Tera Su Variedad Infinito—Con El A Bin na Existencia?

DI E mas cu 1,5 miyon especie di animal cu científiconan a duna nomber te asina leu, rond di un miyon ta insecto. Lo rekerí 6.000 página di enciclopedia pa traha un lista di tur e insectonan conocí! Con e criaturanan aki a originá? Pakico asina un variedad infinito? Acaso esaki ta e resultado di puru casualidad, di cu naturalesa tabatin “bon suerte” miyones di bes? Of ta dor di diseño?

Promé, laga nos mencioná brevemente algun dje otro variedadnan di organismonan bibu cu tin riba nos planeta.

Paranan Asombroso

Kico dje mas cu 9.000 diferente especie di para maraviyosamente diseñá? Algun blenchi ta mes chikititu cu un abeha grandi, sin embargo nan ta bula cu mas abilidad i elegancia cu mayoria helicopter avansá. Otro paranan ta migra na distancianan di miles di kilometer tur aña, manera e bubi Noordse stern, cu ta bula pa cada biahe te cu 35.000 kilometer pa bai i bini. E no tin computer, ni instrumentonan di nabegacion, pero sin faya e ta yega su destinacion. Acaso e abilidad natural aki ta existí pa casualidad of dor di diseño?

Un Variedad Fasinante di Mata

Ademas, tin e tremendo variedad i beyesa di flora—mas cu 350.000 especie di mata. Rond di 250.000 di esakinan ta producí flor! E organismonan bibu mas grandi riba tera—e palunan gigantesco di secoya—ta mata.

Cuantu diferente flor ta crece den bo hardin of den bo área? E beyesa, e simetria, i hopi bes e fragancia dje flornan aki—for dje flor di mas chikitu di desierto, e margarita, of e boterbloem, te n’e orkidianan den nan gran variedad—ta pone un hende keda asombrá. Atrobe, nos ta puntra: Con nan a yega na existencia? Pa casualidad of dor di diseño?

Océanonan Yen-Yen di Bida

I kico dje formanan di bida hañá den riu, lago i océanonan di mundu? Científiconan ta bisa cu tin rond di 8.400 especie conocí di piscá di awa dushi i rond di 13.300 especie di piscá cu ta biba den océano. Esun mas chikitu di esakinan ta e gobi hañá den e Océano Indio. E ta solamente 1 centimeter largu. Esun mas grandi ta e tribon bayena, cu por midi te cu 18 meter largu. Den e cifranan p’e especienan aki nos no a incluí e invértebrenan (sin wes’i lomba) ni e especienan cu no a ser descubrí ainda!

E Celebro Increibel

Mas cu tur cos, e celebro humano—conteniendo por lo ménos dies mil miyon neuron, cada un teniendo posiblemente mas cu 1.000 sinápsis, of punto di contacto cu otro celnan di nervio—ta increibel. Neurólogo Dr. Richard Restak ta bisa: “E cantidad total di coneccionnan dentro di e red inmenso dje sistema di neuron dje celebro ta berdaderamente astronómico.” (The Brain [E Celebro]) E ta agregá: “Por tin for di dies biyon pa shen biyon sinápsis den e celebro.” Despues e ta haci un pregunta masha relevante: “Con por ta cu un órgano manera e celebro, cu ta contené entre dies mil miyon pa shen mil miyon cel, a desaroyá for di un solo cel, e webu?” Acaso e celebro ta e producto di coincidencia i capricho impersonal di naturalesa? Of tin diseño inteligente tras di tur esaki?

Sí, con e diversidad di bida i diseño aparentemente infinito a presentá? Bo a ser siñá cu esaki tabata simplemente un asuntu di casualidad, di purba i faya, di dal i hera, di un purbamentu ciegu di evolucion? Anto sigui lesa pa mira e preguntanan cu algun científico, den tur onestidad, ta haciendo tocante e teoria di evolucion, teoria cu a ser yamá e fundeshi di tur ciencia biológico.

[Diagram na página 4]

Si un simpel cámara ta rekerí un diseñadó, kico dje wowo humano cu ta muchu mas complicá?

Area di Lens

(MAGNIFICA)

Voorkamer

Pretu di wowo

Córnea

Iris

Corpus ciliare

Lens

Wowo Completo

[Plachi na página 4]

Glasvocht

Nervio di wowo

Retina

Choroidea

Blancu di wowo