Consuelo pa Esnan Oprimí

BO A ripará cu durante bo bida cierto palabranan a ser ripití bes tras bes den titularnan di noticia? Bo ta cansá di lesa palabranan manera guera, crímen, desaster, hamber i sufrimentu? Sin embargo, tin un palabra cu notablemente no ta aparecé den informenan di noticia. Tog, e ta un palabra cu ta representá algu cu humanidad mester di dje mashá. E palabra ta “consuelo.”

“Consolá” ta nificá “duna fortalesa i speransa na” i “aliviá e pena of problema di” un persona. Cu tur e disturbionan cu e mundu a pasa den durante siglo 20, hende tin gran mester di speransa i un alivio di pena. Ta cierto cu algun di nos awe ta disfrutá di mas comodidad material cu nos antepasadonan hamas a imaginá posibel. Esaki en gran parti ta debí na progreso científico. Pero ciencia i tecnologia no a consolá nos den e sentido di eliminá for di humanidad tur e causanan di sufrimentu. Cua ta e causanan aki?

Hopi siglo pasá e homber sabí Sálomon a papia di un causa básico di sufrimentu ora el a bisa: “Hende a dominá hende pa su perhuicio.” (Eclesiástes 8:9) Ciencia i tecnologia no por a cambia e tendencia di hende di kier dominá su próhimo. Den siglo 20, esaki a hiba na dictadura opresivo den paisnan i na gueranan horendo entre paisnan.

Desde 1914 mas cu shen miyon hende a ser matá como resultado di guera. Pensa riba e agonia humano cu e cifra aki ta representá—miyones di famianan na luto den necesidad di consuelo. I gueranan a hiba na otro clasenan di sufrimentu ademas di morto violento. Na fin dje segundo guera mundial, tabatin mas cu 12 miyon refugiado na Europa. Den añanan mas recien, mas cu un miyon i mei hende a hui dje zonanan di guera na zuidoost di Asia. Guera den paisnan Balkan a forsa mas cu dos miyon hende pa hui di nan cas—den hopi caso pa scapa di “purificacion étnico.”

Refugiadonan siguramente tin mester di consuelo, specialmente esnan cu ta ser forsá pa bandoná nan cas cu nada mas cu e posesionnan cu nan por carga, sin sa unda pa bai of kico e futuro ta encerá pa nan i nan famianan. Hendenan asina ta entre e víctimanan di opresion cu ta duna mas lástima; nan tin mester di consuelo.

Den partinan mas pacífico dje tera, miyones di hende ta prácticamente esclabo dje sistema económico dje mundu. Ta cierto cu algun hende tin un abundancia di biennan material. Sin embargo, mayoria ta enfrentá un lucha diario pa gana nan pan di cada dia. Hopi hende ta en busca di bibienda adecuá. Cantidadnan aumentante ta desempleá. Un corant africano ta predicí cu “e mundu ta bayendo pa un crísis di desempleo sin precedente, i pa aña 2020 lo tin mas cu 1.300 miyon hende adicional buscando empleo.” Siguramente esnan económicamente oprimí tin mester di “fortalesa i speransa,” esta, consuelo.

Reaccionando riba circunstancianan desesperante, algun hende ta bira criminal. Naturalmente, esaki solamente ta crea dificultad pa nan víctimanan, i e gran cantidad di crímen ta aumentá e sintimentu di opresion. Un titular recien den The Star, un corant di Johannesburg, Sur Africa, a bisa: “Un dia típico dje ‘pais mas asesino na mundu.’” E artículo a describí un dia típico den i alrededor di Johannesburg. Riba e solo dia ei, cuater hende a ser asesiná i ocho hende su auto a ser secuestrá. Dieshete ladronicia a ser raportá den un suburbio di clase medio. Ademas, tabatin un cantidad di atraconan armá. Segun e corant, polis a describí esaki como un dia “relativamente ketu.” Ta di comprendé cu famianan di víctimanan di asesinato i esnan cu a experenciá ladronicia den cas i secuestro di auto ta sinti nan sumamente oprimí. Nan tin mester di speransa i di ser trankilisá, esta, consuelo.

Den algun pais, tin mayornan cu ta bende nan yunan pa traha como prostituta. Segun informe, un pais asiático caminda turistanan ta basha bai riba “sex tour,” tin dos miyon prostituta, di cua hopi a ser cumprá of secuestrá na mucha. Tin hende mas oprimí cu e víctimanan aki cu ta duna lástima? Skirbiendo tocante e traficacion baho aki, e revista Time a informá di un conferencia tení na 1991 di organisacionnan di hende muher di zuidoost Asia. Ei, a ser calculá cu “30 miyon muher a ser bendí mundialmente desde medio añanan ’70 bini ariba.”

Naturalmente, muchanan no tin cu ser bendé pa traha como prostituta pa nan bira víctima. Un cantidad aumentante ta ser abusá físicamente of asta violá den nan mes cas dor di mayornan i famianan. Muchanan asina por bai ta carga sicatrisnan emocional pa hopi tempu. Siguramente, como víctimanan trágico di opresion, nan tin mester di consuelo.

