Unu Cu Sí Ta Interesá

MILES di hende ta mustra cu nan sí tin interes den otro hende. Nan no ta adoptá e punto di bista sin heful i egoista cu e problemanan di otro hende no ta nan preocupacion. Mas bien, nan ta haci tur loke nan por—tin bes asta riscando nan mes bida—pa aliviá sufrimentu. Esaki ta un tarea inmenso, unu cu ta ser complicá pa forsanan poderoso fuera di nan control.

Un trahadó den programanan di auxilio a bisa cu factornan manera golosidad, intriga político, guera i desaster natural por frustra asta e “esfuersonan mas progresivo i determiná pa caba cu hamber.” Eliminá hamber ta apénas un dje hopi problemanan cu esnan cu ta interesá den otro hende ta enfrentá. Tambe nan ta bringa cosnan manera enfermedad, pobresa, inhusticia i e inmenso sufrimentu cu guera ta causa. Pero nan ta ganando?

E ehecutivo principal di un agencia di auxilio a bisa cu esnan cu ta haci e “esfuersonan progresivo i determiná” ei pa aliviá hamber i dolor, ta manera e samaritano compasivo cu Jesucristo a describí den su ilustracion. (Lucas 10:29-37) Pero maske kico nan haci, segun e, e cantidad di víctima simplemente ta sigui crece. P’esei el a puntra: “Kico e bon samaritano mester haci si pa vários aña e pasa e mésun ruta tur dia, i tur siman e haña un otro víctima dje atracadónan cant’i caminda?”

Lo ta fácil pa sucumbí na loke a ser describí como e ‘enfermedad mortífero di cansancio di donante’ i simplemente entregá debí na frustracion. Esnan cu di berdad ta interesá den otro no ta entregá, i nan ta haña mérito pa esei. (Galationan 6:9, 10) Por ehempel, un homber cu a skirbi e korant británico Jewish Telegraph, a encomendá Testigonan di Jehova, cu durante e tempu di Alemania nazi “a yuda miles di hudiu sobrebibí e miserianan di Auschwitz.” E escritor a bisa cu “ora cuminda tabata scars, nan tabata parti nan pan cu nos rumannan [hudiu]!” E Testigonan a sigui haci loke nan tabata por cu e recursonan cu nan tabatin.

Pero, e realidad ta cu maske cuantu pan parti, esei lo no trece un fin completo na sufrimentu humano. No cu nos ta minimisá loke personanan compasivo a haci. Cualkier accion cu debidamente ta suavisá sufrimentu ta bale la pena. E Testigonan ei a aliviá e dolor dje otro prezunan un poco, i cu tempu nazismo a pasa pa historia. Sin embargo, e sistema di mundu cu ta causa e opresion ei ta sigui existí, i ainda tin hopi hende sin consideracion. Sí, “tin un generacion kende su djentenan ta spada i kende su kakumbein ta cuchú di abatuar, pa come esnan afligí for di riba tera i esnan pober for di entre humanidad.” (Proverbionan 30:14) Probablemente bo ta puntra bo mes con bini esaki ta e caso.

Pakico Tin Pobresa i Opresion?

Un biaha Jesucristo a bisa: “Boso semper tin hende pober cu boso, i ki ora cu boso kier boso . . . por haci bon pa nan.” (Marco 14:7) Jesus tabata kier men cu pobresa i opresion lo no caba nunca? El a kere manera algun ta kere, cu tal sufrimentu ta parti di un plan di Dios pa duna esnan compasivo e oportunidad pa mustra cuantu interes nan tin den otro hende? No! Jesus no a kere esei. Simplemente e tabata splica cu pobresa lo ta parti di bida tanten cu e sistema di cosnan aki ta existí. Pero loke Jesus tabata sa tambe ta esaki: No tabata e propósito original di su Tata celestial p’e condicionnan ei existí riba tera.

Jehova Dios a crea e tera p’e ta un paradijs, no un lugá plagá cu pobresa, inhusticia i opresion. El a mustra cuantu interes e tabatin den e famia humano dor di haci percuracionnan maraviyoso cu lo a permití hende disfrutá mas di bida. Sí, considerá e nomber mes dje hofi caminda nos promé mayornan, Adam i Eva, a haña nan mes! E tabata yama Eden, cu ta nificá “Placer.” (Génesis 2:8, 9) Jehova no a limitá hende n’e necesidadnan básico pa sobrebibí den un ambiente laf i opresivo. Na conclusion di su obra di creacion, Jehova a inspeccioná loke el a traha i a declará cu e tabata “hopi bon.”—Génesis 1:31.

Wel anto, pakico pobresa, opresion i otro causanan di sufrimentu ta reina rond mundu awe? E mal sistema di cosnan actual ta existí pasobra nos promé mayornan a scoge pa rebelá contra Dios. (Génesis 3:1-5) Esaki a lanta e pregunta si tabata corecto pa Dios exigí obedencia di su criaturanan. Dor di esei, Jehova a permití desendientenan di Adam un periodo limitá di independencia. Ainda Dios tabata interesá den loke a sosodé cu e famia humano. El a percurá un manera pa deshací di tur e daño cu rebelion contra dje lo a producí. I pronto, Jehova lo caba cu pobresa i opresion, de facto, cu tur sufrimentu.—Efesionan 1:8-10.

Un Problema Fuera di Solucion Humano

Atrabes di siglonan desde creacion di hende, humanidad a sigui alehá mas for dje normanan di Jehova. (Deuteronomio 32:4, 5) Den nan rechaso continuo di Dios su ley i principionan, ser humano a bringa contra otro, i “hende a dominá hende pa su perhuicio.” (Eclesiástes 8:9) E egoismo di esnan cu kier haci cosnan na nan manera en bes di someté nan n’e soberania di Dios, a stroba tur esfuerso pa producí un sociedad berdaderamente hustu, liber di tur loke ta plaga e masanan cu ta sufri.

