Un Hardinero Experto

E BADJAGA di Sur América ta sorprendé biólogonan cu su técnicanan sofisticá di cultivá hardin. Pa percurá pa cuminda, e insecto chikititu aki ta corta fragmentonan di blachi i ta recogé sedimentu for dje suela di mondi i ta hiba esakinan bek pa su neshi bou di tera. Despues e badjaga ta mula e pidanan aki i ta traha un papa di nan pa fertilisá su hardin di beskein. E badjaga aki sa instintivamente con pa mantené su cultivo di beskein na un nivel ideal di temperatura i humedad pa obtené e mihó resultadonan. Pa crea partinan nobo di tereno, e ta transferí material cortá for dje cultivo cu ta cla caba pa un tereno di blachi mas nobo. E badjaga a asta siña dominá e arte di snui pa duna e mihó crecementu posibel dje beskein. Investigadornan di Gales a observá cu e horticulturista ábil aki ta ahustá su esfuersonan segun e necesidadnan di alimento dje neshi, i asina ta spar tempu i energia.

Cultivá hardin ta trabou duru, i e badjaga ta asombroso den esaki. Nada straño cu Bijbel ta bisa: “Bai cerca e vruminga, abo, floho; mira su camindanan i bira sabí. Aunke e no tin comandante, oficial ni gobernante, e ta prepará su cuminda asta den zomer; el a reuní su artículonan di cuminda asta den tempu di cosecha.” (Proverbionan 6:6-8) Berdaderamente, e instinto dje badjaga ta duna prueba dje sabiduria di su Creador, Jehova Dios.—Proverbionan 30:24, 25.