E Punto Di Bista Biblico

Un Desaster Cósmico Lo Destruí Nos Tera?

DIA 12 di mart 1998, rond mundu, titularnan di korant, pantayanan di television i ‘sites’ di Internet a plama e mal noticia: “Tin un asteroide di 1,5 kilometer hanchu na caminda cu lo hera Tera.” Científico i laico a core evaluá e berdadero peliger. No a tarda muchu pa astrónomonan yega n’e conclusion cu e chens pa un impacto tabata sero.

Sin embargo, meimei di tur e bochincha, hende a bira conciente di un cos. “E cos mas remarcabel tocante e alarma falsu ta cu, pa spantoso cu e tabata, hopi hende no a hañ’é un gran sorpresa,” segun U. S. News & World Report. “Un década of mas pasá, e nocion di cu nos aki na Tera mester vigilá pa mas dje obhetonan aki, i mester planea pa haci algu tocante nan, lo tabata extravagante, pero awor científico i asta algun político ta pensa cu e menasa aki, aunke chikitu, ta unu real.”

Algun astrónomo ta kere cu rond di 2.000 obheto celestial suficiente grandi pa causa un catástrofe mundial, ta los den rutanan cu ta sea crusa e órbita di tera of ta pasa cerca di dje. Segun investigadónan, asta si unu relativamente chikitu dal den tera, e explosion lo ta ekivalente na e poder di hopi arma nuclear cu ta explotá pareu. E consecuencianan di un impacto asina lo ta catastrófico pa nos planeta i su habitantenan, tantu hende como bestia.

E opinion cu hopi bes nan ta laga afó ora di haci prediccion i cálculonan horibel asina ta esun dje Creador di universo, Jehova Dios. (Salmo 8:3; Proverbionan 8:27) Den Bijbel el a declará masha cla kico ta su boluntad i propósito pa tera i e rasa humano. Lo e permití un desaster cósmico destruí nos mundu?

Un Universo bou di Control Divino

Ya cu Jehova ta e Creador todopoderoso di universo, ta razonabel pa concluí cu e tin e abilidad di ehercé pleno control riba e forsanan cu ta goberná cuerponan celestial. Sálomon, e rey sabí, a bisa cu Jehova a “establecé shelu firmemente cu dicernimentu.” (Proverbionan 3:19) Profeta Jeremías a declará cu Dios ta “Esun kende, cu su comprendimentu, a extendé shelu.”—Jeremías 51:15.

Jehova a pone e ley i forsanan tras dje movementu dje cuerponan celestial funcioná, incluyendo strea, planeta, cometa i asteroide. (Isaías 40:26) Sin embargo, ta parce cu e ta laga e strea i planetanan pasa dor di nan ciclo natural di, na moda di papia, nace, biba i muri, sin intervení henter ora. Den esaki sa sosodé dalmentu espectacular di cuerponan celestial. Un ehempel recien ta e dalmentu na juli 1994, ora cu fragmentonan dje cometa Shoemaker-Levy 9 a dal den planeta Jupiter.

Tin evidencia geológico di barancanan grandi for di espacio cu a dal den tera promé cu tabatin hende. Pero algu asina lo sosodé un dia riba nos planeta poblá? Por ehempel, kico lo sosodé si un asteroide di 1,5 kilometer hanchu dal den tera? Astrónomo Jack Hills ta predicí cu su impacto lo desencadená un energia miyones di biaha mas potente cu e bom cu a destruí Hiroshima. Si e cai den laman, e olanan inmenso lo inundá costanan. “Caminda ántes tabatin stad,” Hills ta bisa, “lo resta solamente tereno plat yen di lodo.” E prediccion di mas pió ta e exterminacion total dje rasa humano. Con e pronóstico di fin di mundu aki ta cuadra cu e boluntad di nos Creador pa e tera? Bijbel ta mustra cu e planeta aki tin un lugá special den Jehova su propósito.

Nos Tera—Trahá pa un Propósito

Relacioná cu nos planeta, e salmista ta declará: “E shelunan, na Jehova e shelunan ta pertenecé, pero e tera el a duna n’e yunan di hende.” (Salmo 115:16) Isaías ta describí Jehova como “e Formador dje tera . . . , Esun cu a establec’é firmemente, cu no a cre’é simplemente pornada, cu a form’é asta pa ser habitá.” (Isaías 45:18) Tera ta e herencia cu Jehova a duna humanidad. I ya cu nos Creador tin pensá pa duna hende cu ta tem’é un futuro eterno, tera lo permanecé pa semper como nan hogar duradero. Salmo 104:5 ta duna nos e siguransa: “[Jehova] a funda e tera riba su lugá establecí; lo no lagu’é tambaleá te na tempu indefiní, ni pa semper.”

Ta cierto cu Dios a permití algun desaster grandi tuma lugá riba nos planeta, cu a hiba na morto di hopi hende. Algun di e catástrofenan aki—manera guera, hamber i epidemia—tabata sea den su totalidad of en parti e consecuencia di golosidad, bobedad i crueldad di hende mes. (Eclesiástes 8:9) Otronan, manera temblor, erupcion di volcan, inundacion i tormenta, tabata causá dor di fenómenonan natural cu hende no ta comprendé bon-bon ainda. Contrali na Dios su propósito original, hende no ta perfecto mas; nan ta pecaminoso. E consecuencia ta cu, como individuo, ningun di nos no por conta riba proteccion divino contra asina yamá desasternan natural.

Sin embargo, nunca Jehova no a permití pa e existencia di hende riba tera ta seriamente menasá. For di tempu cu el a crea hende, historia confirmá no ta contené ningun incidente di un catástrofe natural cu a menasá existencia di henter humanidad.a

Sobrebibencia dje Rasa Humano Ta Garantisá

For di cuminsamentu di historia humano, e propósito di nos Creador tabata pa hende “yena e tera i domin’é.” (Génesis 1:28; 9:1) El a primintí cu “e hustunan mes lo poseé e tera, i nan lo biba pa semper riba dje.” (Salmo 37:9, 11, 22, 29) Relacioná cu su promesanan, Jehova ta confirmá: “Mi mes conseho lo ser realisá, i tur loke ta mi deleite lo mi haci.”—Isaías 46:10; 55:11; Salmo 135:6.

Bijbel no ta descartá por completo e posibilidad di un calamidad terenal riba un escala chikitu causá dor di fenómenonan cósmico. Pero nos por tin sigur cu Jehova lo no permití ningun desaster cósmico stroba su propósito declará pa tera i humanidad. Riba base di promesanan bíblico, nos por tin sigur cu nos planeta lo permanecé habitabel pa semper, sí, lo e ta e hogar di humanidad te na tempu indefiní!—Eclesiástes 1:4; 2 Pedro 3:13.

[Nota]