Enfrentando e Desafio

E ATAKE riba moralidad sexual ta cuminsá trempan den bida si tin programanan di television, bukinan, revistanan, películanan i música cu ta presentá sex. Hóbennan ta ser hincá den patronchinan di conducta sexual adulto sin tin e proteccion di stabilidad emocional. Algun mayor asta ta agregá mas na e presion sexual dor di permití nan sali cu e sexo opuesto na edad yong. Otro hóbennan ta pone presion riba nan pa sali cu e sexo opuesto, i hopi hóben cu tin un mucha homber of mucha muher pa basta tempu, pronto ta baha nan vigilancia i ta bira sexualmente activo. “Ki comun e ta . . . pa un mucha muher tiener cu ta sinti cu su mayornan no ta stim’é . . . cai den un abraso sexual cu su mucha homber keriendo ekibocadamente cu esei lo trece amor i intimidad,” segun Luther Baker, un profesor di estudionan di famia.

Hóbennan tin e tendencia di biba nan añanan di adolesencia como si fuera e ta nan último chens pa gosa di bida, en bes di mir’é como un preparacion pa bida. “Enamorá cu nan capacidad nobo i convencí dor di otro hóbennan cu abilidad sexual extraordinario ta e manera pa ta homber, hopi hóben ta bira roofdiernan sexual” den nan adolesencia, Profesor Baker a bisa. Un 30 aña pasá, historiadó Arnold Toynbee a lamentá tocante e engaño aki lansá riba nos hubentud, ya cu e tabata di opinion cu historia a mustra cu parti dje energia creativo dje mundu Occidental moderno a sali for dje abilidad di posponé ‘actividad sexual’ cerca adolesentenan pa laga nan concentrá riba gana conocimentu.

Mayornan cu Ta un Influencia Positivo

Mayornan cu no ta permití adolesentenan sali cu e sexo opuesto pa recreo ta mustra interes genuino den e futuro salú i felicidad di nan yunan. Dor di tin normanan moral haltu i mantené un bon comunicacion, nan por tin un influencia den e bida di nan yunan. Investigacion den e conducta sexual di hóbennan ta indicá cu “e influencia aki por hiba e yunan pa posponé actividad sexual,” segun Journal of Marriage and the Family.

Mayornan cu ta inculcá den nan yunan un sentido fuerte di disiplina propio i responsabilidad ta haña e mihó resultadonan. “Ora adolesentenan i nan mayornan tin balornan cu ta enfatisá responsabilidad, e chensnan cu e adolesentenan lo haña yu sin casa ta bira hopi chikitu,” un estudio ta testificá. Esaki ta rekerí pa mayornan ta sensitivo n’e actividadnan dje yunan—controlá nan huiswerk; sa unda nan ta i ken ta nan amigunan; pone metanan académico realístico; i compartí balornan spiritual. Yunan cu ta lanta cu e relacion íntimo aki cu nan mayornan lo sinti nan mihó tocante nan mes i lo sinti nan confortabel cu nan sexualidad.

E mihó conseho pa tantu mayornan como yunan ta e sabiduria hañá den Bijbel. Mayornan den Israel a ser mandá pa siña nan yunan bon balornan moral. Jehova a puntra nan: “Cua nacion grandi tin cu tin reglamentunan hustu i decisionnan hudicial manera tur e ley aki cu mi ta poniendo dilanti boso awe?” Tabata e “reglamentunan hustu” aki cu nan mester a siña nan yunan den e calor i intimidad dje ambiente di famia. “Bo tin cu inculcá nan den bo yu i papia di nan ora bo ta sinta den bo cas i ora bo ta cana riba caminda i ora bo ta bai drumi i ora bo ta lanta.” E Scritura a amonestá yunan: “Warda . . . e mandamentu di bo tata, i no bandoná e ley di bo mama.” E comunicacion i instruccion caluroso i íntimo ei for di tantu tata como mama ta edificá den e yunan un actitud balansá pa cu bida i sexualidad, locual ‘lo vigilá’ un hóben atrabes di henter su bida.—Deuteronomio 4:8; 6:7; Proverbionan 6:20, 22.

