11 Bon Trahadó

LOKE ESAKI TA NIFIKÁ

Un bon trahadó no ta kore pa trabou. Al kontrario, e gusta traha duru pa perkurá pa su nesesidatnan i pa yuda otro hende. E gusta traha asta si otro hende ta haña ku e trabou no ta dje importante ei.

DIKON ESEI TA IMPORTANTE?

Si nos gusta òf nò, bida ta yen di responsabilidat. Nos ta biba den un mundu ku hopi hende no gusta traha duru. Ke men si nos ta un bon trahadó, nos lo tin bentaha.—Eklesiástes 3:13.

“Mi a siña ku ora bo traha duru, bo ta haña un sintimentu di orguyo i satisfakshon. E sintimentu ei a yuda mi ku awor mi gusta traha. Ora bo tin kustumber di traha duru, bo ta haña un bon reputashon.”—Reyon.

PRINSIPIO DI BEIBEL: “Den tur trabou tin ganashi.”—Proverbionan 14:23.

LOKE BO POR HASI

Si bo ke haña un punto di bista positivo di trabou, sigui e konsehonan ku tin aki bou.

Siña hasi kosnan bon i sinti bo orguyoso di e bon trabou. Sea ku bo ta hasi trabou di kas, hùiswèrk òf traha, dediká bo mes na e trabou ku bo ta hasiendo. I ora bo siña hasi bo trabou bon, buska manera pa hasié mas lihé i mas mihó. Mas mihó bo ta den bo trabou, mas lo bo gust’é.

PRINSIPIO DI BEIBEL: “Bo ta mira un hende ku abilidat den su trabou? E lo para dilanti di reinan; e lo no para dilanti di hende insignifikante.”—Proverbionan 22:29.

Pensa riba otro hende. Den mayoria kaso, bo ta benefisiá otro hende ora bo ta kumpli bon ku bo responsabilidatnan. Por ehèmpel, ora bo ta un bon trahadó i ta hasi trabou di kas, bo ta hasi e karga ménos pisá pa e otro miembronan di bo famia.

PRINSIPIO DI BEIBEL: “Tin mas felisidat den duna ku den risibí.”—Echonan 20:35.

Hasi mas. En bes di hasi solamente loke nan pidi bo, purba di hasi mas. Di e manera ei, abo ta kontrolá bo bida. Ta bèrdat ku lo bo traha mas e ora ei, pero lo ta pasobra abo mes ke i no pasobra nan a obligá bo hasi esei.—Mateo 5:41.

PRINSIPIO DI BEIBEL: “Pa bo akto di bondat no sali fòrsá, sino di bo propio boluntat.”—Filemon 14.

Sea balansá. Un bon trahadó no ta floho pero tampoko adikto na su trabou. E ta sòru pa e ta balansá i ta haña goso den traha duru pero e ta gusta sosegá tambe.

PRINSIPIO DI BEIBEL: “Un man yen di sosiegu ta mihó ku dos moketa yen di trabou i korementu tras di bientu.”—Eklesiástes 4:6.