Un Vruminga Su Téknika di Tene Su Antèna Limpi

Pa un insekto por bula, subi i orientá su ambiente, limpiesa ta importante. Por ehèmpel, un vruminga ku tin un antèna ku ta sushi lo no por orientá, komuniká òf detektá un holó fásil. Un zoólogo ku yama Alexander Hackmann a bisa: “Nunka lo bo haña un insekto ku ta sushi. Nan a siña kon pa trata ku kontaminashon di superfisie.”

Konsiderá: Hackmann i su koleganan a studia e téknika ku e tipo di vruminga ei (Campunotos rufifemur) ta usa pa tene su antèna limpi. Nan a haña sa ku e ta kita algun partíkula di diferente tamaño for di su antèna. E ta dobla su pia pa klèm su antèna i ta trèk e antèna pase dor di e klèm. E spiñanan ku e tin den su klèm ta kita e sushi grandi. Sushi mas chikitu ta ser kitá ku algu manera un peña fini ku tin habrí nèt na e hanchura di e kabeinan riba e vruminga su antèna. E sushi di mas chikitu—ku ta 1/80 biaha e diameter di un kabei humano—ta ser kitá ku un sorto di skeiru mas fini ainda.

Wak kon un vruminga ta tene su antèna limpi

Hackmann i su tim ta kere ku e téknika ku e vruminga ta usa pa tene su antèna limpi por ser usá den industria. Por ehèmpel, nan por usa e mesun método ei durante produkshon di komponentenan mikroelektróniko i di elektrónika ku ta delikado. Esei lo yuda tene nan limpi, pasobra sino nan por daña ku djis un tiki sushi so.

Kiko abo ta pensa? E vruminga su téknika pa tene su antèna limpi ta kasualidat òf diseño?