Tin un problema mas, unu cu kisas hopi hende lo descartá como nonsens supersticioso. Ainda e instigadó di rebelion contra Dios ta incitá hende na maldad i egoismo. Esei ta Satanas e Diabel, i Jesucristo a yam’é “e gobernante dje mundu aki.” (Juan 12:31; 14:30; 2 Corintionan 4:4; 1 Juan 5:19) Den e revelacion cu apostel Juan a ricibí, Satanas ta ser identificá como e fuente predominante di afliccion, esun cu ta principalmente responsabel pa ‘gaña henter e tera habitá.’—Revelacion 12:9-12.

Maske cuantu interes algun hende ta mustra den nan próhimo, hamas nan lo por eliminá Satanas e Diabel of cambia e sistema aki cu ta fomentá un cantidad cada bes mas i mas grandi di víctima. Kico ta necesario anto pa resolvé e problemanan di humanidad? E solucion no ta djis un persona cu ta interesá den humanidad. Mester ta un persona cu tin tantu e boluntad como e poder pa caba cu Satanas i henter su sistema inhustu.

“Laga Bo Boluntad Sosodé . . . Riba Tera”

Dios ta primintí di destruí e mal sistema di cosnan aki. E tin tantu e boluntad como e poder necesario pa haci esei. (Salmo 147:5, 6; Isaías 40:25-31) Den e buki profético di Daniel, Bijbel ta predicí: “E Dios di shelu lo establecé un reino cu nunca lo no ser reducí na ruina. I e reino mes lo no pasa na ningun otro pueblo. Lo e aplastá i pone un fin na tur e reinonan aki, i e mes lo permanecé te na tempu indefiní,” sí, pa semper. (Daniel 2:44) Ta e gobiernu celestial duradero i bondadoso aki Jesucristo tabatin na mente ora el a siña su disipelnan pa pidi Dios den oracion: “Laga bo reino bini. Laga bo boluntad sosodé, mescos cu den shelu, tambe riba tera.”—Mateo 6:9, 10.

Jehova lo contestá e oracion ei pasobra di berdad e ta interesá den e famia humano. Segun e palabranan profético di Salmo 72, Dios lo autorisá su Yu, Jesucristo, pa trece alivio duradero pa esnan pober, esnan afligí i oprimí cu ta apoyá Jesus su gobernacion. P’esei e salmista inspirá a canta: “Lagu’e [Dios su Rey Mesiánico] husga esnan afligí dje pueblo, lagu’e salba e yu hombernan di esun pober, i lagu’e aplastá e estafadó. . . . Lo e libra esun pober cu ta sclama pa yudansa, tambe esun afligí i ken cu no tin yudante. Lo e sinti duele di esun di condicion humilde i esun pober, i e alma di esnan pober lo e salba. For di opresion i for di violencia lo e rescatá nan alma, i nan sanger lo ta precioso den su bista.”—Salmo 72:4, 12-14.

Den un vision cu tin di haber cu nos tempu, apostel Juan a contemplá “un shelu nobo i un tera nobo,” un sistema di cosnan completamente nobo cu Dios ta establecé. Ki un bendicion pa humanidad cu ta sufri! Den un profecia tocante loke Jehova lo haci, Juan a skirbi: “Mi a tende un bos fuerte for dje trono bisa: ‘Mira! E tent di Dios ta cu humanidad, i lo e biba cu nan, i nan lo ta su pueblo. I Dios mes lo ta cu nan. I lo e seca tur lágrima di nan wowo, i lo no tin morto mas, ni lo no tin lamento ni sclamacion ni dolor mas. E cosnan anterior a pasa bai.’ I Esun sintá riba e trono a bisa: ‘Mira! mi ta haci tur cos nobo.’ Tambe, e ta bisa: ‘Skirbi, pasobra e palabranan aki ta fiel i berdadero.’”—Revelacion 21:1-5.

Sí, nos por kere e palabranan aki pasobra nan ta fiel i berdadero. Pronto Jehova lo actua pa eliminá pobresa, hamber, opresion, enfermedad i tur inhusticia. E revista aki a señalá na vários ocasion for dje Scritura cu un abundancia di evidencia ta mustra cu nos ta bibando den e tempu cu e promesanan aki lo cumpli. Dios su mundu nobo primintí ta tras di porta! (2 Pedro 3:13) Pronto, Jehova lo “traga morto pa semper” i lo “limpia e lágrimanan for di tur cara.”—Isaías 25:8.

Aunke esei ta pa futuro ainda, nos por ta contentu cu awor aki mes tin hende cu di berdad ta interesá den nan próhimo. Un mayor causa di alegria ta cu Jehova Dios mes tambe tin berdadero interes. Pronto lo e eliminá tur opresion i sufrimentu.

Bo por tin pleno confiansa den Jehova su promesanan. Su sirbidó Hosué tabata unu cu a confia sigur. Cu pleno confiansa, el a bisa Dios su pueblo antiguo: “Boso sa bon cu tur boso curason i cu tur boso alma cu ni un solo palabra di tur e bon palabranan cu Jehova boso Dios a papia cu boso a faya. Nan tur a ser realisá pa boso. Ni un solo palabra di nan a faya.” (Hosué 23:14) P’esei, miéntras nos ta biba den e sistema di cosnan actual, no laga e pruebanan cu lo bo tin cu enfrentá aplastá bo. Tira tur bo ansiedad riba Jehova, pasobra di berdad e ta interesá den bo.—1 Pedro 5:7.

[Plachinan na página 7]

Den Dios su mundu nobo primintí, tera lo ta liber di pobresa, opresion, enfermedad i inhusticia