Mantené un Punto di Bista Balansá di Música

AWE e industria musical ta un negoshi multimiyonario. Músiconan popular i nan promotornan ta gana masha hopi cen. Pero ta un echo cu bida di algun músico hopi exitoso tabata marcá pa infelicidad, morto prematuro i suicidio. Ademas tin amplio prueba cu cierto música ta corumpí hende den sentido moral, emocional i spiritual, i cu nan por hiba na comportacion violento i antisocial.

Sin embargo, ta bon pa nos tin un punto di bista balansá di música. Aunke tin hopi obra malu i perhudicial den e arte aki, tin cierto música cu por enrikesé bo bida i trece un midí di goso i contentamentu. E por stimulá nos emocionalmente i spiritualmente. Considerá djis algun ehempel.

E 150 salmonan den Bijbel ta obranan literario maestro. Nan ta poema, cantica sagrado i oracion. Awe hende ta lesa nan cu placer den cientos di idioma. Sin embargo, e hebreonan di antigwedad no a lesa e salmonan so; nan a canta nan tambe. Hopi bes nan a canta nan cu bunita acompañamentu musical, loke tabata un manera hopi poderoso di conectá e sabiduria di nan Dios, Jehova, expresá den e palabranan, cu e emocionnan cu cantantenan profesional por a compartí cu e scuchadónan. E calidad i estilo di música hebreo tabata leu di ta básico of asta primitivo. Aparentemente nan tabata di mihó calidad cu esnan dje nacionnan rond di nan e tempu ei.

Mas despues, e cristiannan di promé siglo a canta salmo i otro canticanan sagrado pa alabá Dios i pa aliviá nan emocionnan cu tabata bou di tension. Asina música a sirbi pa enrikesé nan bida. I dor di canta canticanan basá riba Bijbel, nan a graba e conocimentu di Dios, necesario pa guia nan bida, mas profundo den nan curason.—Mateo 26:30; Echonan 16:25.

E griegonan di antigwedad tabata kere cu música ta desaroyá e personalidad humano i ta haci un homber of muher mas completo. Den e mundu di siglo 20 aki, cu ta pone énfasis riba educacion den ciencia, economia i lógica, hopi bes hende ta neglishá e desaroyo dje parti emocional di nan personalidad mediante arte.

Keda Balansá

Scucha un piesa excelente por ta un experencia masha dushi i beneficioso. Pero, un hende por gosa asta mas dor di toca un instrumento musical of canta huntu cu un grupo di amigu. Conocimentu di música por habri un inmenso horizonte di berdadero deleite.

Claro, mescos cu otro cos bon di bida, den e área aki di entretenimentu tambe nos mester ta moderá, usa nos sano huicio i ser selectivo. Esaki ta e caso no solamente cu e tipo di música cu bo ta scoge, sino tambe cu e cantidad di tempu cu bo ta pasa ta scucha música of ta toca instrumento.

Si un cierto tipo di música ta cuminsá afectá bo emocion, accion i relacionnan, anto scoge otro tipo di música. Protehá bo oreanan pa asina protehá bo emocionnan pa protehá bo curason i mente!

Esaki ta foral e caso relacioná cu e letra. Nan lo por cuminsá moldea bo segun e deseonan di esnan cu no ta compartí bo punto di bista tocante bida i moralidad, i cu kisas ta promové estilonan di bida inmoral, contrali na Dios su principionan. Den algun caso asta e tema di un cantica por lanta sintimentunan robes.

E Palabra di Dios, Bijbel, ta animá esnan cu kier agrad’é pa “presentá [nan] curpa como un sacrificio bibu, santu, aceptabel na Dios, un sirbishi sagrado cu [nan] facultad di razoná.” (Romanonan 12:1) Ta bisto cu nos emocionnan ta parti dje “sacrificio bibu” ei. Pues, si un dia nos ripará cu dor dje poder di música nos emocionnan a cuminsá trubla nos sano huicio i hiba nos accionnan den mal direccion, anto ta tempu pa cambia nos custumbernan di scucha música. Corda: E poder di música por influenciá bo curason i bo mente, sea pa bon of malu!

[Kuadro/Plachi na página 10]

E Ta Aumentá e Abilidad di Siña

“Investigacion ta mustra cu ora un baby scucha música armonioso regularmente, esei por aumentá su abilidad di siña. Pero den hopi hogar, nunca nan no ta tende nada di esei.”—Audio, mart 1999.