Kiko Bo Por Hasi pa Gusta Bo Trabou?

MIRA TRABOU FOR DI UN PUNTO DI BISTA POSITIVO

Sea ku bo ta traha mas tantu ku bo mente, ku bo man òf ku un kombinashon di nan dos, bo tin ku rekonosé ku “for di tur esfuerso hende ta saka probecho.” (Proverbionan 14:23, BPK) Ki probecho? Pa kuminsá, trabou ta yuda bo kubri bo nesesidatnan material. Ta bèrdat ku Dios a primintí di perkurá pa hende ku ta ador’é di kurason. (Mateo 6:31, 32) Ma e ta ferwagt ku nos tambe ta hasi nos parti, esta, traha pa gana nos pan di kada dia.—2 Tesalonisensenan 3:10.

Nos por mira trabou anto komo un medio pa logra algu, esta, pa kumpli ku nos responsabilidatnan na un manera digno. Joshua, di 25 aña, a bisa: “No tin nada mas mihó ku traha pa bo por perkurá pa bo mes. Si bo por kubri bo gastunan, bo trabou a logra su meta.”

Ademas, trabou duru ta duna nos rèspèt propio. Nos por bisa asina pasobra no ta fásil pa traha duru. Pero si nos tin disiplina, asta si e trabou ta laf òf difísil, nos por tin e satisfakshon di sa ku nos ta kumpliendo ku nos deber. Asina nos ta vense e tendensia di bula pipa pa trabou. (Proverbionan 26:14) Den e sentido ei, trabou ta duna gran satisfakshon. Aaron, menshoná den e artíkulo anterior, a bisa: “Mi ta sinti mi bon despues di un dia largu di trabou. Aunke mi sa keda morto kansá, i kisas otro hende no a ripará mes kon duru mi a traha, mi sí sa ku mi a logra algu.”

BIRA ÁBIL DEN BO TRABOU

Beibel ta papia bon di hende hòmber ku ta ‘ábil den nan trabou’ i hende muhé ‘ku ta gusta traha ku nan mannan.’ (Proverbionan 22:29; 31:13) Ta klaru ku no ta di un dia pa otro un hende ta bira ábil. I masha poko hende ta gusta hasi un trabou ku nan no ta bon den dje. Kisas pa e motibu ei hopi hende no ta gusta nan trabou; simplemente nan no ta hasi sufisiente esfuerso pa bira ábil den loke nan ta hasi.

Bon mirá, un hende por siña gusta kasi tur tipo di trabou, basta e tin e aktitut korekto. Ku otro palabra, e mester pone su mes pa siña kon pa hasi e trabou bon. William, di 24 aña, a bisa: “Ora bo hasi bo bèst i mira e bon resultado, bo ta sinti bo satisfecho. Ma si bo ta taha palu òf ta bira rònt na trabou, nunka lo bo haña e sensashon ei.”

PENSA KON BO TRABOU TA BENEFISIÁ OTRO HENDE

No kai den e trampa di pensa solamente riba kuantu sèn bo ta gana. Puntra bo mes: ‘Pakiko mi tin ku hasi e trabou akí? Kiko lo sosodé si niun hende no hasi e trabou akí òf no hasié na drechi? Kon mi trabou ta benefisiá otro hende?’

Foral e último pregunta ei ta importante, pasobra ora nos mira kon nos trabou ta benefisiá otro hende, nos ta sinti nos mihó. Hesus a bisa: “Tin mas felisidat den duna ku den risibí.” (Echonan 20:35) Fuera di esnan ku ta benefisiá direktamente di nos esfuersonan, manera kliente i doño di trabou, tin otro hende tambe ku ta benefisiá di nos trabou, manera miembronan di nos famia i esnan den nesesidat.

