Golosidad—Kico E Ta Haciendo cu Nos?

GOLOSIDAD ta ruinando e bida di miyones. E ta kitando cualidadnan humano for di hende golos i ta causando dolor i pena na nan víctimanan. A lo mehor bo ta sintiendo e efectonan di golosidad den bo bida. Asta gewoon hortamentu den tienda ta aumentá e prijs di loke bo ta cumpra. Si bo entrada ta abou i productonan diario di primera necesidad ta fuera di bo alcanse, probablemente bo ta un víctima dje golosidad di un otro persona.

Esnan cu Hamber i Esnan Muriendo

Egoismo nacional golos ta impedí esfuersonan di gobiernunan pa yuda e pobernan eficasmente. Ya na 1952 caba, e científico i experto den nutricion Sir John Boyd Orr a bisa: “Gobiernunan ta prepará pa uni hende i recursonan pa un guera mundial, pero e Gran Potencianan no ta prepará pa uni pa eliminá hamber i pobresa for di mundu.”—Food Poverty & Power (Scarcedad di Cuminda i Poder), di Anne Buchanan.

Naturalmente, ta duna un muestra di yudansa. Pero kico ta e realidad di bida pa e mayoria pober i neglishá dje poblacion di mundu? Un informe recien a declará cu apesar cu a despachá mas cuminda na algun área, “hamber i malnutricion ainda ta persiguí e mayoria dje pobernan di mundu . . . Un kinta parti [mas cu mil miyon] dje poblacion di mundu ta pasa hamber tur dia.” E informe ta sigui bisa: “Ademas, 2 mil miyon hende ta sufri di ‘hamber scondí’ pa motibu di . . . deficiencia [den dieta] cu por hiba na defectonan serio.” (Developed to Death—Rethinking Third World Development [Desaroyá te na Morto—Reconsiderando Desaroyo di Tercer Mundu]). E cifranan aki sigur mester bira noticia principal!

Esnan Sclabisá

Lidernan di mafia ta haci nan mes ricu a costo di nan víctimanan i e público en general. Droga, violencia, prostitucion i explotacion económico ta sclabisá miyones. Tambe, Gordon Thomas ta bisa den su buki Enslaved (Sclabisá): “Di acuerdo cu e Sociedad Anti-Sclabitud, tin segun cálculo 200 miyon esclabo na mundu. Rond di 100 miyon di nan ta mucha.” Kico ta e causa básico? E informe ta splica: “E impulso pa sclabisá ta keda un aspecto scur dje naturalesa humano . . . [Sclabitud ta] e producto di cudishi, golosidad i amor pa poder.”

Esnan poderoso ta desposeé e débilnan i e vulnerabelnan i ta mata hopi di nan. “Dje dos miyon indjannan cu tabata biba na Brazil ora hende blancu a yega nobo-nobo, kisas awor tin doshen mil cu a keda na bida.” (The Naked Savage) Di con? E motibu básico ta golosidad.

E Brecha Creciente Entre Ricu cu Pober

The New York Times a informá cu James Gustave Speth, un administrador den e Programa di Desaroyo di Nacionnan Uní, a declará cu “un grupo élite cu ta surgiendo mundialmente . . . ta acumulando gran rikesa i poder, miéntras cu mas cu mitar di humanidad ta keda afó.” E brecha peligroso aki entre ricu cu pober ta bira mas bisto den su palabranan: “Ainda nos tin mas cu mitar dje hendenan riba e planeta cu un entrada di ménos cu US$2 pa dia—mas cu 3 mil miyon hende.” El a agregá: “Pa hende pober den e mundu aki partí den dos clase, e situacion ta un tera fértil pa fomentá desesperacion, rabia, frustracion.”

E desesperacion aki ta aumentá dor dje echo cu ta parce cu hopi dje ricunan no tin ni escrúpulo ni ningun compasion pa e situacion penoso dje masanan di hende hambrá i afligí dor di pobresa.

E víctimanan di golosidad ta tur caminda. Mira, por ehempel, e mirada di confusion den wowo dje refugiadonan atrapá meimei dje lucha pa poder na Bosnia, Ruanda i Liberia. Mira e resignacion den cara di esnan cu ta muriendo di hamber meimei di un mundu di abundancia. Kico tin tras di tur esaki? Un forma of otro di golosidad!

Con bo por sobrebibí siendo rondoná dor di salbahenan golos den un ambiente asina hostil? E siguiente dos artículonan lo considerá e pregunta aki.