Bo Ta un Persona Tímido?
1 No ta un sorpresa pa nos ora un mucha chikitu ta loer nos pará tras di su mama of tata. Timides ta algu natural den infancia. Asta como adulto, tin hopi hende cu ta un poco tímido di naturalesa. Kico bo por haci si timides ta afectá bo participacion den e ministerio?
2 Con pa Trata cu Timides: Ta importante pa duna atencion na “e persona secreto di curason.” (1 Ped. 3:4) Fortalecé bo amor pa Jehova i pa bo próhimo. Sea plenamente convencí cu cumpli cu e comision di predicá ta un dje mihó maneranan pa demostrá amor di sacrificio propio. Sigui un bon rutina di studio personal i asistencia na reunion. Haci oracion regularmente i pidi Jehova specíficamente p’e yuda bo. Fe fuerte i confiansa den Jehova lo edificá bo confiansa propio i duna bo “asta mas curashi ainda pa papia e palabra di Dios sin miedu.”—Fil. 1:14.
3 Lucha contra e sintimentu cu bo no ta suficiente bon. Ta parce cu Timoteo mester a haci esaki. Pablo a anim’é pa “no laga ningun hende nunca menospreciá [su] hubentud,” i a cord’é cu “Dios a duna nos no un spiritu di cobardia, sino esun di poder.” (1 Tim. 4:12; 2 Tim. 1:7) Jehova a usa Timoteo plenamente, i lo e usa abo tambe si bo sigui padilanti cu pleno confiansa den Dje.—Sal. 56:11.
4 Refleccioná riba un texto bíblico, manera por ehempel Mateo 10:37, a yuda un ruman muher cu dor di timides tabatin miedu di su casá cu tabata opon’é. Segun cu el a perseverá, e ministerio a bira mas fácil p’e, i cu tempu su casá, mama i ruman hombernan tur a aceptá e berdad!
5 Preparacion Ta Esencial: Bo confiansa propio lo aumentá mas ora bo prepará cabalmente p’e ministerio. Scoge un presentacion simpel for dje buki Razonamentu of for di edicionnan bieu di Nos Ministerio di Reino, siñ’é for di cabes i train e. En bes di crea ansiedad innecesario, pensa den un forma positivo. Haña curashi dor di traha estrechamente cu otronan. Tene na mente cu hopi dje hendenan cu bo ta bai topa na porta ta tímido mescos cu bo. Tur hende tin mester dje mensahe di Reino.
6 Si bo ta tímido, no desesperá. Segun bo ta haci bo best, Jehova lo yuda bo pa bo ta un predicadó eficas dje bon nobo. E ora ei lo bo tin goso den bo ministerio.—Pro. 10:22.