Nos famia. Ora un kabes di kas ta traha duru pa perkurá pa su famia, e ta yuda nan den por lo ménos dos manera. Di promé, e ta sòru pa nan tin e kosnan básiko di bida manera kuminda, paña i un dak riba nan kabes. Asina e ta kumpli ku e responsabilidat ku Dios a dun’é pa “perkurá pa esnan ku ta pertenesé na dje.” (1 Timoteo 5:8) Di dos, ku su ehèmpel e ta siña nan e importansia di ser un bon trahadó. Shane, menshoná den e artíkulo anterior, a bisa: “Mi tata ta un bon ehèmpel pasobra e tin un bon aktitut pa ku trabou. E ta un hende onesto ku a traha duru henter su bida; mayor parti komo karpinté. El a siña mi e balor di usa mi man pa traha kos ku ta útil pa otro hende.”

Hende den nesesidat. Apòstel Pablo a konsehá e kristiannan pa “traha duru . . . pa [nan] por tin algu di kompartí ku esun ku ta den nesesidat.” (Efesionan 4:28) Sí, ora nos ta traha duru pa perkurá pa nos famia, nos lo ta den e posishon tambe pa yuda esnan ménos afortuná. (Proverbionan 3:27) Pues, mas duru nos traha, mas felis nos lo sinti nos di por kompartí algu ku otro hende.

DUNA ALGU ÈKSTRA

Den Hesus su famoso Sermon Riba Seru, el a bisa: “Si un hende ku tin outoridat obligá bo bai ún kilometer kuné, bai dos kilometer kuné.” (Mateo 5:41) Kon bo por apliká e prinsipio tras di e palabranan ei na bo trabou? En bes di djis hasi lo mínimo, hasi mas di loke nan ta pidi di bo. Pone meta pa bo mes; wak si bo por logra hasi bo trabou mas mihó òf mas lihé posibel, asta den e detayenan di mas chikitu.

Ora bo duna algu èkstra, tin mas chèns ku lo bo gusta bo trabou. Dikon? Pasobra ta abo ta disidí di duna un poko mas. Ta abo mes ta esun ku ke, no pasobra otro hende ta obligá bo hasi esaki. (Filemon 14) Esei ta laga nos kòrda e dicho: “Man di e hende balente lo goberná, ma negligensia ta hiba na trabou fòrsá.” (Proverbionan 12:24) Masha poko hende lo haña nan obligá di traha komo katibu òf hasi trabou fòrsá. Ma un hende ku ta hasi solamente lo mínimo por sinti su mes asina, pasobra semper e tin ku sigui òrdu di otro hende. Pero, e hende ku ta duna algu èkstra ta hasi esei pasobra ta e mes ke.

MANTENÉ TRABOU NA SU DEBIDO LUGÁ

Aunke trabou sigur tin su mérito, kòrda ku bida no ta konsistí di traha so. Ta bèrdat ku Beibel ta animá hende pa ta bon trahadó. (Proverbionan 13:4, BPK) Ma e no ta manda nos bira katibu di trabou sí. Eklesiástes 4:6 ta bisa: “Un man yen di sosiegu ta mihó ku dos moketa yen di trabou i korementu tras di bientu.” Kiko ta e punto? Un hende ku ta traha manera katibu nunka lo benefisiá di e fruta di su esfuersonan si e trabou ta tuma tur su tempu i energia. En realidat, su trabou ta bira manera “korementu tras di bientu.”

Beibel por yuda nos haña un punto di bista balansá di trabou. Aunke e ta urgi nos pa traha, e ta konsehá nos tambe pa “hasi sigur kiko ta e kosnan mas importante.” (Filipensenan 1:10) Kiko ta e kosnan mas importante? Esakinan ta enserá dediká tempu na nos famia i nos amigunan i, mas importante ainda, na nos aktividatnan spiritual manera lesa i meditá riba e Palabra di Dios.

Hende ku ta hiba un bida balansá probablemente ta disfrutá mas di nan trabou. William, menshoná anteriormente, a bisa: “Un di mi eks-doñonan di trabou tabata un hende hopi balansá. E tabata traha duru i pa motibu di e kalidat di su trabou su klientenan tabata papia bon di dje. Pero na fin di dia, e tabata sa kon pa laga su trabou pa e bai kas i dediká tempu na su famia i su religion. I bo sa kiko? E ta un di e hendenan di mas felis ku mi konosé!”