Capítulo 37

Pakico mi no por goza de bez en cuando?

DIABIERNE anochi Paulinaa tabatin e costumber di asisti na reunion cristian. El a gusta e splicacion, pero tabatin bez cu rencor a molestié pasobra e tabata sintá ei mientras cu su amiganan di scol a sali pa goza.

Ora e reunion a caba, Paulina a pasa dilanti di un discotheek riba camina pa cas. E ta corda: “E tocamento duro di música a hala mi atencion i també luz di color, mi a para un rato ora nos a pasa i a imaginámi cu anhelo cuanto nan tabata goza.” Cu tempo, su deseo pa goza cu su amiganan a bira e cos di mas importante den su bida.

Mescos cu Paulina, por tin bez cu bo ta pensa cu door cu bo ta cristian, bo ta perde algo. Bo kier wak e programa di TV cu tur bo amigonan ta menciona, pero bo mayornan ta bisa cu tin mucho violencia den dje. Bo kier bai riba caya i asocia cu e muchanan di scol, pero bo mayornan ta yámanan “mal asociacion.” (1 Corintio 15:33) Bo kier bai ne fiesta unda tur bo amiganan tá, pero bo mama i tata ta bisa cu No.

Ta parce cu bo amiganan di scol ta bai i bin na nan gusto, ta bai festival i fiesta te madrugá sin cu nan mayornan bisa nada. P’sei, bo ta sinti envidia di nan libertad. Bo no kier haci nada malu. Bo simplemente kier goza de bez en cuando.

Diverticion​—⁠e punto di bista di Dios

Sea sigur cu no ta nada malu pa deseá di goza. Foral, Jehova ta e “Dios feliz.” (1 Timoteo 1:11) I usando e sabí Salomón, el a bisa: “Hovenan, goza boso hubentud. Sea feliz mientras cu boso ta hoven ainda. Haci loke boso kier, i sigi e deseo di boso curazón.” Sin embargo, Salomón a duna e advertencia: “Corda cu Dios lo huzgábo pa tur loke bo ta haci.”​—⁠Eclesiastés 11:​9, 10, Today’s English Version.

Sabiendo cu Dios ta tenébo responsabel pa loke bo ta haci ta pone diverticion den henteramente otro luz. Pasobra, aunque Dios no ta condena hende pa nan gozamento, e sí ta desaproba di hende cu ta ‘amante di placer,’ hende cu ta biba solamente pa goza. (2 Timoteo 3:​1, 4) Pakico ta asina? Considera rey Salomón. Usando su riqueza enorme, el a purba tur placer humano cu hende por imagina. El a bisa: “Tur loke mi wowo a pidi, mi no a nenga di duna. Mi no a nenga mi curazón di ningun clase di gozamento.” Cu ki resultado? “Mira! tur cos ta banidad i ta un lucha tras di bientu.” (Eclesiastés 2:​10, 11) Sí, Dios sa cu alolargu, un bida sigiendo tras di placer solamente ta lagábo desilusioná i frustrá.

També, Dios ta exigi pa bo keda liber di costumber cu ta contamina, tal como abuso di droga i relacion sexual sin casa. (2 Corintio 7:⁠1) Pero, hopi cos cu hovenan ta haci pa goza por hibábo pa biciá den tal costumber. Por ehempel, un mucha muher a decidi di bai sin chaperón na fiesta di amiga di scol. E ta corda: “E música dje stereo tabata tremendo, e baliamento tabata bon mes, pasaboca tabata dushi i tabatin hopi harimento.” Pero, e ora ei, “un hende a trece pito. Anto a yega aguardiente. Ne ora ei tur cos a cuminza bai fuera di control.” Inmoralidad sexual tabata e resultado. E mucha muher a confesa: “Mi a keda miserabel i den depresion desde e tempo ei.” Sin supervision di hende grandi, ta ki fácil pa fiesta asina bira “fiesta wild,” of parandiamento!​—⁠Galatio 5:​21, Testament Nobo.

No ta straño cu bo mayornan por keda mashá preocupá tocante con bo ta pasa bo tempo liber, kizás bisando unda bo no por bai i cu ken bo no mag asocia. Pa ki motibo? Pa yudábo presta atencion ne advertencia di Dios: “Kita shagrinamento for di bo curazón, i evita calamidad pa bo carni; pasobra hubentud i flor di bida ta banidad.”​—⁠Eclesiastés 11:⁠10.

Bo ta envidioso di buscador di placer?

