan: schaats, core baiskel, djog, i hunga ténis, baseball, futbol i volleyball, djis pa mencioná algun.

No, bo no tin nodi gasta un cantidad di placa of invertí den ekipo dje calidad di mas haltu pa pasa bon. “Ami cu mi mayornan i amigunan a pasa oranan deleitabel canando dor dje áreanan di ceru i mondi cerca di cas,” un mucha muher cristian tiener ta bisa. “Ta asina dushi pa djis ta pafó den aire frescu cu bon amigunan!”

Reunionnan Social cu Ta Edificá

Sin embargo, hopi hóben ta haña leuk pa asistí na reunionnan social. “Nos ta disfrutá di invitá amigunan na nos cas pa come i scucha música,” e hóben Aveda ta bisa. Reunionnan social tin nan lugá entre cristiannan. Jesucristo mes a asistí na cenanan special, fiestanan di casamentu i otro reunionnan social. (Lucas 5:27-29; Juan 2:1-10) Cristiannan di promé tambe a disfrutá di ocasionnan ora nan a bini huntu pa come i pa tin asociacion edificante.—Compará cu Hudas 12.

Si bo mayornan permití bo ser anfitrion di un reunion social, kico bo por haci pa evitá problemanan i pa haci sigur cu tur hende ta pasa bon? E clave ta planeamentu cuidadoso. (Proverbionan 21:5) Pa duna un ehempel: Tin sentido pa invitá solamente mes hopi di bo amigunan cu por ser supervisá adecuadamente. Tin ménos chens cu reunionnan mas chikitu lo para bira “diberticion desenfrená,” of “parandiamentu.”—Galationan 5:21; E Testament Nobo.

Cristiannan den e promé siglo a ser spiertá pa no socialisá cu esnan cu ta “canando desordenadamente.” (2 Tesalonicensenan 3:11-15) I un manera sigur-sigur pa ruiná un reunion awe ta dor di invitá hóbennan cu ta conocí pa ta bochinchero i incontrolabel. Aunke bo mester wak bon ken bo ta invitá, no limitá bo mes na e mésun círculo di amigunan. ‘Hancha bo mes,’ i cera mihó conocí cu algun otro hende, incluyendo esnan mas bieu, den e congregacion.—2 Corintionan 6:13.

Lo bo sirbi pasa-boca? Si ta asina, nan no mester ta masha abundante of caru pa bo invitadonan pasa un bon ratu. (Lucas 10:38-42) “Tin biaha nos tin anochi di pizza,” Sanchia, un mucha muher di Sur Africa ta bisa. Hopi biaha e invitadonan lo ofrecé pa trece algun co’i come.

Kico ta algun cos cu boso por haci na un reunion social—ademas di djis wak television, scucha música i combersá? “Por lo general nos ta planea di antemano kico lo haci e anochi ei,” Sanchia ta bisa. “Nos a yega di hunga wega of a laga un hende toca piano, di manera cu nos por a canta canticanan huntu.” Un hóben africano cu yama Masene ta bisa: “Tin biaha nos ta hunga carta, dam of schaak.”

Jennifer, citá anteriormente, a bisa Spierta!: “Den nos congregacion nos tin un anciano cu ta invitá nos na su cas pa hunga Bijbelspel. Bo mester tin bon conocimentu di Bijbel pa por hunga bon.” E representante di Spierta! a puntra otro hóbennan: “Boso no ta haña cu hunga Bijbelspel ta fo’i lugá?” Nan a contestá prácticamente gritando: “No!”

“E ta un desafio,” un mucha muher tiener a bisa. “E ta leuk!” un otro a bisa. Ora ta hunga Bijbelspel pa pasa leuk, i ta mantené e spiritu di competencia bou di control, esei por ta placentero i educacional!—Mira “Haciendo Reunionnan Social Agradabel Pero Probechoso,” den e edicion di ¡Despertad! di 22 di september, 1972 [na ingles, 22 di juni, 1972].

Pasa Pret Como Famia

Den tempu bíblico no tabata algu straño pa famia disfrutá di algun forma di recreo huntu. (Lucas 15:25) Sin embargo, e autornan hóben di The Kids’ Book About Parents (E Buki di Muchanan Tocante Mayornan) ta remarcá cu “mayornan i muchanan ta asina ocupá awendia cu ningun hende tin tempu pa planea actividadnan . . . Nos ta haña cu ta importante pa mayornan i muchanan haci sigur cu nan ta pasa algun tempu huntu tur siman haciendo actividadnan cu ta simplemente leuk.”

“Diabierne ta nos dia di famia,” un hóben africano cu yama Paki ta bisa. “Por lo general nos ta hunga wega huntu.” I laga nos no lubidá bo rumannan carnal. E hóben Bronwyn ta bisa: “Mi ta disfrutá di pinta i haci cosnan artístico cu mi ruman muher mas chikitu.” Abo lo por tuma e iniciativa i sugerí algun actividad leuk pa haci cu bo famia?

Ora Bo Ta Completamente Bo So

Kico si bo ta bo so? Esei no ta nificá cu bo mester ferfelá bo mes of sintí bo bo so. Tin hopi manera productivo i agradabel pa usa periodonan di tempu asina. Por ehempel, hobi. Desde tempu bíblico homber i muher a haña cu studia música ta enrikesé nan bida. (Génesis 4:21; 1 Samuel 16:16, 18) “Ami ta toca piano,” Rachel ta bisa. “Esei ta algu cu bo por haci ora bo ta ferfelá bo mes.” Si bo no tin inclinacion musical, kisas bo lo disfrutá di siña cose, cuida mata, coleccioná stampia of siña un idioma straño. Como un extra recompensa, bo por asta desaroyá algun abilidad cu lo resultá di ta útil mas despues den bida.

Bijbel ta bisa nos cu hombernan di fe, manera Isaac, a busca tempu pa nan ta nan so pa meditá. (Génesis 24:63) Un hóben austriaco cu yama Hans ta bisa: “De bes en cuando, mi ta djis bai na un lugá ketu den curá i ta sinta mira e bahada di solo. Esaki ta duná mi hopi goso i ta yudá mi sintí mi mas cerca di mi Dios, Jehova.”

“Placer” den Jehova Su Sirbishi

Bijbel a profetisá cu Cristo lo a haña “placer” den sirbi Jehova Dios. (Isaías 11:3) I aunke sirbishi sagrado na Dios no ta berdaderamente recreo, e por ta refrescante i satisfaciente.—Mateo 11:28-30.

Hans, citá anteriormente, ta corda un otro experencia agradabel. E ta bisa: “Ami cu mi amigunan ta gusta corda e finnan di siman cu nos a pasa trahando na e sitio di construccion di un Salon di Asamblea [pa adoracion]. Nos a siña con pa traha huntu, i nos a siña conocé otro mihó. Awor cu nos ta wak bek, nos tin e satisfaccion cu nos a haci algu cu a bale la pena i cu tabata leuk tambe.”

E testimonio dje hóbennan cristian aki ta haci un echo masha-masha cla: Bo no tin nodi keda sin pasa bon. Sigui principionan bíblico. Usa bo imaginacion! Tuma iniciativa saludabel! Lo bo haña cu bo por pasa bon den maneranan cu ta edificante i no cu ta kibrá bo.

[Nota]

[Komentario na página 22]

“Ta asina dushi pa djis ta pafó den aire frescu cu bon amigunan!”

[Plachi na página 23]

Bo no tin nodi gasta hopi placa pa pasa bon cu amigunan