Sobrebibiendo den un Mundu Golos

“CON mi por sobrebibí?” James Scott a hañ’é confrontá cu e pregunta ei ora e tabata totalmente perdí den e Cerunan di Himalaya. E tabata den berdadero peliger di muri di vries of di hamber. El a corda cu el a yega di mira hende den competencianan di karate “perde nan forsa poco-poco, cada golpi tabata caba cu nan ánimo, te ora . . . nan bira completamente indefenso.” El a bisa: “Asina ei mi a sinti segun cu mi a cera mi slaapzak i débilmente a come poco sneu. Mi ánimo a ser aplastá i tur mi gana di biba a bai lagá mi. Nunca mi a sintí mi asina derotá.”—Lost in the Himalayas (Perdí den Himalaya).

Awe, hopi hende, den un sentido, ta mescos cuné—atrapá den un mundu dominá pa golosidad. Kisas bo ta sinti cu poco-poco bo ta perdiendo bo forsa i ta ser derotá. Poco hende por scapa completamente dje efectonan inmediato di golosidad. Dependiendo di unda bo ta biba den mundu, e problemanan cu bo ta enfrentá lo varia inmensamente hopi—golosidad ta afectá hende den paisnan den desaroyo di un manera masha distinto compará cu esnan den e nacionnan próspero. No obstante, sea cual sea e dificultadnan, kisas bo por siña con pa sobrebibí kedando relativamente intacto den sentido físico, emocional i spiritual te ora rescate yega. Con? Dor di sigui conseho básico duná dor di expertonan den sobrebibencia.

Dos punto ta resaltá den nan conseho. E promé ta di evitá di haci un situacion ya caba difícil mas pió. “Bo estrategia,” The Urban Survival Handbook ta bisa, “mester ta pa evitá di tuma rísiconan innecesario . . . i pa minimisá e daño causá dor di esnan cu bo no por evitá.” E di dos—i kisas esun mas importante—tin di haci cu actitud. “Sobrebibencia,” The SAS Survival Handbook ta bisa, “ta mes tantu un cuestion di actitud mental cu di condicion físico i conocimentu.”

Haci Loke Bo Por bou dje Circunstancianan

“Na Merca un hende ta ser matá cada 22 minuut, hortá cada 47 seconde i gravemente asaltá cada 28 seconde,” Staying Alive—Your Crime Prevention Guide ta informá. Den condicionnan manera esei, kico bo por haci? Lo ménos cu bo por haci ta purba evitá di haci bo mes un blanco obvio of un víctima fácil. Sea alerto i prudente. Haci loke bo por pa minimisá e peliger.a

Por ehempel, no haci bo situacion pió dor di ser fácil pa engañá. The New York Times ta informá cu 18 porciento di mericano ta admití di ta víctima di fraude—hortá di miles di dollar dor di hende sin escrúpulo cu ta yag riba víctimanan vulnerabel. Hopi bes e víctimanan ta hendenan di mas edad manera un biuda di 68 aña for di ken US$40.000 a ser hortá. Su experencia a haci nan pone e titular di noticia: “Si e Cabei Ta Blancu, Expertonan di Estafa Ta Mira Berde [esta, dollar].”

Pero bo no tin nodi bira djis un otro víctima inocente i indefenso wardando pa ser explotá. Staying Alive ta spierta nos: “Tene cuidou cu e lobo disfrasá na carné.” Un wela di 70 aña a sigui e conseho aki. Un homber a ofrec’é un seguro cu ta cubri tur gastu médico, na un costo di solamente US$10 pa luna. “E único cos cu Wela mester a haci,” e informe ta bisa, “tabata duna e bendedor US$2.500 na man.” E no a haci esei. Dor di yama e compania di seguro, el a haña sa cu e homber tabata un fraude. “Miéntras cu el a basha un kopi di te mas pa e bendedor, polis a yega i a bai cuné.”