Un Observador Antiguo di Opresion

Rey Sálomon tabata hororisá cu e grado di opresion humano. El a skirbi: “Mi mes a regresá pa mi por mira tur e actonan di opresion cu ta ser hací bou di solo, i, mira! e lágrimanan di esnan cu tabata ser oprimí, pero nan no tabatin consolador; i di parti di nan opresornan tabatin poder, di manera cu nan no tabatin consolador.”—Eclesiástes 4:1.

Si e rey sabí a realisá 3.000 aña pasá cu esnan oprimí desesperadamente tabatin mester di un consolador, kico lo el a bisa awe? No obstante, Sálomon tabata sa cu ningun hende imperfecto, incluyendo e mes, lo por a duna e consuelo cu humanidad mester. Tabatin mester di un persona mas grandi pa caba cu e poder dje opresornan. Tin un persona asina?

Den Bijbel, Salmo 72 ta papia di un magnífico consolador pa tur hende. E salmo a ser skirbí dor di Sálomon su tata, Rey David. E título ta bisa: “En cuanto Sálomon.” Evidentemente, el a ser skirbí dor di Rey David ya di edad avansá, en cuanto Esun cu lo a heredá su trono. Esun aki, segun e salmo, lo a trece alivio permanente for di opresion. “Den su dianan esun hustu lo brota, i e abundancia di pas te cu e luna no t’ei mas. I lo e tin súbditonan di laman te laman i . . . te na cabamentu dje tera.”—Salmo 72:7, 8.

Probablemente, ora David a skirbi e palabranan aki, e tabata pensando di su yu Sálomon. Pero Sálomon a realisá cu tabata fuera di su poder pa sirbi humanidad den e manera describí den e salmo. E por a cumpli cu e palabranan dje salmo solamente den un manera limitá i na fabor dje nacion di Israel, no p’e beneficio di henter e tera. Evidentemente, e salmo inspirá i profético aki a señalá na un persona hopi mas grandi cu Sálomon. Ken esei tabata? Esei por ta solamente Jesucristo.

Ora un angel a anunciá e nacementu di Jesus, el a bisa: “Jehova Dios lo dun’é e trono di David su tata.” (Lucas 1:32) Ademas, Jesus a referí na su mes como “algu mas cu Sálomon.” (Lucas 11:31) Desde Jesus su resureccion p’e sinta na man drechi di Dios, e tabata den shelu, n’e sitio for di unda e por cumpli cu e palabranan di Salmo 72. Ademas, el a ricibí di Dios e poder i autoridad pa kibra e yugo di opresornan humano. (Salmo 2:7-9; Daniel 2:44) Pues Jesus ta esun cu lo cumpli cu e palabranan di Salmo 72.

Pronto Opresion Lo Terminá

Kico esaki kier men? E kier men cu libertad for di tur forma di opresion humano pronto lo ta un realidad. E sufrimentu i opresion sin precedente cu nos a mira durante e siglo 20 aki a ser profetisá pa Jesus como parti dje señal cu lo a marca “e conclusion dje sistema di cosnan.” (Mateo 24:3) Entre otro cosnan, el a profetisá: “Nacion lo lanta contra nacion i reino contra reino.” (Mateo 24:7) E rasgo ei dje profecia a cuminsá cu su cumplimentu rond dje tempu cu e promé guera mundial a cuminsá na 1914. “Debí na e aumento di maldad,” Jesus a agregá, “e amor dje mayoria lo fria.” (Mateo 24:12) Maldad i falta di amor a producí un generacion malbado i opresivo. Pues, e tempu pa Jesucristo intervení como e Rey nobo dje tera mester ta cerca. (Mateo 24:32-34) Kico esei lo nificá pa hendenan oprimí cu tin fe den Jesucristo i cu ta acudí na dje como e Consolador di humanidad nombrá pa Dios?

Pa un contesta n’e pregunta ei, laga nos lesa algun palabra mas di Salmo 72 cu ta ser cumplí den Cristo Jesus: “Lo e libra esun pober cu ta sclama pa yudansa, tambe esun afligí i ken cu no tin yudante. Lo e sinti duele di esun di condicion humilde i esun pober, i e almanan di esnan cu ta pober lo e salba. For di opresion i for di violencia lo e rescatá nan alma, i nan sanger lo ta precioso den su bista.” (Salmo 72:12-14) Pues Dios su Rey nombrá, Jesucristo, lo soru pa ningun hende tin cu sufri debí na opresion. E tin e poder pa pone fin na tur forma di inhusticia.

‘Esei ta zona masha bunita,’ tal bes un persona ta bisa, ‘pero kico di awor? Ki consuelo tin pa esnan cu ta sufriendo awor aki?’ En realidad, sí tin consuelo pa esnan oprimí. E siguiente dos artículonan den e revista aki lo mustra con miyones di hende ya caba ta hañando consuelo dor di desaroyá un relacion estrecho cu e Dios berdadero, Jehova, i cu su Yu stimá, Jesucristo. Un relacion asina por consolá nos durante e tempu opresivo aki i por hiba un persona na bida eterno liber di opresion. Jesus a bisa den oracion na Dios: “Esaki ta nificá bida eterno, cu nan ta ganando conocimentu di bo, e único Dios berdadero, i di esun cu bo a manda, Jesucristo.”—Juan 17:3.

[Plachi na página 4, 5]

Ningun hende lo oprimí otro den e mundu nobo di Dios