Libertad Di Religion—⁠Bendicion of Maldicion?

Libertad Di Religion—⁠Bendicion of Maldicion?

Nacementu dje nocion di libertad di religion a bai compañá cu hopi dolor di parto den cristiandad. E tabata un lucha contra dogmatismo, prehuicio i intolerancia. El a costa miles di bida den conflictonan religioso sangriente. Kico e historia doloroso aki ta siña nos?

“PERSECUCION tabata un realidad constante den historia cristian,” segun escritor Robin Lane Fox den e buki Pagans and Christians (Pagano i Cristian). Hende a yama e promé cristiannan un secta i a acusá nan di ta un peliger pa ordu público. (Echonan 16:20, 21; 24:5, 14; 28:22) Como consecuencia, algun a ser torturá i tirá pa bestia salbahe den arenanan romano pa ser matá. En bista dje persecucion amargo aki, algun hende, manera e teólogo Tertuliano (mira su potret na página 8), a boga pa libertad di religion. Na aña 212 E.C., el a skirbi: “Ta un derecho humano fundamental, un privilegio di naturalesa, pa tur hende adorá segun nan mes conviccion.”

Na aña 313 E.C., persecucion di cristiannan na man dje romanonan e yega na un fin bou di Constantino, mediante e Decreto di Milan, cu a otorgá libertad di religion tantu na cristian como na pagano. E legalisacion di “cristianismo” den e Imperio Romano a pone un fin na e ola di persecucion. Sin embargo, rond di 340 E.C., un escritor cu a profesá di ta cristian, a boga pa persiguí e paganonan. Finalmente, na aña 392 E.C., mediante e Decreto di Constantinopla, Emperador Teodosio I a prohibí paganismo den e imperio. Asina libertad religioso a yega na un fin promé cu e por a florecé. “Cristianismo” romano tabata e religion di Estado, i Iglesia i Estado a lansa un campaña di persecucion cu a dura pa siglonan. El a alcansá su culminacion den e crusadanan sangriente di siglo 11 te cu 13 i den e crueldad di Inkisicion cu a cuminsá den siglo 12. A clasificá esnan cu a tribi di cuestioná creencianan ortodox establecí, e monopolio di dogma, como herehe i a yag riba nan den e ambiente di persiguí hende indeseá cu a reina e tempu ei. Di unda actonan asina a bini?

E excusa pa intolerancia religioso tabata cu unidad religioso tabata e fundeshi mas sólido pa Estado, i cu diferencianan religioso tabata un peliger pa ordu público. Na Inglatera, un di Reina Elisabet su ministernan a argumentá na 1602: “Estado no ta safe nunca si e tolerá dos religion.” En realidad, tabata muchu mas fácil pa persiguí esnan cu no tabata di acuerdo cu iglesia, cu busca pa sa si di berdad nan a nificá un peliger pa Estado of pa e religion establecí. The Catholic Encyclopedia ta remarcá: “Ni e autoridadnan seglar ni eclesiástico no a haci absolutamente ningun distincion entre herehe peligroso i esnan inofensivo.” Sin embargo, tabatin cambio na horizonte.

E Nacementu Doloroso di Tolerancia

E suceso cu a acelerá cambio na Europa tabata e agitacion causá dor di protestantismo, un movementu sectario cu no a laga nan caba cuné. Cu velocidad asombroso, e reformacion protestant a parti Europa den fronteranan religioso. Debí na esaki, a surgi e idea di libertad di concenshi. Por ehempel, e famoso reformadó Martin Luther, a hustificá su opinionnan na 1521, bisando: “Mi concenshi ta sometí na e Palabra di Dios.” Tambe e division a duna inicio n’e Guera di Trinta Aña (1618-48), un seri di guera religioso cruel cu a causa desaster na Europa.

