Nan A Cumpli cu Nan Palabra!

ANTONIO, kende tabata den su último aña di scol secundario, kier a duna un testimonio informal na su compañeronan di klas. Di manera cu el a sugerí na su yufrou di historia pa mustra e video Testigonan di Jehova Ta Para Firme Contra Atake di Nazi. Aunke e yufrou tabata sképtico, tog el a bai di acuerdo i a bisa cu lo e pasa e video su siguiente dia.

Antonio ta conta: “Na principio, e yufrou tabata wak e video cu un aire di superioridad; pero ora el a realisá cu ta historiadónan prominente tabata nara e historia di Testigonan di Jehova den camponan di concentracion, el a paga bon tinu. Na final el a gradicí mi cu mi a sugerí e video.”

Durante e siguiente les, e yufrou a purba describí e trabou di Bibelforscher, manera Testigonan di Jehova tabata conocí na Alemania e tempu ei; pero el a realisá cu lo ta mihó pa laga Antonio hacié. Antonio a splica e papel dje Testigonan den sociedad i tambe algun di nan doctrinanan. El a concluí bisando: “Ta obvio cu hende no por saca niun beneficio for dje mensahe precioso cu nos ta trece si nan no scucha nos, si nan dal porta cera den nos cara of si nan no lesa nos publicacionnan.”

Tur Antonio su compañeronan di klas a bai di acuerdo cu e pensamentu aki, i e yufrou a proponé un resolucion pa e klas. E promé chens cu nan haña nan lo scucha e Testigonan i aceptá nan publicacionnan. E klas a sigui papia riba e video pa basta ratu. Bo por imaginá Antonio su satisfaccion durante e siguiente dianan ora cu el a mira vários di su compañeronan di scol bin den klas cu publicacionnan di Watchtower i a tende cada un di nan bisa cu un sonrisa: “B’a wak, m’a cumpli cu mi palabra!”