Ora Bo Tin un Malesa Grave

“Ora dòkter a bisa mi ku mi tin kanser den mi pulmon i tripa, m’a pensa ku ta un sentensia di morto m’a kaba di haña. Pero ora mi a yega kas, m’a pensa, ‘Oké, no ta loke mi a spera, pero mi mester buska un manera pa trata ku e situashon akí.’”—Linda di 71 aña.

“Mi ta sufri di un malesa di nèrvio ku ta kousa hopi doló na banda robes di mi kara. Tin biaha, e doló severo akí ta hasi mi depresivo. Hopi biaha, mi tabata sinti mi mi so, i asta m’a pensa pa kometé suisidio.”—Elise di 49 aña.

Un hende hòmber enfermo den ròlstul ta rondoná pa su sernan kerí

SI ABO òf un ser kerí a ser diagnostiká ku un malesa ku por kousa morto, bo sa ku esei por trese hopi angustia. E problema no ta solamente e enfermedat, sino e strès emoshonal ku esei ta trese kuné. Miedu i ansiedat por oumentá debí na strès di un sita na dòkter, difikultat pa haña òf paga tratamentu i e efektonan sekundario desagradabel di remedi. E angustia mental ku un malesa grave ta kousa por bira kasi insoportabel.

Kiko por yuda nos? Hopi hende a haña konsuelo ora nan a hasi orashon na Dios i lesa e pasashinan animante den Beibel. Un otro fuente di konsuelo ta e amor i apoyo di nos famia- i amigunan.

LOKE A YUDA ALGUN HENDE

Robert, kende tin 58 aña, a bisa: “Konfia den Dios, i lo e yuda bo karga bo malesa. Hasi orashon na Yehova, i bis’é loke bo ta sinti. Pidié pa su spiritu santu. Pidié yuda bo keda fuerte pa bo famia i yuda bo karga bo malesa na un manera kalmu.

“Ta un gran yudansa ora bo tin e apoyo emoshonal di bo famia, esta, ora nan t’ei pa bo. Mi ta haña yamada tur dia di un òf dos miembro di famia ku ta puntra mi kon mi ta sinti mi. I mi ta haña animashon di amigunan ku ta biba na diferente pais tambe. Nan ta laga mi sinti mi hopi mas mihó, i esei ta yuda mi sigui lucha.”

Bo tin un amigu ku ta malu, i bo ta pensa pa bishit’é? Wak kiko Linda a bisa: “Un persona ku ta malu ke hiba un bida mas normal ku ta posibel, i kisas lo e no ke papia henter ora di su malesa. Ke men papia kuné di kosnan ku boso tin kustumber di papia ku otro.”

E forsa ku Dios ta duna nos, e konsuelo ku Beibel ta duna nos i e apoyo di nos famia- i amigunan stimá por duna nos e konfiansa ku bida ta bale la pena, asta ora nos tin un malesa grave.

Teksto di Beibel Ku Por Yuda Bo

Konfia den Dios.

“Mi a buska SEÑOR, i el a kontestá mi, i a libra mi for di tur mi temornan. E pober hende akí a sklama i SEÑOR a tend’é.”—Salmo 34:4, 6.

Linda a bisa: “Nunka mi no ta pidi den orashon pa Dios kura mi di mi malesa, sino mi ta pidi Dios pa hasi mi fuerte i pa yuda mi trata ku mi malesa.”

Lesa Beibel pa bo haña forsa.

“Ningun habitante lo no bisa: ‘Mi ta malu.’”—Isaías 33:24.

Meditá riba Dios su promesanan pa futuro. Esei lo duna bo speransa i forsa pa perseverá.

Pidi yudansa di bo famia- i amigunan.

“Un amigu ta stima tur ora bai, i [ta] un ruman [ku] ta nasí pa tempu di atversidat.”—Proverbionan 17:17.

Elise a bisa: “No isolá bo mes. Laga bo amigunan yuda bo. Tin biaha lo bo sinti ku bo ta bo so i ku ni Dios no ta skucha bo, pero no isolá bo mes.”