Odio Lo Caba un Dia?

SI BO a mira asta algun boletin di noticia na television so, bo sa caba kico ta odio. Odio ta e ingrediente comun cu ta caracterisá e masacrenan cu casi diariamente ta parce di laga nan rastro sangriente den e mundu aki. For di Belfast te na Bosnia, for di Jerusalem te na Johannesburg, mirónes desafortuná ta ser matá.

Generalmente e asaltantenan no conocé nan víctimanan. Nan único “crímen” ta cu nan tal bes ta pertenecé n’e “banda contrario.” Como un intercambio horibel, mortonan asina por ta un represaya pa algun atrocidad cometí anteriormente of un forma di “purificacion étnico” [matansa deliberá i expulsion di un grupo racial, político of cultural]. Cada ciclo di violencia ta waya e vlamnan di odio entre e gruponan hostil.

E ciclonan hororoso di odio aki ta parce di ta aumentando. Guera entre gruponan di cua e miembronan dentro di cada grupo ta famia di otro, ta cuminsando un tras di otro entre tribu, rasa, i gruponan étnico of religioso. Odio por ser eliminá un dia? Pa contestá esei, nos mester comprendé e causanan di odio, ya cu nos no a nace cu e tendencia natural pa odia.

Plantando e Simianan di Odio

Zlata Filipovic, un hobencita bosniano di Sarajevo, ainda no a siña odia. Den su ‘dagboek’ e ta skirbi na un manera elocuente tocante violencia étnico: “Mi ta sigui puntra Pakico? Pa ki motibu? Ken mester culpa? Mi ta puntra pero no tin contesta. . . . Entre mi amiganan, entre nos amigunan, den nos famia, tin serbio i croata i moslim. . . . Nos ta asociá cu bon hende, no cu mal hende. I entre bon hende tin serbio, croata i moslim, mescos cu tin mal hende tambe entre nan.”

En cambio, hopi adulto, ta pensa otro manera. Nan ta kere cu nan tin tur motibu pa odia. Pakico?

Inhusticia. Probablemente e combustibel principal pa odio ta inhusticia i opresion. Manera Bijbel ta bisa, “simpel opresion por pone un hende sabí actua como loco.” (Eclesiástes 7:7) Ora hende ta ser maltratá of brutalisá, ta fácil pa nan desaroyá odio pa cu e opresornan. I maske e por parce irazonabel, of “loco,” e odio hopi bes ta ser dirigí contra henter un grupo.

Aunke inhusticia, real of imaginá, por ta e causa principal di odio, e no ta e único. Un otro ta prehuicio.

Prehuicio. Prehuicio hopi biaha ta originá for di ignorancia tocante un cierto grupo étnico of nacional. Pa motibu di rumor, hostilidad tradicional, of un mal experencia cu un of dos individuo, algun por atribuí cualidadnan negativo na henter un rasa of nacionalidad. Unabes prehuicio a saca rais, e por ciega hende p’e echonan. “Nos ta odia algun persona pasobra nos no conocé nan; i nos lo no siña conocé nan pasobra nos ta odia nan,” e escritor ingles Charles Caleb Colton a comentá.

En cambio, políticonan i historiadornan deliberadamente por promové prehuicio pa finnan político of nacionalista. Hitler tabata un dje mihó ehempelnan di esei. Georg, un ex-miembro dje movementu hubenil di Hitler, ta bisa: “Propaganda nazista a siña nos promé pa odia e hudiunan, despues e rusonan, despues tur e ‘enemigunan dje Reich.’ Como tiener, mi a kere loke mi a ser bisá. Mas despues, mi a haña sa cu mi a ser engañá.” Mescos cu na Alemania nazista i tur otro caminda, prehuicio racial of étnico a ser hustificá dor di atraé hende na nacionalismo, un otro fuente di odio.

