Hóbennan Sa Puntra . . .

Pakico Mi Mester Ta Asina Malu?

ORA Jason tabatin 13 aña di edad, el a determiná den su curason cu un dia lo e sirbi como un minister di tempu completo na Betel, e sede mundial di Testigonan di Jehova na Brooklyn, New York. El a traha un caha di palu pa su mes i a yam’é su caha di Betel. El a cuminsá acumulá cosnan eiden cu el a pensa lo ta útil ora e cuminsá su carera na Betel.

Sin embargo, solamente tres luna despues cu el a cumpli 18 aña, Jason a ser diagnosticá cu e malesa di Crohn, of entiritis regional—un defecto di tripa doloroso i implacabel. “Esei tabata simplemente devastador pa mi,” e ta corda. “Tur loke mi por a haci tabata yama mi Tata na trabou i yora. Mi tabata sa cu, por lo ménos, el a nificá cu mi soño pa bai Betel a contra cu un obstáculo.”

Enfermedad ta un motibu básico pakico “henter e creacion ta sigui suspirá huntu i keda den dolor huntu te awor.” (Romanonan 8:22) Miyones incontabel di hóbennan ta entre e enfermonan. Hopi hóben ta bira bon despues. Pero otronan tin cu trata cu malesanan crónico of, den algun caso, malesanan mortífero. E afliccionnan cu hóbennan ta sufri di dje hopi bes ta, entre otro, asma, diabétis, sikkelcel anemia, enfermedadnan contagioso, epilepsia, enfermedad mental i cancer. Algun hóben ta biba cu mas cu un malesa.

‘Pakico Esaki Ta Pasando cu Mi?’

Hopi bes enfermedad ta causa tension mental i emocional, pa no papia mes di afliccion físico. Por ehempel, si enfermedad poné bo perde scol pa lunanan, no solamente bo ta keda atras cu bo lesnan di scol, sino tambe bo por sinti cu bo ta keda afó socialmente. Ora Sunny di 12 aña tin cu falta scol pa motibu cu cada tantu tempu e mester keda den hospital, e ta preocupá: ‘Kico mi compañeronan di klas ta haciendo? Kico mi ta perdiendo awe?’

Mescos tambe, por parce cu bo crecementu spiritual ta sufri ora bo ta muchu malu pa asistí na reunionnan cristian of asta pa lesa Bijbel. N’e punto aki bo tin mester di extra apoyo emocional i spiritual. Kisas na promé instante bo ta nenga di kere e diagnósis. Mas despues, kisas bo ta sinti hopi rabia, tal bes cu bo mes, pensando cu bo por a evitá e enfermedad un manera of otro. Kisas bo tin gana di grita, ‘Pakico Dios a laga esaki sosodé cu mi?’ (Compará cu Mateo 27:46.) Eigenlijk, ta normal pa sintí bo por lo ménos un tiki deprimí.

Ademas, un hóben por asta kere cu si e haci un esfuerso special, manera comportá su mes extra bon, Dios lo kita su enfermedad. Sin embargo, un pensamentu asina por hiba na decepcion, ya cu Dios no ta primintí di haci curacion milagroso den e tempu aki.—1 Corintionan 12:30; 13:8, 13.

Kisas bo a spera cu lo bo no tin cu muri nunca—cu lo bo ta na bida ora Dios trece “e tribulacion grandi.” (Revelacion 7:14, 15; Juan 11:26) Si ta asina, por ta un dòbel shok di haña sa cu bo tin un enfermedad mortífero. Kisas bo ta puntra bo mes si bo a haci algu pa ofendé Jehova, of kisas bo ta pensa cu Dios a scogé bo pa un test special di integridad. Sin embargo, esakinan no ta conclusionnan corecto. “Cu cosnan malu Dios no por ser sometí na prueba ni e mes no ta someté ningun hende na prueba,” e Palabra di Dios, Bijbel, ta bisa. (Santiago 1:13) Malesa i morto ta cosnan desafortuná dje condicion humano actual, i nos tur ta sometí na “tempu i suceso imprevisto.”—Eclesiástes 9:11.

Tratando cu e Miedu

Ora bo haña un enfermedad grave, esei por poné bo sinti miedu intenso pa promé biaha. E buki How It Feels to Fight for Your Life (Con E Ta pa Lucha pa Bo Bida) ta contené e comentarionan di 14 hóben cu enfermedadnan grave. Por ehempel, Anton, dies aña, tabatin miedu cu lo e muri durante un atake fuerte di asma. I Elizabeth, 16 aña, cu tabata lucha cu cancer di wesu, tabatin miedu di bai drumi i no lanta mas.

Pero algun hóben, tin otro clase di miedu—miedu cu ningun hende lo kier casa cu nan nunca of miedu cu mas despues den bida nan lo no haña yunan saludabel. Otro hóbennan tin miedu cu nan lo pega miembronan di famia cu nan enfermedad, sea cu e enfermedad ta contagioso of no.

Asta si un malesa a stabilisá su mes of ta bayendo, cu cada recaida, e miedunan ta bolbe bini ariba. Si bo a yega di sinti miedunan asina, bo sa cu nan ta masha real. Ta bon mes cu e emocionnan inicial negativo ei sa bai poco-poco cu tempu. E ora ei bo por cuminsá evaluá bo circunstancianan mas racionalmente.