Haci loke bo por pa protehá bo mes ta e implicacion dje conseho cu Bijbel ta duna. “Cualkier persona sin experencia ta pone fe den tur palabra, pero esun spiertu ta considerá su pasonan.” (Proverbionan 14:15; 27:12) Hopi hende ta descartá Bijbel como anticuá i impráctico. Pero su conseho práctico por yudá bo sobrebibí. E sabí Rey Sálomon a skirbi: “Sabiduria [manera esun hañá den Bijbel] ta pa un proteccion mescos cu placa ta pa un proteccion; pero e bentaha di conocimentu ta cu sabiduria mes ta conserbá bibu su doñonan.”—Eclesiástes 7:12.

Hopi lector di Spierta! a haña cu esaki ta cierto. Por ehempel, algun a haña un midí di proteccion dor di grita duru ora nan a ser menasá cu violacion of otro violencia, na armonia cu loke ta ser mencioná na Deuteronomio 22:23, 24. Otronan a sigui e conseho bíblico di keda leu di tur cos “cu ta contaminá sea curpa of spiritu.” (2 Corintionan 7:1, The Twentieth Century New Testament) Asina nan a protehá nan mes for di esnan cu ta cana bende sigaria of droga riba caya, kendenan ta enrikesé nan mes a costo di hende su salú. Hopi lector a evitá tambe e trampanan di tele-evangelistanan rancador di placa i políticonan hambrá pa poder. (Mira cuadro, página 7.) Lesa e Bijbel. Lo bo keda sorprendí di cuantu yudansa práctico e ta duna.

No Bira Infectá cu Golosidad

Naturalmente, golosidad ta presentá un otro peliger mas—bo mes por bira golos. Esaki lo hortá bo di e mihó cualidadnan moral cu ta distinguí hende for di bestia. Describiendo un ‘free-for-all’ comercial den cua negoshantenan tabata gara tur loke nan por a haña, a cita un observador cu a bisa: “Di berdad e porconan tabata hocha. E nivel di golosidad . . . simplemente a sali for di man.” Esei probablemente ta mas un insulto pa e porconan cu pa e oportunistanan di negoshi! Siguramente ta parce cu nan a ignorá e bon conseho cu Jesucristo a ofrecé: “Tene boso wowo habrí i vigilá contra tur sorto di cudishi.”—Lucas 12:15.

Jesucristo a duna e conseho ei, pasobra e tabata sa cuantu daño bo por haci na bo mes si golosidad gará bo. Un deseo intenso pa cosnan material—i tambe, naturalmente, un deseo intenso pa poder of sex—por bira e pasion den bo bida cu ta absorbá tur cos, hortando bo di cualkier tempu of inclinacion cu lo bo por tabatin pa interesá den hende of balornan spiritual. “Placa,” Anthony Sampson ta bisa den su buki The Midas Touch (E Toke di Mídas), a “tuma over hopi atributo di un religion.” Con asina? Placa ta bira un dios. Tur otro cos ta ser sacrificá riba e altar di golosidad i ganashi. E punto esencial ta pa gana placa. Mas hopi e ta, mihó. Pero, si bo wak bon, no ta importá con hopi tempu bo dedicá na dje, golosidad pa cosnan material nunca lo ser satisfacé completamente. Eclesiástes 5:10 ta bisa: “Un simpel stimador di plata lo no ta satisfecho cu plata, ni ningun stimador di rikesa cu entrada.” Asina tambe, “un simpel stimador” di poder, posesion of sex nunca lo ta satisfecho, ni maske cuantu e haña.

Nunca Perde Speransa di Ser Rescatá

Un clave importante pa sobrebibencia ta di mantené speransa bibu i un punto di bista positivo. Tin biaha bo no por haci mashá pa scapa dje efectonan di hende golos. Por ehempel, hende cu ta muriendo di hamber, hopi bes por haci masha poco pa scapa di nan situacion penoso n’e momento ei. Sin embargo, no laga bai; no entregá. “Ta fácil pa laga bai, pa cai den otro i haña duele di bo mes” ora bo ta exponé na un ambiente hostil i peligroso, The SAS Survival Handbook ta bisa. No sucumbí na pensamentu i emocionnan negativo. Lo bo keda sorprendí di cuantu bo por wanta. “Homber i muhernan a demostrá cu nan por sobrebibí den e situacionnan di mas adverso,” e mésun manual ta bisa. Con nan a hacié? Nan a sobrebibí, e ta bisa, “pa motibu di nan determinacion di haci esei.” Sea dicididu pa no laga e sistema golos aki derotá bo.