Nacionalismo, tribalismo i racismo. Den su buki The Cultivation of Hatred, historiador Peter Gay ta describí loke a sosodé n’e cuminsamentu dje promé guera mundial: “Den e lucha entre sintimentunan di lealtad conflictivo, nacionalismo a resultá di ta mas fuerte cu tur otro sintimentu di lealtad. Amor pa bo pais i odio contra su enemigunan a resultá di ta e racionalisacion mas potente p’e agresion cu tabata un resultado di loke a desaroyá den e siglo ei.” Sintimentu aleman nacionalista a popularisá un cantica marcial conocí como e “Himno di Odio.” Gay ta splica cu esnan cu a stimulá odio na Inglatera i Francia a inventá historianan tocante soldatnan aleman cu a violá hende muher i cu a asesiná babynan. Siegfried Sassoon, un soldat ingles, ta describí e esencia dje propaganda di guera di Inglatera: “A parce cu hende a ser creá pa mata alemannan.”

Mescos cu nacionalismo, un halsamentu excesivo di un grupo étnico of rasa por sirbi pa fomentá odio contra otro grupo étnico of rasa. Tribalismo ta sigui incitá violencia den hopi pais africano miéntras racismo ainda ta un plaga na Europa Occidental i Nort América. Un otro factor cu ta causa division cu por mescla cu nacionalismo ta religion.

Religion. Hopi dje conflictonan di mas difícil pa solucioná dje mundu tin un elemento religioso fuerte. Na Nort Irlanda, Lehano Oriente i na otro parti, hende ta ser odiá pa motibu dje religion cu nan ta kere aden. Mas cu dos siglo pasá, e autor ingles Jonathan Swift a remarcá: “Nos tin net suficiente influencia religioso pa haci nos odia, pero no suficiente pa haci nos stima un e otro.”

Na 1933, Hitler a informá e obispu di Osnabrück: ‘En cuanto e hudiunan, mi ta solamente siguiendo e mésun política cu Iglesia Católico a adoptá pa 1.500 aña.’ E mayoria dje lidernan di iglesia aleman nunca a condená Hitler su masacrenan organisá yen di odio. Paul Johnson, den su buki A History of Christianity, ta comentá cu “e Iglesia a expulsá católiconan cu a declará den nan testament cu nan a deseá pa ser cremá, . . . pero e no a prohibí nan di traha den camponan di concentracion of di morto.”

Algun lider religioso a bai mas aleu cu pordoná odio—nan a consagr’é. Na 1936, ora e Guera Civil spañó a cuminsá, Papa Pio XI a condená e ‘odio berdaderamente satánico contra Dios’ dje republicanonan—aunke tabatin pastornan católico n’e banda republicano. Di igual manera, Cardinal Gomá, e arsobispu di Spaña durante e guera civil, a declará cu ‘buscamentu di pas tabata imposibel sin lucha armá.’

No tin indicacion cu odio religioso a mengua. Na 1992 e revista Human Rights Without Frontiers a denunciá e manera cu autoridadnan dje Iglesia Griego Ortodox tabata incitando odio contra e Testigonan di Jehova. Entre hopi ehempel, el a cita e caso di un pastor griego ortodox cu a tuma accion legal contra dos Testigo di 14 aña di edad. Kico tabata e acusacion? El a acusá nan di a ‘purba hacié cambia su religion.’

E Consecuencianan di Odio

Rond mundu, e simianan di odio ta ser plantá i muhá dor di inhusticia, prehuicio, nacionalismo i religion. E fruta inevitabel ta rabia, agresion, guera i destruccion. E declaracion bíblico na 1 Juan 3:15 ta yuda nos mira e seriedad di esaki: “Tur cu ta odia su ruman ta un matador.” Siguramente, caminda odio ta florecé, pas—si e ta existí mes—ta na peliger.

Elie Wiesel, ganador di Premio Nobel i sobrebibiente di Holocausto, ta skirbi: “E deber dje sobrebibiente ta di duna testimonio di loke a sosodé . . . Bo mester spierta hende cu e cosnan aki por sosodé, cu maldad por ser desencadená. Odio racial, violencia, idolatria—ainda nan ta florecé.” E historia di siglo 20 ta duna prueba cu odio no ta un candela cu lo caba gradualmente.

E rais di odio lo ser rancá un dia for di curason di hende? Odio semper ta destructivo, of tin un banda positivo? Laga nos mira.