Un Mundu sin Golosidad

“SIN un revolucion mundial den e manera di pensa di humanidad, nada lo cambia bira mihó den nos ser como humano, i e catástrofe den direccion di cua nos mundu ta bayendo . . . lo ta inevitabel.”—Václav Havel, presidente di República Checo.

Hopi hende ta reconocé cu e sistema di mundu actual no por sobrebibí. Algun hende, manera Václav Havel, ta mira un cambio mundial den pensamentu i accion di hende como e único solucion. Por ehempel, un observador dje esena mundial actual ta bisa: “Pa cientos di miyones di esnan desesperadamente pober, e perspectiva pa haña cuminda i otro necesidadnan di bida lo no ta mihó . . . a ménos cu e nacionnan di mundu actua decisivamente pa cambia e rumbo di tendencianan actual.”—Food Poverty & Power.

Sin embargo, ta realístico pa cifra nos speransa pa sobrebibencia riba un of otro cambio fundamental den naturalesa humano? Nos por confia trankilamente riba gobiernunan pa “actua decisivamente pa cambia e rumbo di tendencianan actual”? Algun ta haña cu sí. ‘Dios a duna nos un boluntad liber, i ta keda na nos pa cambia cos,’ nan ta bisa. Pero e echonan cruel di historia ta lanta dudanan serio tocante e deseo i abilidad di hende pa haci e cambionan necesario. E punto di bista aki no ta pesimista, mas bien, e ta realístico. Lo bo pone bo bida den man di un ciruhano si bo tabata sa cu tur su pashentnan promé cu bo a muri?

Un Problema di Educacion?

“E problema ta unu di educacion,” Ted Trainer ta bisa, den Developed to Death—Rethinking Third World Development. E ta bisa cu a ménos cu hende por ser educá pa mira cu cambio fundamental ta necesario, “nos no por spera di pasa pa un sistema di mundu cu por funcioná.” Sin duda, tin un necesidad pa educá hende tocante e importancia di cambia actitud i accionnan si nos kier pa e mundu sobrebibí. De echo, e ta esencial, i Bijbel ta papia tocante un programa educacional asina. E ta bisa cu e tera lo “ta yená cu e conocimentu di Jehova.” E ora ei, ningun hende lo “haci ningun daño ni causa ningun ruina” na ningun parti riba tera.—Isaías 11:9.

Pero no tin ningun cantidad di educacion, ni sikiera e programa educacional di Dios, cu riba su mes lo libra e tera di hende golos cu ta haci hopi daño i ta causa ruina na tur parti. Educacion lo producí cambio solamente den hende cu kier cambia, hende cu kier conformá nan mes na Dios su normanan. Segun Jesucristo, nan ta un minoria. (Mateo 7:13, 14) Pues, Bijbel no ta basa su promesa di cambio riba un of otro speransa engañoso di cu un dia henter humanidad lo realisá con inmenso e problema ta anto cambia nan manera. E ta bisa cu Dios lo tuma accion directo pa libra e tera di hende golos.

Intervencion di Parti di Dios

Hopi hende ta considerá e idea aki di accion directo di parti di Dios un soño of un espehismo. “Adelantonan intelectual den siglo diesocho a forsa nos pa bandoná e nocion consolador di un Dios cu lo intervení i stret asuntunan di humanidad,” World Hunger: Twelve Myths ta bisa. Pero nos mester pone nos fe den e argumento i filosofianan intelectual di esnan cu a perde fe den “un Dios cu lo intervení”? No ta nan solucionnan ta un espehismo?

Ta mas sabí pa basa nos speransa pa sobrebibencia riba e profecianan infalibel hañá den Bijbel cu ta señalá na intervencion di Dios su parti. No ta djis un “nocion consolador” pa kere Dios su promesanan—esei ta e único speransa realístico pa sobrebibencia cu nos tin!

“E Ruina di Esnan Cu Ta Ruinando e Tera”

Kico exactamente Dios ta primintí? Wel, pa cuminsá, e ta primintí di libra e tera di esnan cu ta contaminá i ta destruí e medio ambiente. Revelacion 11:18 ta declará cu e tin un “tempu señalá” pa “causa e ruina di esnan cu ta ruinando e tera.” Kico esei lo nificá? Lo e nificá un fin na tur esnan cu actualmente ta oprimí esnan pober i vulnerabel. Dios lo ‘husga e afligínan dje pueblo, salba e yunan di esun pober, i aplastá e defraudador.’ Lo e eliminá esnan golos i lo permití nan víctimanan inocente pa prosperá. “Lo e libra esun pober cu ta sclama pa yudansa . . . For di opresion i for di violencia lo e rescatá nan alma.”—Salmo 72:4, 12-14.

Ki un cambio esei lo trece! Segun apostel Pedro, e cambio aki lo ta asina total cu lo e producí “shelu nobo i un tera nobo.” (2 Pedro 3:13) Den e “tera nobo” aki, tur hende lo disfrutá di suficiente producto dje tera. (Mikéas 4:4) Asta awor, tin cuminda abundante pa tur hende. Distribucion desigual ta e problema. “A ser calculá cu nos lo por producí suficiente riba e área potencialmente cultivabel dje tera pa mantené 38-48 mil miyon hende,” Anne Buchanan ta bisa, den su buki Food Poverty & Power.

E planeta aki lo sobrebibí. Su Creador “no a cre’é simplemente pornada [sino] a form’é asta pa ser habitá.” (Isaías 45:18) Dios su accion contra hende golos lo nificá un periodo corticu di “tribulacion grandi.” (Mateo 24:21) Anto sobrebibientenan dje tribulacion ei lo disfrutá di un tera paradísico, habitá dor di hende totalmente liber di golosidad. (Salmo 37:10, 11; 104:5) Lo ta manera Bijbel ta primintí: “Jehova siguramente lo limpia e lágrimanan for di tur cara.”—Isaías 25:8.

Abo tambe por ta un dje felis beneficiarionan di Dios su accion di kita golosidad for dje tera. Si berdaderamente bo kier haci Dios su boluntad, haci uso di tur e yudansa cu ta ser percurá pa yudá bo sobrebibí awor den un mundu golos. Tuma accion pa sobrebibí e “tribulacion grandi.” Testigonan di Jehova ta cla pa yudá bo siña loke bo tin cu sa. Sintí bo liber pa tuma contacto cu nan na e Salon di Reino local of skirbi na e adres riba página 5 cu ta mas cerca di bo.