E Punto Di Bista Biblico

Con pa Scoge un Casá

NAN A PUNTRA UN MUHER SOLTERO: “BO SA PENSA RIBA CASAMENTU?” “PENSA?” EL A CONTESTA MESORA. “MI TA PREOCUPA.”

E CONTESTA breve dje muher aki ta expresá hopi bon con fuerte algun hende su deseo pa amor i compañerismo ta. Pa hopi hende, haña un casá ta un dje cosnan mas importante den bida. P’esei, rond mundu tabatin un aumento rápido di servicionan diseñá pa yuda hende haña un casá. Sin embargo, den hopi parti di mundu, e cantidad di matrimonio cu ta fracasá ta surpasá esnan cu tin éxito.

Den paisnan occidental ta comun pa un hende scoge su mes casá. Na otro banda, den algun parti di Asia i Africa, ainda ta existí e custumber di scoge casá pa yunan. Den ámbos caso, no mester trata e proceso aki como algu leve. Masha tiki otro decision cu un hende ta tuma den bida tin asina un potencial pa trece felicidad of tristesa. Un matrimonio amoroso por ta sumamente enrikesedor i satisfaciente. Pero por lo contrario, un union yen di pleitu por ta un fuente constante di dolor i stres.—Proverbionan 21:19; 26:21.

Mescos cu tur otro hende, cristiannan berdadero kier pa nan union matrimonial trece goso i contentamentu. Pero tambe nan kier agradá Dios i onr’é. (Colosensenan 3:23) Dios, como e Creador i Originador di matrimonio, sa di experencia kico nos berdadero necesidadnan ta, i kico ta mihó pa nos. (Génesis 2:22-24; Isaías 48:17-19) Ademas, atrabes dje miles di añanan di existencia humano, el a mira miyones i miyones di matrimonio, bon i malu. E sa kico ta duna resultado i kico no. (Salmo 32:8) Mediante su Palabra, Bijbel, e ta describí principionan cla i concreto cu por yuda cualkier cristian haci un scogementu basá riba conocimentu. Cua ta algun dje principionan aki?

Wak Mas Ayá cu Aparencia Físico

Na paisnan cu hende ta liber pa scoge ken nan lo casa cuné, sea nan ta topa un posibel partner casualmente, of amigu i famia ta introducí nan na otro. Hopi bes, atraccion físico ta loke inicialmente ta lanta e interes romántico. Aunke esaki sigur ta un incentivo natural i poderoso, Bijbel ta animá nos pa wak mas leu cu aparencia so, ora nos ta pensa riba matrimonio.

“Encanto por ta falsu, i bunitesa por ta bano; pero e muher cu ta teme Jehova ta esun cu ta percurá alabansa pa su mes,” segun Proverbionan 31:30. Apostel Pedro a papia tocante “e bistí incoruptibel dje spiritu ketu i suave, cu ta di gran balor den bista di Dios.” (1 Pedro 3:4) Sí, e cualidadnan spiritual di un prospectivo casá—esta, e persona ei su debocion na Dios i su amor pa Dios i tambe su personalidad cristian—ta hopi mas importante cu bunitesa físico. Ta esencial pa tuma tempu pa scoge den un forma obhetivo, i scoge un persona cu ta compartí e mésun metanan spiritual cu bo i cu tambe ta haciendo esfuerso pa desplegá e frutanan di Dios su spiritu. Esaki lo contribuí masha hopi mes na un union matrimonial felis.—Proverbionan 19:2; Galationan 5:22, 23.

‘Casa Solamente den Señor’

Ta masha importante pa abo i e persona cu ken bo kier casa tin e mésun meta i creencianan. Matrimonio ta un berdadero desafio, i e ta rekerí hopi ahuste den conducta i actitud di tur dos casá. Ta lógico anto cu mas cos bo tin en comun caba cu bo prospectivo casá, mas fácil e ahustenan ei lo ta.

Esaki ta yuda nos mira pakico apostel Pablo a consehá cristiannan pa evitá di bira “uní bou di yugo desigual cu incrédulonan.” (2 Corintionan 6:14) Pablo tabata sa cu casa cu un hende cu no ta compartí e mésun fe i comprendimentu di principionan bíblico por crea conflicto i desacuerdo. E amonestacion pa ‘casa solamente den Señor,’ ta razonabel. (1 Corintionan 7:39) E ta reflehá Dios su manera di pensa. Esnan cu sabiamente ta obedec’é, ta evitá hopi complicacion i problema serio.—Proverbionan 2:1, 9.

Ora Mayornan Ta Scoge Casá pa Nan Yunan

Ki tal di áreanan caminda ainda ta e custumber pa mayornan scoge casá pa nan yunan? Por ehempel den parti zuid di India, segun cálculo, den 80 porciento di tur matrimonio ta e mayornan a scoge e casánan. Sea cu mayornan cristian ta sigui e tradicion aki of no, ta un asuntu di decision personal. En todo caso, e areglo ei di scoge casá pa bo yu lo tin éxito ora balornan spiritual ta predominá.

Esnan cu ta na fabor di scoge casá pa yu, ta sinti cu esaki ta pone e proceso di tuma decision den man di personanan experenciá i maduro. Un anciano cristian na Africa ta comentá cu “tin mayor ta haña cu debí na nan yunan su edad i falta di experencia, no por stèns cu nan por evaluá corectamente e madures spiritual di un prospectivo casá.” Un minister biahero di India ta agregá: “Hóbennan no tin experencia den bida i nan por tuma decisionnan emocionalmente.” Ya cu mayornan conocé e caracter di nan yunan mihó cu cualkier otro hende, nan ta sinti cu nan ta den un posicion único pa haci un scogementu sabí pa nan yunan. Tambe lo ta sabí di nan parti pa tene cuenta cu e puntonan di bista dje yoncuman of dje mucha muher.

Sin embargo, ora mayornan ta ignorá principionan bíblico, na final di cuenta nan por bin haña nan cu e repercusionnan si e matrimonio tin problema despues. Como cu hopi bes tin poco chens pa di antemano e prospectivo casánan siña conocé otro bon, por bini problema. I ora problema bini, segun un tata cristian na India, “e tendencia ta di tira falta riba e mayornan.”

Mayornan cristian cu ta scoge casá pa nan yunan, mester considerá tambe e asuntu di motivacion. Ora metanan materialista of un deseo pa prestigio ta dominá e scogementu di un casá, ta surgi problema. (1 Timoteo 6:9) P’esei, esnan cu ta scogiendo e casá mester puntra nan mes: ‘E casá cu mi a scoge ta pa sigurá e felicidad i salú spiritual di tur dos partido? Of mas bien, ta pa mehorá e posicion of rikesa dje famia of pa saca un beneficio financiero?’—Proverbionan 20:21.

E conseho di Bijbel ta cla i beneficioso. Ora ta considerá un persona pa casa cuné, loke semper mester ta e preocupacion principal ta e birtud i spiritualidad dje prospectivo casá, sin importá ken ta scog’é. Ora haci esaki, nos ta onra Jehova Dios, e Autor dje areglo di matrimonio, i esnan cu ta bai casa por cuminsá cu un base spiritual sólido. (Mateo 7:24, 25) Esaki lo contribuí masha hopi mes na un union felis i enrikesedor.