Capítulo 15

Pakico mi tin tanto ripara?

“TUR HENDE ta bisámi ki bonita mi tá,” segun un jufrow den remetido pa curant. Sin embargo, el a sigi bisa: “Mi tin un problema di papia cu hende. Si mi ta wak den wowo di hende ora mi ta papia, mi cara ta cambia color i mi garganta ta cera . . . Na trabao mi a tende varios comentario tocante ki ‘orguyoso’ mi tá pasobra mi no ta papia cu ningun hende. . . . Mi no ta orguyoso, mi simplemente tin ripara.”

Un encuesta a mustra cu 80 porciento di esnan investigá tabatin ripara na un tempo durante nan bida, i 40 porciento a considera nan mes di tin ripara ainda. En berdad, ripara ta un cos común pa humanidad desde e tempo di mas antigua. E Bijbel ta bísanos cu Moisés cu ripara a nenga di actua como portaboz di Dios dilanti dje nacion di Israel. (Exodo 3:​11, 13; 4:​1, 10, 13) Ta parce, també, cu e disípel cristian Timoteo tabatin ripara i timidez en cuanto papiamento i ehercicio correcto di su autoridad.​—1 Timoteo 4:12; 2 Timoteo 1:​6-8.

Loke ta ripara

Ripara ta e sintimento di intrankilidad dilanti hende: hende straño, hende cu autoridad, hende dje otro sexo, of asta hende igual cu bo. Esei ta ora bo ta sintíbo extremamente consiente di bo mes i tal sintimento ta afecta su víctima di varios manera. Algun ta sinti bergüenza; cu wowo abao i curazón batiendo, nan ta bira gago. Otronan ta perde dominio i ta cuminza papia sin fin. Otronan ainda ta haya cu ta dificultoso pa papia i expresa nan opinion of preferencia.

Pero, realmente tin aspecto positivo di tene un midí di ripara. Esei ta relacioná cu modestia i humildad, i un cos cu Dios ta busca i ta encomenda ta di ‘ser modesto camnando cuné.’ (Miqueas 6:8) Tin otro beneficio di parce discreto i no halzá, di no ser dominante i demasiado agresivo. Hende cu tin ripara hopi bez ta ser calificá como un bon scuchador. Pero ora ripara ta frena i ta stróbanos di cumpli cu nos plena potencial i ta perhudica nos relacion cu otro hende, nos trabao, i nos sintimento, ta ora pa haci algo tocante dje!

Un bon principio ta di comprende e problema. (Proverbio 1:5) Ripara no ta bisa loke bo tá; sino ta splica bo actuacion, bo reaccion na cierto situacion, e modelo cu bo a siña i a reforza den experencia cu otro hende. Bo ta pensa cu otro hende ta haci huzgamento negativo di bo, cu nan no ta gustábo. Bo ta pensa cu otro hende ta mihor cu bo of ta mas normal cu bo. Bo ta pensa cu cos lo sali completamente malu si bo ta purba di relacionábo cu otro hende. Bo ta spera pa tur cos bai malu, i esei ta sosode hopi bez​—pasobra bo ta bira stijf i ta anda conforme cu loke bo ta pensa.

Con ripara ta afecta bo bida

Door di alehábo, sin papia, of keda tanto preocupá tocante bo mes cu bo no ta presta atencion na otro hende, bo por duna e impresion di cu bo ta orguyoso, poco amistoso, fastioso, of asta no tin cu nes of ta ignorante. Ora bo ta pensa solamente di bo mes, ta difícil pa concentra riba conbersacion cu otro hende. Pues, bo ta presta menos atencion ne informacion cu bo ta recibi. Anto loke bo tin mas miedu di dje ta sosode​—bo ta parce bobo.

En efecto, bo a cera bo curpa tras di muraya di prisón di ripara i a tira e yabi afó. Bo ta laga oportunidad pasábo forbij. Bo ta acepta artículo of situacion cu bo realmente no kier​—tur esei pasobra bo tin miedu di papia i expresa bo opinion. Bo ta perde e gozo di conoce hende i haya amigo nobo of di haci cosnan cu por mehora bo bida. Pero otro hende ta perde també. Nan nunca ta yega di conoce bo mes propio.

Vence ripara

Cu tempo i esfuerzo, conducta por cambia. Primeramente, bandona preocupacion tocante si otro hende ta calificábo. Probablemente nan ta mucho ocupá pensando di nan mes i loke nan lo bisa i haci. I si otro hende ta haci co’i infantil i ta tene mofa di bo, comprende cu e tin problema. “Ken cu ta desprecia nan próhimo ta falta comprendimento.” (Proverbio 11:​12, Version Moderna) Hende cu ta bale la pena como amigo no ta huzga segun aparencia externo sino segun e clase di persona cu bo  ta.

Además, purba di pensa positivamente. Ningun hende ta perfecto; nos tur tin nos fortaleza i nos debilidad. No lubida, tin diferente manera pa considera cosnan, tin diferente gusto i disgusto. Diferencia di opinion no kier men cu hende ta rechazábo como un persona.

Siña també di huzga otro hende cu husticia. Un hoven cu tabatin ripara a bisa: “Mi a descubri dos cos tocante mi mes . . . Promé, mi a concentra mucho riba mi mes. Mi a pensa mucho hopi riba mi mes, preocupá en cuanto loke hende a pensa tocante loke mi a bisa. Segundo, mi tabata asigna mal intencion na otro hende​—sin confiánan i pensando cu nan lo menospreciámi.”

