Prensa Ruso Ta Elogia Testigonan di Jehova

E FACILIDADNAN dje sucursal di Testigonan di Jehova na Rusia a ser dedicá dia 21 di juni, 1997. E compleho tin shete edificio di residencia, un Salon di Reino grandi, un comedor i un edificio inmenso pa oficina i depósito. E ta situá rond di 40 kilometer nortwest di St. Petersburg, den e pueblito di Solnechnoye.

E dedicacion a ricibí amplio publicidad via reporteronan cu a ser invitá n’e programa. Un di nan a skirbi den Literaturnaya gazeta di Moscú, un revista cu un circulacion di mas cu un cuart miyon: “E promé impresion ora bo mir’é ta: Esaki ta e manera pa hacié!”

E escritor, Sergey Sergiyenko, a splica: “Creyentenan a haci tur e trabou aki cu nan mes man: E trabou di construccion a ser hací principalmente dor di finlandes, sueco, danes, norwechi i alemannan. Camindanan limpi trahá di klenku, tereno di yerba cortá, edificionan pintoresco cu dak di panchi, bentananan inmenso i portanan di glas—esaki ta e centro administrativo p’e organisacion religioso regional na Rusia di Testigonan di Jehova.”

A invitá reporteronan for di Moscú, mas cu 650 kilometer zuidwest dje sucursal, pa e dedicacion i a percurá transporte pa nan. A duna nan un tour cu guia dor dje facilidadnan, i despues, tabatin un sesion di pregunta i contesta, durante cua a sirbi pasapalu i refresco. Basá riba loke el a mira, Sr. Sergiyenko a skirbi:

“E Testigonan ta, manera e dicho ta bisa, modesto i sin pretencion . . . Nos por cambia e famoso dicho ruso un tiki, bisando: ‘E Testigonan ta biba na [nan cas] como si fuera den brasa di Jehova.’ . . . E Testigonan ta amabel cu tur-tur hende, pero naturalmente, ta mustra interes special den nan mes rumannan.”

Un artículo skirbí dor di S. Dmitriyev a aparecé den Moskovskaya Pravda, un korant cu un circulacion di casi 400.000. Den su artículo titulá “Bo Por Traha Bo Mes Mundu Solamente cu Bo Mes Man,” e escritor a splica:

“Despues cu e organisacion religioso di e Testigonan a haña reconocimentu legal na Rusia [na 1991], e cuestion a lanta tocante e construccion di nan propio sede. Nan tabata buscando un lugá cerca di Moscú ora e informe inesperá a drenta cu e tereno di loke un tempu tabata un campamentu di vakansi cerca di St. Pete[rsburg] tabata na benta. Nan a cumpra e tereno i a cuminsá construí. . . .

Un aña i mei pasá, dia 1 di januari, 1996, e centro den e pueblito di Solnechnoye a bira un sucursal oficial dje organisacion religioso. Meimei di juni, un grupo di reportero di Moscú tabata por a busca pa sa, dor di pasa algun tempu na St. Pete[rsburg]: Ken e Testigonan di Jehova aki ta?”

Kico tabata e contesta di Sr. Dmitriyev? “Hende, mescos cu tur otro hende.” I tog, nan ta diferente, manera el a remarcá den e conclusion di su artículo: “Nan ta na pas cu nan mes, nan tin pas tur rond. Ta un soño? Sí. Anto tog e ta existí.”

Un otro reportero moscovita, Maksim Yerofeyev, cu ta skirbi pa Sobesednik, un korant cu un circulacion di mas cu 300.000, a comentá: “Tur relacion den e comunidad chikitu aki ta fundá riba e siguiente principio: No ta forsa ningun hende pa traha, i tog tur hende ta traha.”

Despues di describí e habitacion dje coordinadó dje Comité di Sucursal, Vasily Kalin, Sr. Yerofeyev a comentá: “E asociacion desconfiá di nos reporteronan kier a bishitá algun otro apartamento cu nan mes a scoge pa mira. En esencia e tamaño i mobilario dje cuarto dje otro residentenan no tabata mashá diferente for dje areglo modesto den e apartamento di Vasily Kalin.”

Un otro reportera, Anastasiya Nemets, a skirbi e artículo “Bibando na Pas cu Bo Mes.” E subtema p’e título ei den Vechernyaya Moskva tabata: “Esaki Ta Loke Hende Ta Siñando den un Pueblito Excepcional Pafó di St. Pete[rsburg].”

Describiendo e sitio i aparencia dje facilidadnan di sucursal, el a skirbi: “Tur rond tin mondi i sabana. E Golfo di Finlandia no ta leu. Aki tin cabañanan masha nechi trahá estilo europeo, camindanan limpi barí trahá cu klenku, i áreanan yen di flor colorido.

Empresanan comercial ta construí mini-stadnan asina pa ‘rusonan nobo.’ Sin embargo, den e pueblito aki hende di masha poco recurso ta biba . . . Nan ta biba dushi, i loke ta mas importante, nan ta biba manera amigunan. Tin solamente 350 hende aki, for di tur parti dje tera; bo por tende vários idioma—for di spañó i portugues te na finlandes i sueco.

En esencia, esaki ta un microcosmo cerá: E pueblito tin su mes tayernan di fabricacion i reparacion, caminda ta posibel pa prepará tur loke e famia plurilingwe tin mester; nan tin asta nan mes clínica.”

En berdad, e dedicacion tabata un ocasion hopi gososo pa e 1.492 personanan for di 42 pais cu tabata presente na Solnechnoye. Hopi di nan tabata hendenan di mas edad cu a sirbi pa décadanan ora e trabou di predicá tabata prohibí. Bo por imaginá e gran asombro i goso dje bieunan aki ora nan a haña un tour den e bunita facilidadnan situá den e alrededor parecido na hofi aki di 6,9 hectar? Ta di comprendé cu nan a sinti cu nan tabata soñando.

[Plachinan na página 18]

Reporteronan ta haña un tour den e facilidadnan di sucursal

Sesion di pregunta i contesta