Ta fácil pa lubida tur esei i envidia e libertad cu algun hoven ta parce di tini. Paulina no a asisti na reunion cristian mas i a bai den compañía di un grupo di buscador di placer. “Mi a hayámi practicando tur e cosnan malu contra locual mi a recibi advertencia,” segun ele. Cu tempo e paranda di Paulina a resulta den su arresto i cerramento den un scol pa mucha muher gedwal!

Leu den pasado e skirbidor di Salmo 73 tabatin sintimento igual cu esnan di Paulina. El a admiti cu “Mi a bira envidioso di bromador, ora mi por a mira e paz mes di hende malbado.” E asta a cuminza duda e balor di cumpli cu principio husto. El a bisa: “Siguramente ta en bano cu mi a haci mi curazón limpi i cu mi a laba mi man den inocencia mes.” Pero, e ora ei el a haya per⁠spicacia profundo: Hende malbado ta riba ‘camina peligroso,’ tambaleando na rand di desaster!​—⁠Salmo 73:​3, 13, 18.

Paulina a siña esei na moda penoso. Despues di su paranda mundano, el a haci cambio dramático den su bida pe por recobra e fabor di Dios. En cambio, bo no tin cu ser arrestá, haya maleza door di relacion sexual, of sufri di agonía di kita for di drogadiccion pa bo sa cu e prijs di ‘gozamento’ ta mucho halto pa paga. Tin hopi manera saludable i edificante pa bo goza cu ta liber di tal risico. Cua ta algun di nan?

Diverticion saludable

Un encuesta di hovenan americano a mustra cu hovenan “ta disfruta di buitendag i actividad cu nan famía de bez en cuando.” Hacimento di cosnan hunto como un famía no solamente ta gozoso sino por mehora unidad di famía.

Esei kier men mas cu gewoon wak television hunto. Segun Dr. Antonio Pietropinto: “E problema di wakmento di television ta cu, aunque bo por hacié hunto cu otro hende, básicamente bo ta hacié bo so. . . . Pero, pasatempo tal como wega na cas, deporte den curá, trahamento di bolo of cos dushi, proyecto pa tren ofishi, i lezamento na boz halto siguramente ta ofrece mas oportunidad pa comunicacion, cooperacion, i estímulo intelectual cu solamente e preocupacion inactivo di famía moderno cu television.” Manera Juan, e tata di siete yiu, a bisa: “Asta hacimento di curá limpi of ferfmento di cas por ta un diverticion si boso ta hacié como un famía.”

Si bo famía no ta haci tal cosnan hunto caba, tuma iniciativa i sugeri esei na bo mayornan. Purba di inventa algun idea excitante i interesante pa buitendag of proyecto pe famía.

Sin embargo, bo no tin cu ser semper cu otro hende pa goza. María, un hovencita cu ta vigila cuidadosamente su asociacion, a siña con pa disfruta di tempo cu e ta so. El a bisa: “Mi ta toca piano i fió, i mi ta dedica algun tempo pa ensayá.” Melisa, un otro hovencita, a bisa mescos: “Tin bez cu mi ta pasa tempo skirbiendo cuenta of poesía pa mi mes diverticion.” Abo també por siña utiliza tempo productivamente, desaroyando bo capacidad tal como lezamento, carpentería, of tocamento di instrumento musical.

Get-together cristian

De bez en cuando, ta gozoso també pa reuni cu amigonan. I den hopi sector tin un gran cantidad di actividad saludable cu bo por goza. Wandelmars, corre bicicleta, hunga bala tal como volley, futbol, beisbol, softbol, of basketbol, ta diverticion popular na Antil⁠las. També bo por varia i purba di bishita lugar interesante tal como museo of dierentuin. I, sí, ta permití di hunta hunto i simplemente toca disco of wak programa saludable di TV cu otro hovenan cristian.

Bo asta por pidi bo mayornan yudábo planeá un get-together mas formal. Hacié interesante planeando un variedad di actividad, tal como Bijbelspel i cantamento den grupo. Si algun amigo di bo ta toca instrumento, kizás bo por pidi nan toca. Bon cuminda també ta mehora e ocasion, pero e no tin cu ser extravagante ni caro. Tin bez cu invitado por trece diferente cos pa come.

Tin un parque of feld di bala cerca bo cas cu ta permiti actividad tal como wega di bala of tin pisina? Pakico no planea un picnic? Atrobé, otro famía por contribui treciendo cuminda di manera cu ningun hende tin carga pisá financiero.

Moderacion ta clave. Pa bo goza música, no ta necesario pa toqué asina duro cu ta haci hende sordu, ni tampoco baliamento no tin cu ser vulgar of indecente pa ser gozoso. Di igual manera, wega den aire liber por ta gozoso sin competencia mortal. Sin embargo, segun un tata: “Tin bez cu algun hovenan ta pleita, casi te ne punto di bringa.” Mantene tal actividad gozoso door di sigi e conseho bíblico di evita ‘competencia un cu otro.’​—⁠Galatio 5:⁠26.

