Un Mundu Cu A Siña Odia

HENDE ta egoista di naturalesa. I si no tene egoismo bou di control, e por bira odio. Como si egoismo natural no ta basta, sociedad humano eigenlijk ta entrená hende pa ta egoista!

Naturalmente, nos no por generalisá tur biaha, pero cierto actitudnan ta demasiado prevalente pa ser descartá como simpel abnormalidadnan. No ta asina cu hopi bes políticonan ta mas interesá pa gana eleccion cu pa yuda nan votadónan? No ta asina cu hopi bes comerciantenan ta mas interesá pa gana placa, sin escrúpulo si ta necesario, cu pa prevení productonan dañino di sali riba mercado? No ta asina cu hopi bes e clero ta mas interesá pa ta popular of pa gana placa cu pa guia nan tou den e caminda di moralidad i amor?

Cuminsando cu e Hóbennan

Ora cria yunan den un ambiente permisivo, siña ta siña nan pa ta egoista, ya cu mustra consideracion i ser inegoista ta ser sacrificá riba e altar di nan deseonan infantil. Na scol i na universidad ta siña alumnonan pa haci lo posibel pa ta number un, no solamente den puntonan di scol, sino tambe den deporte. E lema ta: “Pa bo ta na di dos lugá, bo por bien ta último!”

Weganan di video cu ta contené violencia ta siña hóbennan solucioná problemanan dje manera egoista—djis eliminá e enemigu! Un actitud cu sigur no ta promové amor! Mas cu un década pasá, e director dje departamento di salubridad público na Merca a spierta cu weganan di video ta forma un menasa pa hóbennan. El a bisa: “Tur cos ta: eliminá e enemigu. No tin nada constructivo den e weganan.” Un carta dirigí na The New York Times a remarcá cu hopi wega di video “ta satisfacé e instintonan mas baho di hende” i a agregá: “Nan ta cultivando un generacion di adolesentenan di mal genio i cu no tin cunes cu nada.” Un fanático di wega di video na Alemania tabata asina onesto pa admití cu esaki ta cierto ora el a bisa: “Ora mi tabata hunga nan, mi tabata bai den un mundu imaginario den cua e lema primitivo a aplicá: ‘Mata, si no nan ta matá bo.’”

Odio huntu cu racismo ta bira asta mas funesto. P’esei ta bisto cu alemannan ta preocupá tocante e existencia di videonan extremista derechista, den cua por mira violencia contra stranhero, specialmente contra turco. I cu bon motibu nan ta preocupá, ya cu na 1 di januari 1994, e turconan tabata forma 27,9 porciento dje 6.878.100 residentenan stranhero na Alemania.

Sintimentunan racista ta alimentá loke nacionalismo ta siña muchanan desde infancia, esta, cu no ta malu pa odia e enemigunan di bo nacion. Un ensayo di George M. Taber, un colaboradó di Time, a comentá: “Di tur e ‘ismonan’ político di historia, kisas esun mas poderoso ta nacionalismo.” El a sigui, splicando: “A drama mas sanger den su nomber cu pa cualkier otro causa, cu excepcion di religion. Pa siglonan demagogonan a instigá multitudnan fanático dor di tira e culpa di tur nan problemanan riba un grupo étnico cu ta nan bisiña.”

Hopi dje problemanan dje mundu djawe tin como causa fundamental un odio cu a existí pa hopi tempu contra otro rasa, nacionalidadnan of gruponan étnico. Anto xenofobia, miedu di hende desconocí of stranhero, ta aumentando dia pa dia. Sin embargo, ta interesante cu un grupo di sociólogo aleman a descubrí cu xenofobia ta mas notabel caminda tin poco stranhero ta biba. Esaki ta parce di duna prueba cu su causa hopi biaha ta prehuicio, i no experencia personal. E sociólogonan a haña cu “e prehuicionan cu hóbennan tin ta ser fomentá mas tantu dor di nan amigu i famianan.” En berdad, 77 porciento di esnan entrevistá, maske nan a bai di acuerdo cu e prehuicio, no tabatin ningun of masha poco contacto directo cu stranhero.

No ta difícil pa siña ta egoista, ya cu nos tur a heredá un midí di egoismo for di mayornan imperfecto. Pero ki papel religion ta hunga den e conflicto entre amor i odio?

Kico Religion Ta Siña?

Por lo general hende ta kere cu religion ta fomentá amor. Pero si ta asina, pakico diferencianan religioso ta e causa fundamental di tension na Nort Irlanda, Medio Oriente i India, pa mencioná tres ehempel so? Claro cu tin algun hende cu ta bisa cu mester tira e culpa dje disturbionan riba diferencianan político, i no riba diferencianan religioso. Esei ta un punto cu por discutí riba dje. Pero, di tur manera, ta bisto cu religion organisá no a inculcá den hende un amor cu ta suficiente fuerte pa vence prehuicionan político i étnico. Hopi creyente católico i ortodox, i esnan di otro creencianan, de echo, ta dispensá prehuicio, locual ta hiba na violencia.

No tin nada malu aden pa un hende trata na refutá e siñansa i prácticanan di un grupo religioso cu e ta haña cu ta incorecto. Pero, acaso esaki ta dun’é e derecho pa usa violencia contra e grupo aki of su miembronan? The Encyclopedia of Religion ta admití francamente: “Den historia di Cercano Oriente i Europa, hopi bes lidernan religioso a duna ordu pa atakenan violento contra otro gruponan religioso.”

