Usa Vidio pa Siña Bo Studiantenan di Beibel

Medio visual ta kapta un hende su atenshon i ta yud’é komprondé i kòrda loke el a siña. Nos Gran Instruktor, Yehova, a usa medio visual pa siña hende vários lès importante. (Gén 15:5; Yer 18:1-6) Hesus, e Gran Maestro, tambe a usa medio visual. (Mat 18:2-6; 22:19-21) Den e último añanan akí, vidio ta un medio visual ku a duna masha bon resultado. Ora bo ta dirigí un estudio di Beibel, bo ta hasi uso di vidio pa siña bo studiantenan?

Pa yuda nos usa vidio pa siña nos studiantenan di Beibel, nos organisashon a produsí dies vidio ku ta splika e lèsnan di e foyeto Dios Tin Bon Notisia pa Nos! Generalmente, e título di kada vidio ta korespondé ku un di e preguntanan ku ta skirbí ku lèter diki den e foyeto. Den e vershon digital di e foyeto, tin link ku ta indiká bo ki ora pa pasa kada vidio. Ademas, tin otro vidio ku bo por usa huntu ku e publikashonnan di estudio ku nos tin den nos Teaching Toolbox.

Bo ta tratando un tópiko di Beibel ku kisas ta difísil pa bo studiante komprondé? Òf bo studiante ta pasando den un prueba spesífiko? Wak riba jw.org® i JW Broadcasting® si tin vidio ku lo por yuda bo studiante. Kisas abo i bo studiante por wak un di e vidionan ei i trat’é huntu.

Tur luna tin vidio nobo. Segun ku bo ta wak nan, pensa kon bo por usa nan pa siña otro hende.