Pakico Asina Tantu Odio?

DJE CORESPONSAL DI SPIERTA! NA ALEMANIA

“PAKICO”—un palabra simpel, pero unu cu ta exigí un contesta. Por ehempel, e “Pakico” skirbí riba un karchi meimei di stapel di flor i teddy beer poné pafó di un scol na Dunblane, Escocia, na mart 1996. Algun dia promé, un homber a core drenta, tira 16 mucha i nan maestra mata. El a heridá vários otro i despues a tira su mes. Ta bisto cu e tabata yen di odio—pa su mes, pa otronan i pa e sociedad en general. Mayor i amigunan na luto, i tambe miyones di hende rond mundu tin e mésun pregunta: ‘Pakico? Pakico muchanan inocente ta muri asina?’

Muy probablemente bo tambe a ripará cu e mundu ta yen di odio sin sentido i sin splicacion. De echo, kisas bo mes a bira víctima di odio, pa un motibu of otro. Casi sigur abo tambe a puntra: ‘Pakico’—posiblemente mas cu un biaha.

Odio Positivo i Odio Negativo

“Odio” ta ser definí como “hostilidad i repugnancia intenso.” Naturalmente, ta bon pa sinti “hostilidad i repugnancia intenso” pa cosnan cu ta dañino of cu por ta perhudicial pa relacionnan personal. Si tur hende tabatin e clase di odio aki, berdaderamente e mundu lo tabata un mihó lugá pa biba aden. Sin embargo, ta tristu pa bisa cu hende imperfecto tin e inclinacion di odia e cosnan robes pa e motibunan robes.

Segun un definicion, odio destructivo ta basá riba prehuicio, ignorancia of malinformacion i por lo general ta ser provocá dor di “miedu, rabia of un sintimentu di ta ser perhudicá.” Siendo cu e odio aki no tin un bon motibu, e ta hiba na cos malu i hopi bes e ta lanta e pregunta: ‘Pakico?’

Nos tur conocé hende kende nan característica of custumbernan por ta iritá nos tin biaha i cu ken nos ta haña difícil pa forma un relacion. Pero iritacion ta un cos; e deseo pa haci hende un daño físico ta henteramente un otro cos. P’esei, lo por ta difícil pa nos comprendé con un persona por warda sintimentunan di odio contra gruponan completo di hende, hopi bes hende cu ni sikiera e conocé. Kisas nan tin otro punto di bista político, ta pertenecé na un religion distinto of ta di un otro grupo étnico, pero esei ta motibu pa odia nan?

Tog un odio asina ta existí! Na Africa, odio a pone e tribunan di hutu i tutsi caba cu otro na Ruanda den 1994. Esei a pone un reportera puntra: “Con asina tantu odio a acumulá den un pais asina chikitu?” Den Medio Oriente, odio tabata responsabel pa atakenan terorista dor di fanáticonan arabir i israelí. Na Europa, odio a pone cu exYugoslavia a parti for di otro. I segun un reportahe den korant, na Merca so tin “rond di 250 grupo cu ta promové odio” plamando ideanan racista. Pakico asina tantu odio? Pakico?

Odio tin raisnan asina profundo cu e ta keda asta ora e conflictonan cu el a lanta ser resolvé. Ta con otro nos por splica pakico ta asina difícil pa mantené pas i pone un paro definitivo na conflictonan armá den paisnan asotá dor di guera i plagá cu terorismo? Ta con otro nos por splica loke a sosodé despues cu e tratado di pas firmá na fin di 1995 na Paris a stipulá cu e stad di Sarajevo mester ser reuní bou dje Federacion Croata di Bosnia i Herzegovina? Debí na miedu di represaya, mayoria dje serbionan cu tabata biba einan a hui for dje stad i su suburbionan. Raportando di hendenan cu tabata sakea i kima e edificionan cu nan tabata laga atras, Time a concluí: “Sarajevo a ser uní di nobo; su pueblo no.”

Mas tantu cu hende cu ta odia otro por logra ta un pas falsu. Un pas sin balor mescos cu placa falsu. Sin nada di berdadero balor pa apoy’é, e por cai den otro bou dje mínimo presion. Pero tin asina tantu odio den mundu i asina poco amor. Pakico?

[Komentario na página 4]

Odio destructivo ta basá riba prehuicio, ignorancia of malinformacion