E enciclopedia aki ta revelá cu violencia ta un parti integral di religion ora el a bisa: “Darwinistanan no ta e úniconan cu ta aceptá conflicto como algu necesario pa e crecementu di tantu procesonan social como sicológico. Religion a sirbi como un fuente infinito di conflicto, di violencia i, pues, di crecementu.”

No por hustificá violencia bisando cu e ta necesario pa crecementu, ya cu esaki lo bai en contra di un principio bon conocí cu Jesucristo a establecé ora apostel Pedro a purba proteh’é. Pedro “a rek su man i a saca su spada i a dal e esclabo dje sumo sacerdote i a kita su orea afó. E ora ei Jesus a bis’é: ‘Hinca bo spada bek na su lugá, pasobra tur esnan cu ta tuma spada lo perecé pa spada.’”—Mateo 26:51, 52; Juan 18:10, 11.

Actonan violento contra individuonan—sea nan ta bon of mal hende—no ta e proceder di amor. P’esei, hende cu ta recurí na violencia ta nenga nan afirmacion cu nan ta imitando un Dios amoroso. Recientemente autor Amos Oz a comentá: “Ta algu típico di fanáticonan religioso . . . cu e ‘ordunan’ cu nan ta ricibí for di Dios, ta básicamente semper e mésun: Bo mester mata. E dios di tur fanático ta parce mas bien di ta e diabel.”

Bijbel ta bisa algu casi mescos: “E yunan di Dios i e yunan di Diabel ta keda bisto mediante e echo aki: Tur cu no ta ehercé husticia no ta originá cu Dios, ni tampoco esun cu no ta stima su ruman. Tur cu ta odia su ruman ta un matadó, i boso sa cu ningun matadó tin bida eterno permanentemente den dje. Si un hende haci e declaracion: ‘Mi ta stima Dios,’ i tog ta odia su ruman, e ta un mentiroso. Pasobra esun cu no ta stima su ruman, cu el a mira, no por stima Dios, cu e no a mira. I e mandamentu aki nos tin di dje, cu esun cu ta stima Dios mester stima su ruman tambe.”—1 Juan 3:10, 15; 4:20, 21.

E religion berdadero mester sigui un patronchi di amor, locual ta encerá mustra amor asta na enemigunan. Di Jehova nos ta lesa: “E ta haci su solo sali riba hende malbado i bon i ta haci awa yobe riba hende hustu i inhustu.” (Mateo 5:44, 45; mira tambe 1 Juan 4:7-10.) Ki distinto for di Satanas, e dios di odio! E ta lok i seducí hende pa hiba un bida di libertinahe, crímen i egoismo, dje manera ei yenando nan bida cu dolor i pena. Miéntras tantu e sa masha bon cu e estilo di bida corumpí aki finalmente lo hiba na nan destruccion. Esaki ta e clase di dios cu ta merecé pa nos sirbié, unu cu no por—i evidentemente ni sikiera kier—protehá su mes siguidónan?

Miedu, Rabia of un Sintimentu di Ta Ser Perhudicá

Ta fácil pa verificá cu e factornan aki ta provocá odio. Un reportahe den Time ta bisa: “Desde e turbulento añanan ’30, ta recientemente cu e coleccion variá di movementunan derechista extremista di Europa por a bolbe probechá di asina tantu aparente bon oportunidad. . . . Debí na miedu di perde nan trabou, hende ta hañando un rabia friu contra e impotencia di gobiernunan centrista i ta haci e stranheronan meimei di nan e ‘zondeboknan.’” Den e korant Rheinischer Merkur/ Christ und Welt, Jörg Schindler a hala atencion na e dies di miles di refugiadonan político cu a basha drenta Alemania den e último dos décadanan. The German Tribune ta spierta: “Racismo ta lantando cabes den henter Europa.” E fluho di asina tantu imigrante ta crea sintimentunan di odio. Sa tende hende keha: ‘Nan ta costa nos cen, nan ta kitando trabou for di nos, nan ta un peliger pa nos yu muhernan.’ Theodore Zeldin, un miembro dje Colegio di St. Antony, Oxford, Inglatera, a bisa cu hende “ta violento dor cu nan ta sinti nan menasá of humiyá. Loke mester di atencion ta e causanan di nan rabia.”

Reportera di television británico, Joan Bakewell, ta usa palabranan apropiado pa describí nos mundu como unu cu ta siña su habitantenan odia. E ta skirbi: “Ami no ta un cristian ortodox, pero den e siñansa di Jesus mi ta reconocé un berdad absoluto i profundo: maldad ta e ausencia catastrófico di amor. . . . Mi sa cu nos ta biba den un sociedad cu ta duna poco crédito na un doctrina di amor. En berdad, un sociedad asina superficial cu e ta hala e doctrina ei un banda como ingenuo, sentimental, un utopia, i cu ta haci mofa di conceptonan di pone amor i inegoismo promé cu ganashi i interes propio. ‘Laga nos ta realista’ e ta bisa, miéntras e ta caba di cera un transaccion comercial, ta keda sin cumpli debidamente cu su obligacionnan i ta considerá e evidencia cu e ta claramente robes como di poco importancia. Un mundu asina ta producí hendenan fracasá, solitario, cu no a logra obtené e cosnan cu e sociedad ta considerá como prioridad, esta éxito, amor propio i famianan felis.”

Ta obvio cu e dios dje mundu aki, Satanas, ta siñando humanidad odia. Pero como individuonan, nos por siña stima. E siguiente artículo lo mustra cu esei ta posibel.

[Plachi na página 7]

Ta posibel cu weganan di video ta siñando bo yunan odia?

[Plachi na página 8]

E violencia di guera ta un síntoma di ignorancia i odio

[Rekonosementu]

Pascal Beaudenon/Sipa Press