Pero meimei di guera, hopi hende a bin realisá cu conflicto no tabata e manera pa bai dilanti. Pues, cu un seri di decreto, manera por ehempel e Decreto di Nantes na Francia (1598), nan a purba en bano pa establecé pas den un Europa devastá pa guera. Ta for dje decretonan aki e nocion di tolerancia cu tin awe a desaroyá poco-poco. Na principio, “tolerancia” tabatin un conotacion negativo. E famoso humanista Erasmus a skirbi na 1530: “Si bou di cierto circunstancianan nos lo mester tolerá e sectanan . . . , sin duda esei lo ta un cos maligno—anto hopi maligno mes—pero no mes malu cu guera.” Debí na e sentido negativo aki, algun hende, manera e frances Paul de Foix na 1561, a preferá di papia di “libertad di religion,” en bes di “tolerancia.”

Pero cu tempu hende a stop di mira tolerancia como un cos maligno, i a cuminsá mir’é mas bien como e protector di libertadnan. Ya nan no a consider’é mas como un debilidad cu ta hiba na compromiso, sino como un garantia. Ora a cuminsá atesorá diversidad di creencia i e derecho di pensa otro como e base di sociedad moderno, fanatismo a hañ’é ta mengua.

Na fin di siglo 18, a conectá tolerancia cu libertad i igualdad. A expresá esaki den forma di ley i declaracionnan, manera e famoso Declaracion dje Derechonan di Hende i Ciudadano (1789) na Francia, i e Carta di Derechonan (1791) na Merca. Segun cu e documentonan aki a influenciá un manera di pensa liberal for di siglo 19 padilanti, hende no a mira tolerancia, i pues libertad, como un maldicion mas, sino como un bendicion.

Libertad Relativo

Pa precioso cu e por ta, libertad ta algu solamente relativo. Bou dje pretension cu tur hende lo tin mas libertad, Estado ta pasa leynan cu ta limitá cierto libertadnan individual. Lo siguiente ta algun dje cuestionnan relacioná cu libertad cu ta ser discutí awor den hopi pais europeo: Te na ki grado legislacion gubernamental mester tin algu di bisa den hende su bida privá? Con eficas esei ta? Ki efecto e tin riba libertad?

Medionan di comunicacion a resaltá e debate riba libertadnan público i privá. A acusá algun grupo religioso di ‘brainwash,’ rancamentu di placa, abusu di mucha i un cantidad di otro crímen, hopi bes sin ningun prueba substancial. Prensa tabatin reportahenan amplio di gruponan religioso minoritario. Awendia ta usa calificacionnan degradante manera “culto” of “secta” riba un base diario. Bou di preshon di opinion público, gobiernunan a producí lista di asina yamá cultonan peligroso.

Francia ta un pais cu ta orguyoso di su tradicion di tolerancia i separacion di religion i Estado. Cu masha orguyo e ta proclamá di ta e pais di “Libertad, Igualdad, Fraternidad.” Tog, segun e buki Freedom of Religion and Belief—A World Report, den e pais ei nan a recomendá pa lansa “un campaña di educacion na scol pa fomentá un rechaso contra religionnan nobo.” Pero hopi hende ta pensa cu e tipo di accion aki ta forma un peliger pa libertad di religion. Con asina?

Peligernan pa Libertad di Religion

Berdadero libertad di religion ta existí solamente ora tur grupo religioso cu ta respetá i ta obedecé ley haña trato igual di parti di Estado. Esaki ta stop di ta e caso ora Estado dicidí arbitrariamente cua grupo religioso no ta un religion, i asina ta nenga di dun’é e bentahanan cu Estado ta otorgá na religion. E revista Time a remarcá na 1997: “E idea sagrado di libertad religioso ta zona bashí ora estado tuma riba su mes pa certificá religionnan mescos cu e ta duna shofernan rijbewijs.” Un corte di apelacion frances a declará recientemente cu esei “ta hiba, sea conciente of no, na totalitarismo.”

