Un Para Masha Bunita ku Pluma Tur na Wowo

DI E KORESPONSAL DI SPIÈRTA! NA INDIA

KISAS bo a rei for di e título ku nos ta papiando di pòwis. Un kos ta sigur, pòwis machu tin un kola mundialmente famoso.a Pero bo a yega di puntra bo mes ta kiko ta e propósito di e plumanan ekstrabagante ei i si e kriatura aki tin mas kos sobresaliente fuera di su beyesa?

Tin tres sorto di pòwis, i nan ta miembro di e famia di para fazant. Den e artíkulo aki nos lo papia di e pòwis di India, yamá tambe pòwis komun. Su koló ta prinsipalmente blou-bèrdè i e ta midi 200 pa 235 centimeter, inkluso su kola di 150 centimeter. E plumanan di e kola ta bèrdè mesklá ku oro ku manchanan ku parse wowo koló blou i bròns. Mayoria di e plumanan riba e kurpa ta un blou-bèrdè metáliko.

Pòwis ta ofisialmente e para nashonal di India, i sin duda e tin un aparensia mahestuoso. Kisas ta p’esei den algun idioma nan ta usa e ekspreshon “orguyoso manera un pòwis” pa deskribí hende arogante. Sin embargo, e para aki no ta dje antipátiko ei manera su aparensia tal bes ta laga bo pensa. De echo, ta masha fásil pa hasi pòwis mansu. Tin hende ta konsider’é un para sagrado. Pa e motibu aki, kunukeronan den pueblitonan di India tin biaha ta soportá e paranan numa ora nan ta menasá nan kunukunan di maishi.

Nan Tremendo Show

Klaru ku loke ta hasi pòwis famoso ta e tremendo show ku nan ta duna dor di span nan kola manera un wairu impreshonante. Kiko ta e propósito di e show aki? Aparentemente tur esei ta pa impreshoná e hembranan.

Pòwis hembra no ta kai pa kualkier machu, pero unu ku tin yen di pikete si e no por resistí. E pòwis su kola hanchu habrí, kubrí ku wowonan di koló briante, ta kapta tur e hembra su atenshon. E hembranan sa skohe komo nan pareha e machu ku tin e plumanan mas impreshonante.

Pero habrimentu di e kola ta solamente un parti di e show. Promé, e machu ta habri su kola largu manera un wairu i ta lag’é bin dobla dilanti. Kaba e ta kuminsá su baile yen di pikete. Su alanan koló kastaño ta kologá na su banda segun ku e ta sagudí su kurpa i asina ta pone e plumanan saka un zonidu suave. Tambe e ta dal un gritu fuerte ku no ta nada melodioso, pero por lo ménos e hembra ta haña sa ku e machu ta interesá den dje.

De bes en kuando e pòwis hembra lo purba hasi un imitashon suak di e payasadanan di e machu, pero mayoria biaha, e hembra ta duna e impreshon di no ta interesá. Pero tòg, ta e machu ku mas pikete lo hañ’é. Un pòwis machu por ‘gana’ asta 5 hembra i bira tata di te ku 25 puitu den un solo aña.

Bida di Famia di Pòwis

Despues di e temporada di brui, ta tempu pa kambia pluma. Komo promedio, un pòwis machu adulto su kola kompletu ta konsistí di mas ku 200 pluma. Ántes habitante di pueblitonan na India tabata kolekshoná e plumanan pa eksportá nan pa paisnan oksidental. Pero awor ta prohibí pa eksportá e plumanan ya asina ta protehá e paranan. Klaru ku lokalmente sí nan ta usa e plumanan ainda pa traha wairu i otro artíkulonan bunita.

Anochi pòwis ta subi lentamente den palu haltu pa buska un bon lugá di drumi. Mainta nan ta hasi lo kontrario, i ta baha lentamente for di palu. Kisas e kriaturanan aki ta un enkanto pa wowo, pero no spera masha kos sí di nan kantamentu. Nan gritunan kehoso ta kibra e silensio di anochi, te ora ku yega nan ora di baha mainta pa kuminsá buska kuminda.

Pòwis ta kome kasi tur kos. Esei ta inkluí insekto, lagadishi, i tin biaha asta kolebra chikí, i tambe simia, grano, bonchi i raisnan moli di mata di kosecha.

Ounke di aparensia pòwis machu ta parse masha orguyoso, nan ta bon den protehá nan mes. Pòwis ta detektá peliger masha lihé, por ehèmpel un pushi ku ta slùip rònt. E pòwis ta reakshoná dor di kore dor di mondi na gritu pa spièrta di e peliger inminente. Otro machunan ta djòin e. Nan ta kore sorprendentemente lihé, un tras di otro. Sin embargo, e hembranan sí ta nenga di bandoná nan puitunan, asta ora nan ta konfrontá e peliger di mas grandi.

E kola largu di pluma aparentemente no ta stroba pòwis di move lihé, maske e kola ta parse un tiki inkumbiniente ora e para ta lanta vuelo. Pero unabes pòwis ta den laira, nan ta bula na gran velosidat, batiendo nan alanan rápidamente.

Ora e polèchinan tin ocho luna, nan ta kla pa bandoná nan mayornan i kuminsá perkurá pa nan mes. Nan baimentu ta yuda e mama prepará pa e siguiente yunan ku e tin ku kria. Ta ora e machunan hóben tin ocho luna nan kola ta kuminsá krese, pero ta te ora nan tin kuater aña nan ta haña tur nan plumanan di machu. E ora ei nan ta kla pa kuminsá nan propio famia.

Pòwis den Transkurso di Historia

Pòwis bibu a dòrna hardinnan di antiguo Gresia, Roma i India. Bo ta haña pòwis den arte i ophetonan dekorativo di kortenan real di India durante míles di aña. De echo, e Trono di Pòwis tabata ser konsiderá un di e ehèmpelnan mas importante di e rikesanan di India. Dòrná ku kantidat di djamanta, e tabatin segun informe 108 rubí i 116 esmeralda. Tabatin un pòwis di oro riba e kapa di e trono, i ta djei el a haña su nòmber. Ta solamente na okashonnan seremonial importante nan tabata arma e trono ei i sinta riba dje.

Historia bíbliko ta mustra ku pòwis tabata entre e kosnan balioso ku Rei Salomon a importá. Ta interesante pa imaginá pòwis ta kana prònk den su hardinnan real. (1 Reinan 10:22, 23) E paranan aki siguramente ta laga nos sa ku tin un Diseñadó inteligente. Ora pòwis ta baila ku su kola di kolónan impreshonante hanchu habrí, bo no por keda sin atmirá e abilidatnan artístiko di Yehova, e Dios ku “a krea tur kos.”—Revelashon 4:11.

[Nota]

[Plachi na página 16]

No ta tur biaha e baile di e machu ta impreshoná e hembra

[Rekonosementu]

© D. Cavagnaro/Visuals Unlimited

[Plachinan na página 17]

Pòwis hembra ta bon mama

[Rekonosementu]

© 2001 Steven Holt/stockpix.com

[Rekonosementu pa Potrèt na página 15]

Pòwis: Lela Jane Tinstman/Index Stock Photography

[Rekonosementu pa Potrèt na página 16]

John Warden/Index Stock Photography