Cuida Bo Oido!

UN INVESTIGACION recien bou di 400 hóben na Francia a revelá cu 1 di cada 5 di nan a perde parti di nan oido. Un estudio similar un década pasá a mustra cu solamente 1 di cada 10 hóben tabatin e problema ei. Pa haci algu contra e aumento dramático den pérdida di oido di hóbennan, aña pasá e Asamblea Nacional di Francia a vota pa limitá e nivel di zonido cu ta sali for di stereonan personal na 100 decibel.

Por tira hopi dje culpa pa e pérdida di oido riba e nivelnan haltu di zonido cu ta sali for di headphone di stereonan personal. Ciruhano di orea, Jean-Pierre Cave ta bisa cu volúmennan riba 100 decibel por hiba na daño permanente despues di un par di ora. Ta tuma solamente algun minuut pa e daño ei sosodé ora e volúmen ta riba 115 decibel. FNAC, un dje bendedornan mas grandi di aparatonan electrónico na Francia, ta bisa cu mayoria di su stereonan personal ta producí mas cu 100 decibel. Algun stereo personal por producí 126 decibel, locual ta 400 biaha mas potente cu 100 decibel!

Conciertonan di rock por ta haciendo daño na asta mas hóbennan cu stereonan personal, segun e specialista frances di oido Christian Meyer-Bisch. En berdad, esnan cu ta asistí regularmente na conciertonan di rock tabatin bastante pérdida di oido compará cu hóbennan salú di 18 aña. Nada straño cu delegado dje Asamblea Nacional di Francia Jean-François Mattei a duna e spiertamentu: “Nos ta produciendo un generacion di hende surdu.”

Pues pa cuida bo oido, cuidou cu e volúmen ei!