Libertadnan básico ta na peliger tambe ora un grupo so tin e monopolio riba medionan di comunicacion. Lamentablemente, cada bes mas, esaki ta e caso den hopi pais. Por ehempel, den un intento pa definí kico ta religiosamente corecto, organisacionnan anticulto a nombra nan mes como fiscal, hues i hurado, i a trata na imponé nan punto di bista parcial riba público via medionan di comunicacion. Sin embargo, manera e korant frances Le Monde a bisa, asina e organisacionnan aki tin biaha ta manifestá “e mésun sectarianismo cu supuestamente nan ta combatí i nan ta risca di crea un clima di persiguí hende cu nan ta haña indeseá.” E korant a puntra: “No ta asina cu stigmatisacion social di gruponan religioso minoritario . . . ta menasá libertadnan esencial?” Zeitschrift für Religionspsychologie (Revista pa Sicologia di Religion) a cita loke Martin Kriele a bisa: “E persecucion di secta ta duna mas motibu pa preocupacion cu e gran mayoria di ‘asina yamá secta i grupo di hende loco.’ Simpel bisá: Ciudadanonan cu no ta faya cu ley, mester ta lagá na pas. Religion i ideologia mester ta liber i mester keda liber, na Alemania tambe.” Laga nos considerá un ehempel.

“Ciudadanonan Ehemplar,”—Calificá Como Peligroso

Segun opinion di autoridadnan católico, citá den e korant popular di Spaña, ABC, tin un grupo religioso cu nan a calificá como “e secta mas peligroso di tur.” Cua grupo esei tabata? Kisas lo bo keda sorprendí pa sa cu ABC tabata papiando di Testigonan di Jehova. E acusacionnan contra nan tin un base imparcial i obhetivo? Tuma nota dje siguiente declaracionnan for di otro fuentenan:

“E Testigonan ta siña hende paga belasting onradamente, pa no participá den guera ni preparacion pa guera, pa no horta i, en general, pa hiba un bida cu, si otronan biba mescos, lo hiba na un mehoransa den e normanan di biba huntu den comunidad.”—Sergio Albesano, Talento, november-december 1996.

“Contrario n’e insinuacionnan cu a circulá na cierto ocasionnan, pa ami, [Testigonan di Jehova] no ta representá ni e mínimo menasa pa Estado. Nan ta ciudadanonan cu ta stima pas, ta conciencial i respetuoso pa cu autoridadnan.”—Un diputado dje parlamento di Bélgica.

“Ta masha bisto cu Testigonan di Jehova ta e hendenan di mas onesto den República Federal.”—Korant aleman Sindelfinger Zeitung.

“Lo bo por considerá [Testigonan di Jehova] como ciudadanonan ehemplar. Nan ta paga belasting diligentemente, nan ta cuida hende enfermo, nan ta lucha contra analfabetismo.”—Korant mericano San Francisco Examiner.

“Testigonan di Jehova tin mas éxito cu miembro di otro denominacionnan den mantené unionnan matrimonial stabil.”—American Ethnologist.

“Testigonan di Jehova ta entre e ciudadanonan mas recto i diligente dje paisnan africano.”—Dr. Bryan Wilson, Universidad di Oxford.

“Atrabes di décadanan, miembronan dje religion ei a contribuí masha hopi n’e expansion di libertad di concenshi.”—Nat Hentoff, Free Speech for Me—But Not for Thee (Libertad di Expresion pa Mi Sí—Pa Bo No).

“Nan tabatin . . . un contribucion hopi cla den conserbá algun dje cosnan mas precioso di nos democracia.”—Profesor C. S. Braden, These Also Believe (Esakinan Tambe Ta Kere).

Manera e citanan ariba ta indicá, Testigonan di Jehova ta reconocí na tur parti di mundu como ciudadanonan ehemplar. Ademas, nan ta conocí pa nan obra grátis di educacion bíblico i pa promové balornan familiar. Nan lesnan di alfabetisacion a yuda cientos di miles di hende, i atrabes di décadanan, nan obranan humanitario a beneficiá miles di hende, foral na Africa.

