Hóbennan Sa Puntra . . .

Con Mi Por Enfrentá un Malesa Grave?

JASON tabatin solamente 18 aña, pero a parce manera tur su metanan den bida tabata fuera di su alcanse awor. El a spera di sirbi tempu completo como minister cristian, pero despues el a haña sa cu e tabatin e malesa di Crohn—un defecto di tripa doloroso i debilitante. Sin embargo, awe Jason ta enfrentando su circunstancianan exitosamente.

Kisas abo tambe ta tratando cu un malesa grave. Den un edicion anterior, Spierta! a considerá e desafionan cu hóbennan manera abo ta enfrentá.a Laga nos mira awor con bo por saca lo mihó for di bo situacion.

Un Actitud Mental Positivo

Pa por enfrentá cualkier malesa exitosamente bo mester tin un actitud mental positivo. Bijbel ta bisa: “E spiritu di un homber por soportá su enfermedad; pero en cuanto un spiritu abatí, ken por want’é?” (Proverbionan 18:14) Pensamentu i sintimentunan negativo i pesimista por strobá bo di cura. Jason a haña cu esaki ta cierto.

Na promé instante, Jason mester a bringa contra sintimentunan negativo, manera rabia, cu tabata hacié masha deprimí. Kico a yuda? E ta splica: “E artículonan den E Toren di Vigilancia i Spierta! tocante depresion berdaderamente a yudá mi mantené un actitud positivo. Awor mi ta purba enfrentá solamente un dia a la bes.”b

Carmen di dieshete aña, tambe a siña mira e banda positivo di cosnan. Aunke e ta sufri di sikkelcel anemia, e ta pensa riba e bendicionnan cu e tin. “Mi ta pensa riba otronan cu ta pió cu mi i cu no por haci e cosnan cu ami por,” e ta bisa. “I e ora ei mi ta sintí mi gradicidu i mi no ta haña tantu duele di mi mes.”

Proverbionan 17:22 ta bisa: “Un curason cu ta gososo ta haci bon como sanadó.” Kisas algun hende lo por haña cu harimentu no ta na su lugá ora di enfrentá malesa grave. Pero un bon sentido di humor i compania agradabel ta refrescá bo mente i ta duná bo mas gana di biba. De echo, goso ta un cualidad piadoso, un dje frutanan di Dios su spiritu. (Galationan 5:22) E spiritu ei por yudá bo sinti goso maske bo ta luchando cu un malesa.—Salmo 41:3.

Hañando un Dokter Comprensivo

Ta masha útil pa por tin un dokter cu ta comprendé hóbennan. Por lo general e necesidadnan mental i emocional di un hóben ta diferente for di esnan di un adulto. Ashley tabatin solamente dies aña ora e mester a bai hospital p’e tratamentu di un tumor celebral maligno. Ashley su dokter a trata cuné cu compasion i a papia cuné cu palabranan cu e por a comprendé. El a conta Ashley con su mes malesa tempu e tabata mucha a motiv’é pa bira dokter. El a splica Ashley masha lief pero bon cla ki tratamentu lo e bai aplicá riba dje, pa asina Ashley sa kico pa spera.

Ta bon pa abo i bo mayornan busca personal médico cu ta respetá bo i cu ta comprendé bo necesidadnan. Si pa algun motibu bo no ta sintí bo razonablemente confortabel cu e cuido cu bo ta hañando, sintí bo liber pa bisa bo mayornan kico ta preocupá bo.

Bringa pa Bo Salú!

Ta masha importante tambe pa bo lucha contra bo malesa den tur manera posibel. Por ehempel, siña mas tantu cu bo por tocante bo condicion. “Un homber di conocimentu ta reforsá poder,” un proverbio bíblico ta bisa. (Proverbionan 24:5) Conocimentu ta kita miedu pa loke ta desconocí.

Ademas, un persona hóben bon informá por ta mas enbolbí den su tratamentu i ta den un mihó posicion pa cooperá cuné. E por siña, por ehempel, cu e no mester stop di tuma un remedi prescribí sin e recomendacion di su dokter. Carmen, mencioná ariba, a lesa bukinan tocante sikkelcel anemia, i su mayornan tambe a haci esei. Loke nan a haña sa a yuda nan obtené tratamentu médico cu por a yuda Carmen mas mihó.

Haci bo dokter preguntanan specífico—mas cu un biaha si ta necesario—si bo no ta comprendé algu bon-bon. En bes di bisa loke bo ta kere cu e dokter kier tende, splik’é francamente kico bo ta pensa i sinti. Manera Bijbel ta bisa, “plannan ta frustra caminda no tin papiamentu confidencial.”—Proverbionan 15:22.

Na dado momento Ashley no kier a papia cu ningun hende tocante su malesa. E tabata papia solamente cu su mama tocante dje. Un trahadó social sabí a puntr’é den privá: “Bo ta sinti cu kisas nan no ta bisando bo tur cos?” Ashley a confié cu sí. Di manera cu e señora a mustra Ashley su archivonan médico i a splik’é nan. Tambe el a pidi e dokternan pa dedicá mas tempu pa papia cu Ashley mes, en bes di djis papia di dje cu su mayornan. Dor di expresá su mes finalmente, Ashley por a haña e yudansa cu e tabatin mester.

