E Impakto di Vidionan Ku Ta Duna Testimonio
1 “Promé ku nos yu hòmber por a kana, e tabata wak e vidio ei. E ta wak e bes tras bes. Ta masha maravioso ku nos tin medionan ku ta inkulká amor pa Yehova den nos yunan!” Ta di kua vidio e mayor kristian aki tabata papia? Esun titulá Noe A Kana ku Dios. Un mama ku no ta Testigu i kende su yu hòmber a wak e vidio Noe na kas di un hende, a manda un donashon di 90 dòler sukursal i a puntra si nos tin mas vidio pa mucha. E vidionan ku Yehova su organisashon ta produsí tin un impakto fuerte riba hóben i bieu.
2 Den Famia: Despues ku un famia Testigu a wak e vidio Testigunan di Yehova Ta Para Firme Kontra Atake Nazi, e mama a konta: “Mi a pensa henter dia riba e manera ku Yehova a kapasitá hende komun i koriente pa nan por a soportá kosnan ekstraordinario! Pensando riba esei a rekordá mi kon relativamente insignifikante mi propio problemanan ta. Nos a wak e vidio aki huntu ku nos yunan i esei a yuda nan mira mas kla e nesesidat di konfia den Yehova. I dor di papia ku nan over dje vidio despues di a wak e huntu, nos a yuda nos yu muhénan pa nan ta mihó prepará pa manehá kualkier preshon i persekushon ku nan por konfrontá.”
3 Na Skol: Komo parti di un presentashon, un Testigu tiner a haña chèns di mustra un porshon dje vidio Para Firme na su klas. Anteriormente, e maestra a bisa ku e no gusta Testigunan. Despues di a wak e vidio, e di: “Esaki a kambia mi punto di bista di Testigunan di Yehova kompletamente. Mi ta primintí ku e siguiente biaha ku nan pasa na mi porta, lo mi skucha nan i kuminsá studia Beibel ku nan!” Ta kiko a kambia e impreshon ku e tabatin di nos? Nos “amor berdadero i fieldat,” el a bisa.
4 Den e Ministerio: Un ruman muhé a topa un señora ku no kier a aseptá literatura, maske e tabatin pregunta tokante nos i nos kreensianan. E ruman a bolbe bèk ku e vidio Testigunan di Yehova—E Organisashon Tras dje Nòmber i a pas’é pa e señora ku su kasá. Tur dos a keda masha impreshoná i a aseptá un studio di Beibel. Komo resultado dje ekselente testimonio ku nan a haña, nan a kuminsá ahustá nan bida na Dios su boluntat.
5 Abo ta hasiendo pleno uso di nos vidionan?