E Importancia di Obhetividad

Mundu ta yen di hende sin escrúpulo cu ta purba haci hende inocente nan víctima. Como resultado, mester paga masha tinu ora ta trata di afirmacionnan tocante religion. Pero con obhetivo i conducente na libertad religioso algun periodista ta ora cu, en bes di consultá expertonan obhetivo, nan ta dependé riba informacion for di iglesianan cu ta mira cu e cantidad di nan hendenan ta mengua of for di organisacionnan antisecta, kende nan obhetividad ta masha cuestionabel? Por ehempel, e korant cu a yama Testigonan di Jehova “e secta mas peligroso di tur,” a admití cu su definicionnan a bini for di “e expertonan di Iglesia [Católico].” Ademas, un revista frances a remarcá cu mayoria dje artículonan cu a trata cu supuesto sectanan, a originá cerca organisacionnan antisecta. Acaso esaki ta parce bo e manera mas imparcial pa haña informacion obhetivo?

Corte i organisacionnan internacional cu ta na vanguardia di derechonan humano básico, manera Nacionnan Uní, ta bisa cu “e distincion entre un religion i un secta ta muchu artificial pa ta aceptabel.” Pakico anto tin algun hende ta insistí pa usa e palabra “secta” cu tin conotacion negativo? Esei ta mas evidencia cu libertad religioso ta na peliger. Con anto por protehá e libertad esencial aki?

[Kuadro/Plachinan na página 8]

Defensornan di Libertad Religioso

Den siglo 16, gritunan elocuente na fabor di libertad di religion a lanta for dje baño di sanger di conflictonan religioso na Europa. Ainda e yamadanan aki ta relevante den e tema di libertad di religion.

Sébastien Chateillon (1515-63): “Kico ta un herehe? Mi no ta haña nada otro sino cu, pa nos, tur esnan cu no ta di acuerdo cu nos opinion ta herehe. . . . Si den e stad of region aki nan ta considerá bo un berdadero creyente, den e siguiente nan lo considerá bo un herehe.” Chateillon, famoso traductor di Bijbel frances i defensor enérgico di tolerancia, a toca un dje elementonan clave den e debate riba libertad di religion: Ta ken ta definí ken ta herehe?

Dirck Volckertszoon Coornhert (1522-90): “Nos ta lesa cu den pasado . . . asta Cristo mes den Jerusalem i despues hopi mártir na Europa . . . a perturbá hende cu nan palabranan tocante e berdad. . . . Mester definí e nificacion dje palabra ‘perturbá’ cu exactitud i claridad.” Coornhert su argumento tabata cu no mester igualá diferencia religioso cu perturbacion di ordu público. El a puntra: Di berdad esnan cu ta obedecé i respetá ley escrupulosamente ta un peliger pa ordu público?

Pierre de Belloy (1540-1611): Ta “ignorante pa kere cu diversidad religioso ta causa i fomentá tumulto den Estado.” Belloy, un abogado frances cu a skirbi durante e Gueranan Religioso (1562-98), a mustra cu e armonia den Estado no ta basá riba uniformidad religioso, a ménos cu, naturalmente, gobiernu ta subordiná na preshon religioso.

Thomas Helwys (+1550–+1616): “Si [rey] su pueblo ta súbditonan obediente i fiel na tur ley humano, e no tin nada mas di pidi di nan.” Helwys, un dje fundadónan dje baptistanan ingles, a skirbi na fabor dje separacion di Iglesia i Estado, i a urgi rey pa otorgá libertad religioso na tur iglesia i secta, i pa ta contentu cu poder civil riba hende i posesionnan. Su obranan skirbí a subrayá un pregunta actual: Con leu Estado mester bai den controlá bida spiritual di hende?

Escritor anónimo (1564): “Pa por introducí libertad di concenshi, no ta suficiente pa permití un persona keda sin practicá un religion cu e ta desaprobá, si, na mes momento, no ta permitié practicá esun cu sí e ta aprobá.”

[Plachi]

Tertuliano

Chateillon

De Belloy

[Rekonosementu]