James Scott, mencioná anteriormente, cu tempu a ser rescatá for di loke por a bira su graf den Himalaya. El a bisa cu su lucha pa sobrebibí a siñ’é por lo ménos un les importante. Cua esei tabata? “No tin ningun desafio den bida cu ta demasiado duru pa enfrentá,” el a bisa. Tim Macartney-Snape, un subidor di ceru cu experencia kende a keda asombrá cu James Scott por a sobrebibí lo suficiente pa nan hañ’é bibu, tambe e saca un les. El a bisa: “Miéntras cu tin un krenchi di speransa, bo nunca mester entregá.” Pues, sin importá con scur cos por parce di ta, bo ta solamente haci cosnan pió si bo perde speransa. Nunca perde speransa di ser rescatá.

Pero acaso tin un “krenchi di speransa,” un probabilidad realístico di ser rescatá for di un mundu saturá cu golosidad? Nos lo ser librá un dia di hende golos cu ta ruinando e planeta aki i destrosando e bida di miles di miyones? De echo, sí tin un speransa sigur di rescate. Considerá e contesta di Bijbel den e siguiente artículo.

[Nota]

[Kuadro na página 7]

Spiertamentunan Bíblico Oportuno

Proverbionan 20:23 “Dos sorto di peso ta algu detestabel pa Jehova, i un balansa defraudador no ta bon.”

Jeremias 5:26, 28 “Entre mi pueblo a ser hañá hombernan malbado. Nan ta sigui loer, manera ora cogedornan di para ta bùk abou. Nan a pone un trampa ruinoso. Ta hende nan ta gara. Nan a bira gordo; nan a bira briyante. Tambe nan a abundá di cosnan malu. Nan no a defendé ningun causa hudicial, ni sikiera e causa hudicial dje huérfano di tata, pa nan por logra éxito; i e huicio dje pobernan nan no a tuma na nan encargo.”

Efesionan 4:17-19 “Esaki, pues, mi ta bisa i ta duna testimonio den Señor, pa boso no sigui cana mescos cu e nacionnan tambe ta cana den e inutilidad di nan mente, miéntras cu nan ta den scuridad mentalmente, i alehá for dje bida cu ta pertenecé na Dios pa causa dje ignorancia cu ta den nan, pa causa di nan curason sin heful. Ya cu nan a yega di ta mas ayá di tur sentido moral, nan a entregá nan mes na libertinahe pa obra tur clase di impuresa cu golosidad.”

Colosensenan 3:5 “P’esei, mata boso miembronan di curpa cu ta riba tera pa loke ta fornicacion, impuresa, apetit sexual, deseo perhudicial i cudishi, locual ta idolatria.”

2 Timoteo 3:1-5 “Pero sabi esaki, cu den e último dianan lo presentá tempu crítico, duru pa trata cuné. Pasobra hende lo ta stimador di nan mes, stimador di placa, presumido, halsá, blasfemador, desobediente na mayornan, malagradecidu, desleal, sin cariño natural, no dispuesto na ningun acuerdo, calumniador, sin dominio propio, feros, sin amor pa bondad, traicionero, cabesura, hinchá cu orguyo, stimador di placer mas bien cu stimador di Dios, teniendo un forma di debocion piadoso pero resultando falsu na su poder; i apartá bo di esakinan.”

2 Pedro 2:3 “Cu cudishi nan lo probechá di boso cu palabranan fingí. Pero en cuanto nan, e huicio desde tempu antiguo no ta move lentamente, i nan destruccion no ta drumí.”