Ken bo mester invita? E Bijbel ta bisa, “Tene amor intenso pa henter e asociacion di rumanan.” (1 Pedro 2:17) Pakico limita get-together na hovenan so? Extende bo asociacion. (Compara cu 2 Corintio 6:13.) Un tata a bisa: “Ruman di edad, aunque hopi bez nan no por participa den algun actividad, ta gusta bini i wak e wega.” Hopi bez e presencia di hende grandi ta evita pe cos bai fuera di control. Pero no ta posibel pa invita “tur e asociacion di rumanan” na un solo get-together. Además, ta mas fácil pa tene un grupo chikito bao di control.

Get-together cristian també ta ofrece oportunidad di edifica otro spiritualmente. Ta cierto cu algun hoven ta kere cu si bo ta inclui spiritualidad den get-together, esei ta kita e gozo di dje. Un mucha homber cristian a keha: “Ora nos tin un get-together, nan ta bisa, ‘Sintábo, saca bo Bijbel pa nos tin Bijbelspel.’ ” Sin embargo, e salmista a bisa: “Feliz ta e hende . . . [ken] su gozo ta den e ley di Jehova.” (Salmo 1:​1, 2) Pues, conbersacion​—⁠of asta wega​—⁠cu ta concentra riba e Bijbel por ta basta gozoso. Kizás bo simplemente tin cu mehora bo conocimento dje Scritura pa bo por participa mas plenamente.

Un otro idea ta di laga varios ruman conta con nan a bira cristian. Of aumenta e cariño i harimento invitando algun ruman pa conta cuenta humorístico. Hopi bez eseinan ta siña les di balor. Algun capítulo den e buki aki asta por forma e base pe grupo tene un conbersacion interesante na get-together.

Mantene equilibrio di recreacion!

Siguramente Jesucristo no tabata contra gozamento de bez en cuando. E Bijbel ta bisa cu el a bai fiesta di casamento den Caná, unda indudablemente tabatin un abundancia di cuminda, música, baliamento, i asociacion edificante. Jesús asta a haci un contribucion ne bon éxito dje fiesta di casamento haciendo milagro percurando biña!​—⁠Juan 2:​3-11.

Pero e bida di Jesús no tabata un fiesta sin fin. El a dedica mayor parti di su tempo sigiendo tras di interés spiritual, siñando hende pa haci e boluntad di Dios. El a bisa: “Mi cuminda ta pa mi haci e boluntad di esun cu e mandámi i caba su trabao.” (Juan 4:34) Hacimento dje boluntad di Dios a duna Jesús hopi mas placer duradero cu loke un diverticion temporario por a duné. Awe, tin ainda “basta pa haci den e trabao di Señor.” (1 Corintio 15:58; Mateo 24:14) Pero ora, de bez en cuando, bo ta sinti e necesidad di algun recreo, disfruta di dje na moda balanzá i saludable. Manera un skirbidor a bisa: “No ta posibel pa yena bo bida yen yen tur ora cu accion i excitacion​—⁠i si bo ta purba, lo bo keda morto cansá!”

[Nota]

Pregunta pa consideracion Capítulo 37

◻ Pakico algun hoven cristian ta envidiá hovenan di mundo? Bo a yega di haci esei?

◻ Ki advertencia Dios ta duna hovenan tocante nan conducta, i con esei mester afecta nan scogimento di recreo?

◻ Pakico ta bobo pa envidia hovenan cu ta viola ley i principio di Dios?

◻ Menciona algun manera pa disfruta di recreo saludable (1) cu miembro di famía, (2) bo so, i (3) cu otro hende cristian.

◻ Con Jesucristo a pone ehempel di equilibrio den e asunto di recreo?

[Komentario na página 297]

“E tocamento duro di música i luz di color a hala mi atencion, i mi a para un rato ora nos a pasa i a imaginámi cu anhelo cuanto nan tabata goza”

[Komentario na página 302]

“Un hende a trece pito. Anto a yega aguardiente. Ne ora ei tur cos a cuminza bai fuera di control”

[Plachi na página 299]

Hovenan cu ta sigi principio bíblico realmente ta perde gozamento?

[Plachi na página 300]

Sigimento di un hobby ta un manera saludable pa ocupa bo tempo liber

[Plachi na página 301]

Get-together cristian ta mas gozoso ora bo ta planea varios actividad i ta invita hende di varios edad