Apoyo for di Esnan Rond di Bo

Ora un miembro di famia tin un malesa grave, esei ta bira un asuntu di famia i ta rekerí un esfuerso uní. E famia di Ashley i e congregacion cristian a concentrá nan energia pa apoy’é. Tempu-tempu tabata recordá e congregacion cu e tabata den hospital. Miembronan dje congregacion tabata bishit’é regularmente, i nan tabata yuda e famia cu tareanan di cas i cu cushinamentu te cu e famia por a bai bek na nan rutina normal. E muchanan den e congregacion tabata bishitá Ashley den hospital ora e no tabata muchu malu pa haña bishita. Esaki tabata bon, no solamente pa Ashley, sino tambe pa su amigunan hóben.

Pero, pa otronan duná bo yudansa, nan tin cu sa cu bo tin mester di dje. Carmen ta acudí na su mayornan i n’e ancianonan di congregacion pa apoyo emocional i spiritual. Tambe e ta conta cu esnan na scol cu ta compartí su creencianan cristian lo ta un apoyo. “Nan ta pendiente di mi,” Carmen ta bisa, “i esei ta hací mi sintí mi cuidá.”

Kisas bo scol lo por duná bo conseho médico i financiero i lo por asta ofrecé apoyo personal. Por ehempel, e maestra di Ashley tabata animá e muchanan di su klas pa skirbi Ashley i pa bishit’é. Si bo maestronan no ta comprendé e dificultadnan cu bo ta enfrentá, kisas ta necesario pa bo mayornan papia respetuosamente di bo situacion cu e autoridadnan di scol.

Usa Curpa i Mente di un Manera Sabí

Ora bo ta hopi malu, kisas bo no por haci mas cu enfocá loke bo tin ainda na energia pa bira bon. Si bo no ta totalmente debilitá, tin hopi cos constructivo cu bo por haci. Autor Jill Krementz a comentá loke el a ripará ora e tabata haciendo investigacion pa su buki How It Feels to Fight for Your Life (Con E Ta pa Lucha pa Bo Bida): “Tabata tristu pa mi pa pasa dos aña canando dor di pasiyonan di hospital i mira asina tantu mucha clabá na television. Nos tin cu animá e hóbennan aki pa lesa mas. Un cama di hospital ta un lugá excelente pa ehercé bo celebro.”

Sea cu bo ta na cas of den hospital, hopi bes lo bo sintí bo mihó si bo ehercé bo facultadnan mental. Bo a purba skirbi carta of poemanan? Pinta? Kico di siña toca un instrumento musical si bo condicion ta permití esei? Asta cu limitacionnan di salú, tin hopi posibilidad. Claro, e mihó cos cu bo por haci ta desaroyá e hábito di haci oracion na Dios i lesa su Palabra, Bijbel.—Salmo 63:6.

Si bo condicion ta permití esei, actividad físico adecuá tambe por yudá bo sinti mihó. P’e motibu aki hopi bes facilidadnan médico tin programanan di terapia físico pa pashentnan hóben. Den hopi caso ehercicio apropiado no solamente ta promové curacion físico, sino tambe ta yuda lanta bo ánimo.

No Entregá!

Ora Jesus mester a pasa den gran sufrimentu, el a haci oracion na Dios, a confia den Dje i a concentrá riba su mes futuro gososo en bes di riba e dolor. (Hebreonan 12:2) El a siña for di su experencianan doloroso. (Hebreonan 4:15, 16; 5:7-9) El a aceptá yudansa i animacion. (Lucas 22:43) El a enfocá riba e bienestar di otronan en bes di riba su mes incomodidad.—Lucas 23:39-43; Juan 19:26, 27.

Aunke bo por ta hopi malu, abo tambe por ta un fuente di inspiracion pa otronan. Pa un opstel pa scol, Abigail, e ruman muher di Ashley, a skirbi: “E persona cu mi ta admirá mas ta mi ruman muher. Maske e tin cu bai hospital i haña infuus i laga nan hink’é cu angua, tog e ta sali cu un sonrisa.”c

Jason no a pone su metanan un banda, el a djis ahustá nan un tiki. Awor su meta ta pa sirbi caminda tin mas necesidad pa predicadónan di Dios su Reino. Mescos cu den e caso di Jason, kisas abo no por haci tur loke bo ta deseá. E cos importante ta pa siña biba cu bo mes limitacionnan, pa no ta ni demasiado cuidadoso ni demasiado descuidá. Dependé riba Jehova pa duná bo e sabiduria i e fortalesa pa haci lo mihó cu bo por. (2 Corintionan 4:16; Santiago 1:5) I corda, e tempu lo yega ora cu e tera aki lo ta un paradijs, caminda “ningun residente lo bisa: ‘Mi ta malu.’” (Isaías 33:24) Sí, un dia lo bo ta salú atrobe!

[Notanan]

[Plachi na página 26]

Ruman mayó Abigail ta admirá e curashi di Ashley