Usa Medionan Visual Instruktivo
1 Yehova a yega di usa vishon i soño pa komuniká informashon importante na su sirbidónan di pasado. Pensa por ehèmpel riba e vishon ku Ezekiel a haña di Yehova su garoshi selestial. (Eze. 1:1-28) Imaginá bo kon Daniel a sintié despues ku el a risibí e soño profétiko ku ta deskribí e marcha di potensianan mundial. (Dan. 7:1-15, 28) Anto kiko di e revelashon elektrisante presentá komo señal ku apòstel Juan a risibí relashoná ku e kosnan ku lo a tuma lugá durante “e dia di Señor”? (Rev. 1:1, 10) Yehova a usa koló bibu i akshon dinámiko pa instruí su profetanan, i esaki a hasi un impreshon permanente riba nan mente.
2 Si nos tambe ke transmití bèrdat bíbliko na otro hende di un manera impaktante i ku nan lo no lubidá fásil, nos por usa nos vidionan pa instruí otronan. Nos vidionan ta trata vários tópiko i ta edifiká konfiansa den Beibel, den Yehova su organisashon i den prinsipionan ku ta hasi nos un mihó kristian. Laga nos konsiderá algun manera ku nos por usa nos vidionan pa instruí otro hende. At’akí algun ehèmpel di vidio ku nos lo por usa.
3 Den Sirbishi: Bo a yega di konta un studiante di Beibel tokante nos hermandat kristian mundial? Lag’é mira e hermandat aki mediante e vidio Henter Nos Asosiashon di Ruman. Bo por fi’é e vidio p’e wak e promé ku e siguiente estudio òf bo por wak e huntu kuné e próksimo bes ku boso tin ku studia. Kaba konsiderá e preguntanan di repaso ku tin den Nos Ministerio di Reino di yüni 2002.
4 Hóbennan, boso por puntra boso maestro ki posibilidat tin pa mustra boso klas e vidionan Testigunan di Yehova Ta Para Firme Kontra Atake Nazi òf Fiel bou di Prueba—Testigunan di Yehova na Union Soviétiko. Ofresé pa bin ku un blachi ku pregunta, i bo ta adaptá e preguntanan ku tin den Nos Ministerio di Reino di yüni 2001 òf di febrüari 2003 pa tene un konsiderashon ku e klas.
5 Ku Famia- i Amigunan: Mayornan, for di ki dia boso yunan a wak e vidio Hóbennan Sa Puntra—Kon Mi Por Haña Berdadero Amigu? pa último biaha? Pakiko boso no ta wak e atrobe durante e siguiente estudio di famia? Den Nos Ministerio di Reino di aprel 2002 tin pregunta pa tene un konsiderashon bibu i franko.
6 Tin amigunan den e kongregashon ku bo kier a invitá na bo kas? Dor di wak huntu ku nan e vidio Respetá Yehova Su Outoridat, boso por tin un anochi edifikante, spesialmente si despues boso konsiderá e lèsnan ku boso a saka afó, usando e preguntanan den Nos Ministerio di Reino di sèptèmber 2004.
7 Na Otro Oportunidat: Den ki otro maneranan bo por usa nos 20 vidionan? Si bo laga un persona ku bo ta bishitá regularmente wak un òf dos di nan, esaki lo por yud’é progresá spiritualmente? Lo bo por ofresé pa laga hende na un kas di kuido òf na un sentro pa hende grandi wak nos vidionan? E vidionan aki lo yuda bo gana rèspèt di bo famia-, bisiña- i kompañeronan di trabou ku no ta Testigu? Nos vidionan ta medionan visual impreshonante, instruktivo i efikas. Usa nan pa instruí otro hende.
[Study Questions]
1. Kon Yehova a usa medionan visual pa instruí su sirbidónan di pasado, i kiko tabata e resultado?
2. Ki medionan visual nos por usa pa siña otro hende e bèrdatnan di Beibel?
3. Kiko nos por usa pa dirigí un studiante di Beibel na e organisashon?
4. Ki hèrmènt pa instruí otro hende un Testigu hóben por usa na skol?
5. Kiko mayornan tin na nan disposishon ku nan por usa durante estudio di famia?
6. Ki areglo bo por hasi pa pasa un ratu edifikante huntu ku amigunan?
7. Na ki oportunidatnan bo ta pensa ku nos por usa nos vidionan?