2. Ta Nos Mes Falta Ku Nos Ta Sufri?

Dikon Ta Importante pa Sa e Kontesta?

Si ta nos falta ku nos ta sufri, e ora ei nos mes lo por hasi algu pa nos sufri ménos.

Pensa Riba Esaki

Akaso hende ta kulpabel pa kos malu ku ta pasa? Pensa un ratu riba e siguiente ehèmpelnan.

Abusu.

E Organisashon Mundial di Salú (OMS) ta kalkulá ku 1 di kada 4 adulto a sufri di abusu físiko na sierto momento durante nan infansia i ku 1 di kada 3 hende muhé a bira víktima di abusu físiko òf seksual (òf di tur dos) na dado momento den nan bida.
Morto.

Segun World Health Statistics 2018, ku OMS a publiká, “ta ser kalkulá ku tabatin 477.000 asesinato rònt mundu na 2016.” I mesun aña ei, nan ta pensa ku 180.000 hende a ser matá den guera i otro konflikto.
Problema ku Salú.

Den un artíkulo di e revista National Geographic, e eskritor Fran Smith a bisa: “Mas ku mil mion hende ta huma. I tabako ta kontribuí na e sinku kousanan prinsipal di morto: problema ku kurason, atake selebral, infekshon respiratorio, enfermedat króniko di pulmon ku ta sera i kanser di pulmon.”
Desigualdat Sosial.

Sikólogo Jay Watts a bisa: “Pobresa, desigualdat sosial, rasismo, diskriminashon di hende muhé, hende ku ta haña nan obligá di bai biba un otro kaminda i un kultura kompetitivo ta kos ku por oumentá e chèns ku hende ta haña problema mental.”

PA HAÑA SA MAS

Bai na jw.org i wak e vidio Dikon Dios A Krea Tera?

Loke Beibel Ta Bisa

E hòmber ku nos a deskribí anteriormente ta drumí riba un kama den hospital. Su esposa ta bira su kara ora e dòkter ta duna su esposo mal notisia tokante su salú.

Hende mes ta kousa mayoria di sufrimentu na mundu.

Den hopi kaso, gobièrnu korupto a kousa sufrimentu ku ta hasi bida di e hendenan ku nan mester protehá difísil.

“Hende a ehersé outoridat riba un otro hende pa su daño.”—EKLESIÁSTES 8:9.

Loke hende por hasi pa sufri ménos.

Prinsipio di Beibel por mehorá nos salú i yuda nos pa nos por bai bon ku otro hende.

“Un kurason trankil ta bida pa e kurpa, ma envidia ta putrimentu di wesu.”—PROVERBIONAN 14:30.

“Kita tur tipo di amargura malisioso, rabia, furia, gritamentu i papiamentu di kos ofensivo for di boso, i tambe tur loke ta perhudisial.”—EFESIONAN 4:31.