Hobennan Sa Puntra . . .

Con Mi Por Ta Mas Sociabel?

“Nunca mi no tabata un hende cu ta combersá mashá. Mi a pensa cu si mi bisa algu, hende lo hala pia fo’i mi. Mi mama ta masha tímido, i mi ta kere cu ta p’esei mi tambe ta asina.”—Artie.

BO SA deseá di ta ménos tímido, i un tiki mas amigabel i sociabel? Manera nos artículo anterior den e seri aki a indicá, timides ta un característica comun.a Pues no tin nada ègt robes cu bo si bo tin tendencia di ta ketu, serio of reservá. Pero timides extremo sí por ta un problema. Lo ménos cu e por haci ta stroba bo di forma amistad. Tambe e por haci difícil pa bo sinti bo cómodo of funcioná bon den ambiente social.

Asta adultonan hopi bes ta lucha contra timides. Barryb ta un anciano den e congregacion cristian. Pero e tin tendencia di klap cera ora e ta den un grupo. E ta admití: “Mi no ta sinti cu mi tin e abilidad di bisa nada cu ta significativo.” Su esposa Diane, tin un problema similar. Con e ta solucion’é? Diane ta bisa: “Mi ta gusta ta cu hende sociabel, pasobra mi ta sinti cu nan por tuma e combersacion over.” Cua ta algun manera cu abo mes por bira mas sociabel?

Stop di Menospreciá Bo Mes

Promé, bo tin cu reevaluá e manera cu bo ta mira bo mes. Bo ta menospreciá bo mes constantemente, bisando bo mes cu otro hende lo no gusta bo of cu bo no tin nada di bisa cu ta bale la pena? Si bo tin sintimentunan negativo tocante bo mes, esei por stroba bo so di ta sociabel. Corda, Jesus a bisa: “Bo tin cu stima bo próhimo mescos cu bo mes”—no en bes di bo mes! (Mateo 19:19) Pues ta sano i na su lugá pa stima bo mes te na un grado razonabel. Esei por duna bo e confiansa cu bo mester pa por acercá otro hende.

Si bo ta sufri dje sintimentu cu bo no ta bal nada, lo ta bon pa bo lesa capítulo 12, “Pakico Mi No Ta Gusta Mi Mes?,” for dje buki Loke hovenan sa puntra—Contesta práctica.c E informacion ei por yuda bo mira cu bo tin cualidad i abilidadnan cu ta haci bo atractivo i balioso. Wel, e echo cu bo ta un cristian ta demostrá cu Dios ta mira algu balioso den bo! Ata Jesus a bisa: “Ningun hende por bini cerca mi a ménos cu e Tata, kende a manda mi, ta atra’é.”—Juan 6:44.

Mustra Interes den Otro Hende

Proverbionan 18:1 ta spierta: “Un persona cu ta isolá su mes lo busca su mes anhelo egoista.” Sí, ora bo ta apartá bo mes, probablemente lo bo enfocá demasiado riba bo mes. Filipensenan 2:4 ta animá nos pa ‘no vigilá cu interes personal nos mes asuntunan so, sino tambe cu interes personal den asuntu dje otronan.’ Ora bo ta enfocá riba interes i necesidadnan di otro hende, bo ta ménos tímido. I mas bo interesá den otronan, mas probabel ta cu lo bo ser impulsá pa tuma e iniciativa pa siña conocé nan.

Por ehempel, tuma Lidia, un señora cu a bira conocí como símbolo di un hende amigabel i hospitalario. Bijbel ta conta nos cu despues cu el a tende e palabranan di apostel Pablo i a ser bautisá, el a roga Pablo i su compañeronan: “Si boso a husga cu mi ta fiel na Jehova, drenta den mi cas.” (Echonan 16:11-15) Aunke Lidia tabata un creyente nobo, el a tuma e iniciativa pa siña conocé e rumannan aki, i el a ricibí sin duda hopi bendicion como resultado. Despues cu Pablo i Sílas a sali for di prizon, unda nan a bai? Ta interesante pa nota cu nan a bai bek n’e cas di Lidia!—Echonan 16:35-40.

Mescos bo tambe lo ripará cu mayoria hende lo reaccioná bon n’e interes cu bo mustra den nan. Con bo por cuminsá haci esaki? Ata’ki un par di sugerencia práctico.

● Cuminsá cu cos chikitu. Ser sociabel no kier men bira un hende extravagantemente amigabel of hopi druk cu actividadnan social. Haci un intento pa papia cu personanan individual, cada biaha un hende. Bo por pone e meta di cuminsá un combersacion cu por lo ménos un persona cada biaha cu bo asistí na un reunion cristian. Purba smile. Tren wak hende den nan cara.

● Superá e drempel di cuminsá un combersacion. Por ta bo ta puntra: ‘Con?’ Wel, si di berdad bo ta interesá den otro hende, por lo general no ta difícil pa haña algu pa papia di dje. Un hóben na Spaña cu yama Jorge ta bisa: “Mi a ripará cu djis puntra otronan con ta bai cu nan of puntra nan tocante nan trabou ta yuda bo siña conocé nan mihó.” Un hóben cu yama Fred ta sugerí: “Si bo no sa kico pa bisa, djis cuminsá haci hende pregunta.” Claro cu bo no kier pa hende sinti cu nan ta ser interogá. Si ta parce cu un persona no kier contestá pregunta, purba compartí algun informacion tocante bo mes.