E Desafio di Ta Malu

“Ora bo ta yong, bo ta sintí bo invencibel,” Jason, mencioná anteriormente, ta remarcá. “Anto, di ripiente, ser gravemente enfermo ta sagudí bo i ta saca e idea ei for di bo cabes. Bo ta sinti cu bo a bira bieu di anochi pa mainta, ya cu bo tin cu bai trankil i poco-poco.” Sí, ta un desafio pa enfrentá limitacionnan nobo.

Jason a haña cu tin un otro desafio grandi ora otronan no ta comprendé bo condicion. Jason tin loke lo bo por yama un “enfermedad scondí.” Su aparencia exterior ta tapa e problemanan cu tin paden. “Mi curpa no ta digerí cuminda manera e mester,” Jason ta splica, “di manera cu mi tin cu come hopi bes i come mayor cantidadnan cu hopi hende ta come. Sin embargo, tog mi ta keda flacu. Tambe, tin biaha mi ta bira asina cansá cu mi no por tene mi wowonan habrí den pleno dia. Pero hende ta haci comentarionan cu ta mustra cu nan ta haña cu mi ta muchu golos of ta floho. Nan ta bisa cosnan manera: ‘Bo sa cu bo por haci mihó. Bo no ta ni purba!’”

Jason tin rumannan mas chikitu cu no semper ta comprendé pakico e no por haci e cosnan cu e tabata haci promé, manera bai hunga bala cu nan pafó. “Pero ami sa cu si mi haña un herida,” Jason ta comentá, “por dura simannan promé cu mi cura. Nan sa compará mi dolor cu esun di nan anto ta bisa ‘E ta djis keha pa haña atencion.’ E pió dolor cu nan por haña ta verzwik un pia, pues simplemente nan no por imaginá con mi dolor ta.”

Si bo enfermedad ta parce di pone un carga riba bo famia, kisas bo ta lucha cu sintimentu di culpa. Kisas bo mayornan tambe ta sinti culpabel. “Tur dos mi mayornan ta kere cu tal bes ta nan a pasa e problema riba mi,” Jason ta bisa. “Generalmente muchanan ta ahustá nan mes na un enfermedad despues cu nan a aceptá e realidad di dje. Pero pa mayornan e ta mas duru. Bes tras bes nan ta pidí mi dispensa. Constantemente mi tin cu haci mi best pa purba aliviá nan sintimentu di culpa.”

Bishitanan Médico—Nada Leuk

Bishitanan constante cerca dokter por ta un fuente di ansiedad. Nan por hací bo sinti chikitu i impotente. Djis sinta den un sala di espera di hospital wardando riba bo turno por ta spantoso. “Bo ta sintí bo . . . asina bo so i lo ta dushi si bo tabatin un hende pa compañá bo,” Joseph di 14 aña ta bisa, kende ta un pashent di curason. Ta tristu pa bisa cu algun hóben no ta haña e clase di apoyo aki, ni di nan mayornan.

Testnan médico tambe por causa ansiedad. Francamente bisá, algun test por ta gewoon desagradabel. Anto, despues di esei, kisas lo bo tin cu soportá dianan of simannan di ansiedad wardando riba e resultadonan. Pero corda esaki: Tuma un test médico no ta mescos cu haci un proefwerk na scol; e echo cu bo tin un problema médico no ta nificá cu di un manera of otro bo a faya.

Si bo wak bon, un test por duna informacion hopi útil. E por mustra cu bo tin un problema médico cu por ser tratá fácilmente. Of, si no ta asina, un test por yuda mustra kico bo por haci pa biba cu e malesa. E por asta mustra cu tog bo no tin e enfermedad cu a ser sospechá. Pues, purba pa no core saca conclusionnan lihé tocante bo condicion.

Preocupá di mas lo solamente agotá bo. Bijbel ta bisa: “Preocupacion ansioso den curason di un hende ta loke lo hacié dobla.” (Proverbionan 12:25) En bes di esei, Dios ta invitá nos pa cont’é nos preocupacionnan. Nos tin cu confia cu e ta interesá den nos i cu lo e duna nos su guia i e sabiduria pa trata cu e problema dje mihó manera posibel.—Salmo 41:3; Proverbionan 3:5, 6; Filipensenan 4:6, 7; Santiago 1:5.

Nos por ta contentu cu nos Creador, Jehova Dios, a haci percuracion pa introducí un mundu nobo di husticia. Lo e asta resucitá esnan cu a muri, dunando nan un oportunidad pa disfrutá dje mundu nobo ei. Bijbel ta duna nos e siguransa cu n’e tempu ei “ningun residente lo bisa: ‘Mi ta malu.’”—Isaías 33:24.

Miéntras tantu, lo bo mester trata cu enfermedad grave. Sin embargo, tin hopi cos práctico cu bo por haci pa trata exitosamente cu bo situacion. Nos lo considerá esakinan den un futuro artículo.

[Plachi na página 26]

Kisas bo ta puntra, ‘Pakico Dios a laga esaki sosodé cu mi?’