E hoven a asisti na un reunion di Testigo di Jehova. E ta corda cu: “Mi a tende un discurso ei cu realmente a yudámi.” ‘E orador a bisa cu amor ta optimista; cu si bo tin amor bo ta pensa lo mihor tocante hende, no lo pior. Asina mi a siña di no asigna mal intencion na hende. Mi a bisa mi mes: “Nan tin comprendimento, nan ta bondadoso, nan ta mustra consideracion.” Mi a cuminza confia hende. Mi a realiza cu algun lo huzgámi erróneamente, pero awor mi a realiza cu esei tabata nan problema.’

“Mi a siña també dje necesidad di cuminza mustra amor na moda activo​—pa extendémi mas pa inclui otronan.” El a splica, “Mi a purba esei promé cu hende mas hoven. Despues mi a cuminza bishita otro hende den nan cas. Mi a siña tuma na cuenta nan necesidad, pa pensa con mi por yúdanan.” Asina el a siña e berdad dje conseho di Jesús den Lucas 6:​37, 38: “No huzga, i boso di ningun manera lo ser huzgá; i no condená, i boso di ningun manera lo ser condená. . . . Practica dunamento, i hende lo duna na boso. . . . Pasobra cu e midí cu locual boso ta midi, nan lo midi pa boso en buelta.”

Haci comienzo

Pues, siña di ser sociable​—pa bisa “con bai” i cuminza un conbersacion. Esei por ta tanto senciyo como un comentario tocante bientu i solo. No lubida: Bo tin solamente 50 porciento dje responsabilidad. E otro mitá ta depende dje otro persona. Si bo ta haci fout den bo papiamento, no sintíbo condená. Si otro hende ta hari, siña hari cu nan. Bisa, “Esei no a sali mucho bon” i esei por yudábo trankilizábo i bo por sigi cu e conbersacion.

Bistíbo na paña cómodo, pero percura pe ta limpi i stricá. E sintimento di cu bo aparencia ta lo mihor por minimiza bo ansha tocante esei i haci posibel pa bo concentra riba e conbersacion ne momento ei. Para recto​—pero keda trankilu. Usa expresion agradabel riba bo cara i sonrisa. Mantene contacto amistoso di wowo i yanga cabez of reconoce verbalmente loke e otro persona ta bisa.

Ora un situacion dificultoso ta enfrentábo, tal como dunamento di discurso dilanti hende of entrevista pa empleo, yega tanto prepará posibel. Practica di antemano loke bo tin pa bisa. Tal práctica por vence of minimiza problema cu papiamento. Esei ta exigi tempo, mescos cu tempo ta necesario pa bira capaz den cualkier otro cos. Pero, ora bo ta mira resultado positivo, esei por animábo mas pa logra.

No pasa por halto dje yudanza cu Dios por duna. Saul, e promé rey dje nacion di Israel di antigua, tabatin ripara doloroso na principio. (1 Samuel, capítulo 9 i 10) Pero, ora e tempo a yega pa accion, “e spiritu di Dios a cuminza obra den Saul,” i el a hiba e pueblo na victoria!​—1 Samuel, capítulo 11.

Awe, hovenan cristian tin e responsabilidad di yuda otro hende siña di Dios i di su mundo nobo di husticia cu el a priminti. (Mateo 24:14) Hibando e bon nobo i representando e Autoridad di mas halto di universo siguramente ta inspira confianza den bo mes i yudábo kita bo atencion for di bo mes. Pues, bo por keda sigur cu si bo ta sirbi Dios fielmente, lo e bendicionábo i yudábo vence bo ripara.

Pregunta pa consideracion Capítulo 15

◻ Exactamente kico ta ripara, i con hende cu tin ripara ta comportánan den presencia di otronan? Esei ta cierto di bo, te na un grado?

◻ Pakico hende cu tin ripara ta perde confianza ora nan ta den presencia di otro hende?

◻ Con ripara por haci hende sufri di pérdida?

◻ Menciona algun manera pa vence ripara. Algun sugerencia ei a dunábo bon éxito?

[Komentario na página 121]

Hende cu ripara ta perde amistad i oportunidad

[Kuadro na página 124]

Bo por vence ripara door di:

Deseá di cambia i kere cu tal cambio ta posibel

Reemplaza pensamento negativo cu accion positivo

Pone meta realista i significativo pa bo mes

Sa con pa trankilizábo i enfrenta ansha

Ensayá un situacion di antemano

Recobra confianza via experencia progresivamente exitoso

Corda cu tin diferencia di opinion i cu algun ta incorrecto també

Practica pa aumenta bo capacidad i siña di bira mas capaz

Forza pa mustra amor i yuda otro hende

Bisti paña cu tin bon gusto i actua cu confianza

Depende dje yudanza cu Dios ta duna

Bira enbolbí den reunion cristian i den participacion di bo fe cu otronan

[Plachi na página 123]

Hende cu ripara ta imaginánan cu otro ta menospreciánan

[Plachi na página 125]

Siña ser sociable, duna sonrisa, cuminda otro hende, i tene conbersacion