Mary, mama di un tiener, ta bisa: “Mi a ripará cu e mihó manera pa laga hende sinti nan mes cómodo ta dor di laga nan papia tocante nan mes.” E hóben Kate ta agregá: “Loke ta yuda ta di duna hende compliment riba nan bistí of algu otro. Bo ta laga nan sinti cu bo gusta nan.” Di mes, bo mester men loke bo bisa i evitá labiamentu. (1 Tesalonicensenan 2:5) Por lo general hende lo reaccioná riba palabranan sincero cu ta bondadoso i agradabel.—Proverbionan 16:24.

● Sea un bon scuchadó. Sea “lihé pa tende, slow pa papia,” Bijbel ta bisa. (Santiago 1:19) Al fin i al cabo, un combersacion ta un intercambio, no e actuacion di un solo hende. Pues, si bo tin tendencia di ta tímido pa papia, esei eigenlijk por ta na bo bentaha mes! Hende ta apreciá bon scuchadó.

● Djoin otro combersacion. Despues cu bo siña dominá e arte di combersá cu un solo persona, e siguiente paso ta papia den un grupo di hende. Atrobe, reunionnan cristian ta un lugá ideal pa adkerí e abilidad aki. Tin biaha e manera mas fácil pa enbolbé bo den un combersacion ta dor di djoin unu cu ya ta tumando lugá. Claro cu ta esencial pa demostrá dicernimentu i bon manera. No bula drenta un combersacion cu obviamente ta tocante algu privá. Pero ora ta bisto cu un grupo ta den un combersacion cu no ta pisá, purba hinca bo mes den e combersacion. Mustra tacto; no interumpí i purba tuma control. Trata na scucha un ratu. Ora bo ta sintí bo cómodo, bo por dicidí di duna un par di comentario.

● No verwagt perfeccion di bo mes. Tin biaha hóbennan ta preocupá muchu tocante bisa algu robes. Un mucha muher na Italia cu yama Elisa, ta corda: “Semper mi tabatin miedu cu si mi a bisa algu, e ta sali robes.” Sin embargo, Bijbel ta recordá nos cu nos tur ta imperfecto, pues gewoon nos no por tin abla perfecto. (Romanonan 3:23; compará cu Santiago 3:2.) Elisa ta bisa: “Mi a realisá cu esakinan ta mi amigunan. Pues nan lo comprendé si mi bisa algu robes.”

● Mantené bo sentido di humor. Ta cierto cu ta bergwensa ora bo mete la pata. Pero manera Fred ta comentá, “si bo djis relax i hari bo mes, e momento ta pasa unbes. Bo mes ta haci di un pieu un baca ora bo permití bo mes bira nervioso, frustrá of tur preocupá.”

● Tene pacenshi. Realisá cu no ta tur hende lo reaccioná mesora. Un silencio incómodo durante un combersacion no necesariamente kier men cu e persona no gusta bo of cu bo tin cu stop di purba papia. Tin biaha hende su cabes ta simplemente preocupá cu otro cos, of nan ta tímido mescos cu bo. Den situacionnan asina, loke por yuda ta si bo duna e persona un poco mas tempu p’e sintié cómodo cu bo.

● Purba papia cu hende grandi. Tin biaha hende grandi, foral cristiannan maduro, ta hopi bondadoso cu hóbennan cu ta lucha contra timides. P’esei no tene miedu di cuminsá un combersacion cu un persona mas grandi. Kate ta bisa: “Cerca hende grandi mi por relax pasobra mi sa cu nan lo no husga mi, ni haci bofon di mi, ni criticá mi of pone mi pasa bergwensa manera muchanan di mi mes edad.”

Motivá pa Amor

Aunke e sugerencianan aki por yuda, no tin un fórmula fácil pa vence timides. A lo largu, no ta djis un asuntu di aplicá un técnica of procedura sabí. E clave pa vence timides ta “stima bo próhimo mescos cu bo mes.” (Santiago 2:8) Sí, siña mustra interes den otro hende, foral den bo rumannan cristian. (Galationan 6:10) Si bo tin berdadero amor den bo curason, lo bo superá miedu i insiguridad i haci un esfuerso pa haci contacto cu otro hende. Manera Jesus a bisa, “for dje abundancia di curason e boca ta papia.”—Mateo 12:34.

Barry, mencioná na principio, ta comentá: “Mas mi siña conocé otro hende, mas fácil ta pa mi papia cu nan.” Cu otro palabra, mas bo practicá pa ta sociabel, mas fácil esei lo bira pa bo. I segun bo ta cera amistadnan nobo i ta sinti bo mas aceptá dor di otronan, lo bo sinti sin duda cu e resultadonan tabata bal e esfuerso!

[Notas]

[Plachi na página 23]

Tuma e iniciativa i djoin den combersacion!