Hóbennan, pakico ruiná boso futuro dor di entregá na impulsonan sexual? E añanan di tiener ta mas of ménos shete na cantidad. Mester usa nan pa crece mentalmente, emocionalmente i spiritualmente i pa desaroyá un actitud balansá tocante sexualidad, pa prepará bo pa e siguiente 50 of 60 añanan di bida. Mayornan, tuma e responsabilidad cu Dios a duna boso na serio, i protehá boso yunan dje dolor di curason cu malesanan transmití sexualmente i embarasonan indeseá ta trece cuné. (Eclesiástes 11:10) Laga boso yunan mira den boso bida diario con amor i consideracion pa otronan ta forma relacionnan duradero.

Enfrentando e Desafio cu Exito

No laga e obsesion cu sex cu tin awendia troce bo punto di bista tocante bida i kitá bo dje oportunidad pa haña un futuro satisfaciente i felis. Meditá riba e numeroso ehempelnan di relacionnan humano den Bijbel. Bo por ta sigur cu bida i amor ta keda vibrante i significativo hopi despues dje añanan di tiener. Si bo considerá e echo aki seriamente na armonia cu e boluntad divino pa homber i muhernan cristian, e ora ei bo a pone e fundeshi pa un unidad íntimo i duradero pa dos hende enamorá.

Segun cu bo ta examiná parehanan den Bijbel manera Jacob cu Raquel, Boaz cu Rut i e hóben wardadó di carné cu e mosa sulamita, lo bo mira un elemento di atraccion sexual den nan relacion. Sin embargo, si bo lesa cuidadosamente Génesis capítulo 28 i 29, e buki di Rut i E Cantica di Sálomon, lo bo ripará cu tin otro elementonan importante cu ta enrikesé relacionnan asina.a

Aceptá Jehova Su Percuracionnan pa Bida

Jehova, e Creador dje rasa humano, ta comprendé sexualidad humano i e impulsonan enbolbí. Amorosamente, el a crea nos den su imágen, no cu “genenan promiscuo,” sino cu e capacidad pa controlá nos emocionnan na armonia cu e boluntad divino. “Esaki ta e boluntad di Dios, . . . pa boso abstené di fornicacion; pa cada un di boso sa con pa haña posesion di su mes baso den santificacion i onor, no den apetit sexual cudicioso manera e nacionnan tambe tin cu no conocé Dios; pa ningun hende yega te n’e punto di perhudicá i abusá dje derechonan di su ruman den e asuntu aki.”—1 Tesalonicensenan 4:3-6.

Na tur parti di mundu Testigonan di Jehova ta demostrá esaki. Nan ta respetá Dios su normanan haltu pa homber i muhernan cristian. Hombernan di mas edad ta ser mirá como tata, “hombernan mas hóben como ruman, hende muher di mas edad como mama, hende muher mas hóben como ruman cu tur puresa.” (1 Timoteo 5:1, 2) Ki un ambiente sano pa homber i muher hóben disfrutá di dje segun cu nan ta alcansá nan pleno potencial, sin ta strobá dor dje presion pa haci cita cu e sexo opuesto i casa prematuramente of dor di malesanan transmití sexualmente! E famia cristian activo, fortalecé dor dje congregacion cristian, ta un refugio den un mundu loco pa sex.

Dor di aplicá principionan bíblico den nan bida, hóbennan cristian ta keda liber dje obsesion pa sex i ta haña goso den presta atencion na e amonestacion duná den e Palabra di Dios: “Alegrá, hóben, den bo hubentud, i laga bo curason haci bon pa bo den bo dianan di adolesencia, i cana den e camindanan di bo curason i den e cosnan cu bo wowo ta mira. Pero sabi cu debí na tur e cosnan aki e Dios berdadero lo hibá bo na huicio. Pues kita shangrinamentu for di bo curason, i evitá calamidad pa bo carni; pasobra hubentud i flor di bida ta banidad.”—Eclesiástes 11:9, 10.

[Nota]

[Komentario na página 10]

No laga un obsesion cu sex kitá bo dje oportunidad pa haña un futuro satisfaciente i felis

[Plachi na página 9]

Hóbennan cu ta haci cos huntu cu nan famia tin ménos chens di busca intimidad sexual