Ki ora un Abeha No Ta un Abeha?

Abehanan tin un bida druk, bishitando cientos di flor tur dia i hibando néctar bek pa e cas di abeha. Ora primavera yega, abehanan machu ta bai busca un partner. Pa esaki, nan ta confia riba nan bista i olfato. Sin embargo, tin un otro pretendiente mas cu ta busca e atencion dje abeha cu no ta mira bon—e orkidia.

Den sur di Europa, tin vários orkidia shimaron. Nan fertilisacion ta dependé riba e echo cu nan ta parce un abeha hembra. E orkidianan aki tin cu manda “paketenan” di pollen pa otro orkidia. E abeha ta un transportadó ideal. Pero ya cu e orkidianan no tin nada di néctar delicioso pa atraé e abehanan, e orkidianan mester, na moda di papia, usa triki. Anto e triki ta cu e flornan ta parce i ta hole asina tantu manera un abeha hembra, cu e abeha machu ta purba par cuné! Cada especie dje orkidianan aki tin su mes disfras i aroma.

Pa ora cu e abeha realisá cu el a ekibocá, ya e orkidia a depositá caba un pakete pegahoso di pollen riba su curpa. E ora ei e abeha ta bula bai, solamente pa ser engañá atrobe dor di un otro orkidia, cu ta ricibí e pollen. Despues di vários decepcion asina, e abeha ta realisá cu e no por confia e orkidianan aki. Pa e ora ei, probablemente el a fertilisá algun flor caba.

Con e orkidianan aki, cu no por pensa a haña net e holó i aparencia pa nek e abehanan? Mecanismonan remarcabel asina ta duna testimonio di un Diseñador inteligente, kende su creacion no ta caba di asombrá i fasiná nos.