LOKE BO POR HASI ORA PREIS SUBI

Usa Bo Plaka na un Manera Sabí

Ora e preisnan subi, e ta bira difísil pa nos tur. Pero, no desesperá. Bo por hasi algu pa mehorá bo situashon.

DIKON ESEI TA IMPORTANTE

Si bo no hasi esfuerso pa usa bo plaka na un manera sabí, e por hiba na mas problema finansiero ku por pone bo preokupá i haña strès. Asta si bo no tin hopi sèn, tin vários kos ku bo por hasi pa drecha bo situashon.

LOKE BO POR HASI

No kumpra kos si bo no tin sèn pa pag’é. Si bo hasi esei, lo bo ta mas trankil i lo bo tin sèn si algu inesperá presentá.

Pa yuda bo biba segun bo forsa, bo tin ku traha un budget. Esaki ta un lista di tur bo entradanan i di tur bo gastunan. Despues ku bo traha bo budget, kumpra solamente loke bo mester. Anto hasi bo máksimo esfuerso pa tene bo mes na bo budget. I si bo entrada kambia òf si preis subi, ahustá bo budget. Si bo ta kasá, enbolbé bo kasá den kualke desishon ku bo tin ku tuma.

Purba esaki: Kumpra kos ora bo tin sèn pa hasi esei, en bes di paga ku credit card. Algun hende ta haña ku di e manera akí, nan ta hasi mihó uso di nan sèn i asta ta evitá debe. Ademas, tuma tempu pa lesa e dokumentonan di banko bon ku ta mustra kuantu sèn bo a depositá i kuantu sèn bo a gasta durante e luna. Lo bo tin ménos strès ora bo sa kuantu sèn bo tin.

E por ta difísil pa no gasta demasiado sèn, pero si bo tin un bon plan esei lo por yuda bo. Lo bo ta ménos preokupá tokante plaka.

“Kalkulá e gastunan.”—Lúkas 14:28.

Traha duru pa keda ku bo trabou. Kiko ta algun kos ku bo por hasi pa mantené bo trabou? Ata algun sugerensia: Yega na ora. Tin un punto di bista positivo di bo trabou. Laga otro hende mira ku bo ke yuda i traha duru. Mustra rèspèt. Tene bo mes na regla i purba di mehorá bo abilidatnan.

No gasta sèn na kos innesesario. Puntra bo mes: ‘Mi ta gasta muchu sèn na kos ku mi no tin mester òf asta na kos ku no ta bon pa mi?’ Por ehèmpel, hopi hende ta gasta nan sèn na kos ku no ta bon, manera droga, wega di plaka, humamentu òf bebementu di mas. E kosnan ei por asta pone nan salú bai atras i pèrdè nan trabou.

“Hende ku ta buska pa sa kon nan por atkerí sabiduria . . . ta felis. Ta mihó bo buska sabiduria ku bo buska plata.”—Proverbionan 3:13, 14.

Spar pa un emergensia. Si bo por, pone un poko sèn un banda pa gastu inesperá òf pa un emergensia. E sèn ku bo a apartá por duna bo un grado di siguridat si diripiente abo òf un miembro di bo famia bira malu, pèrdè trabou òf algu inesperá sosodé.

“Tur hende por haña nan un ora pa otro ku un situashon difísil òf ku suseso inesperá.”—Eklesiástes 9:11.

Algun Sugerensia pa Spar Sèn

Kushiná mas tantu na kas.

Si bo tin kustumber di kumpra kuminda afó i kos di bebe òf si bo ta bai restorant regularmente, bo ta gasta hopi mas tantu sèn. Ta tuma tempu i esfuerso pa prepará kuminda na kas, pero bo por spar hopi sèn. Ademas, lo bo ta mas sigur ku bo kuminda ta mas saludabel.

Kumpra kos na un manera sabí.

Traha un lista di kompra i tene bo mes na dje. Purba di no kumpra kos ku bo no a plania.
Si ta posibel, kumpra kos na kantidat grandi ora tin deskuento. Pero, si bo tin komestibel ku ta daña lihé, trata di warda nan bon pa no dispidí kuminda.
Wak si bo por kumpra kos mas barata, pero di bon kalidat.
Evitá di kumpra kos ku bo no a plania i paga tinu kon bo ta gasta bo sèn. Si bo por kumpra kos online kaminda bo ta biba, kisas ta algu ku bo por purba di hasi?
Wak ora tin deskuento. Kompará preis, inkluso ora ta trata di servisio manera koriente, verwarming òf awa.

Pensa promé ku bo kumpra kos nobo.

Kompania ku ta traha telefòn i otro produktonan kada bes ta saka modèl nobo pa nan hasi mas ganashi. Pues, puntra bo mes: ‘Si mi kumpra e modèl di mas nobo, esei realmente lo benefisiá mi? Mi mester kumpra un telefòn nobo awor? I si mi kumpra un telefòn mas nobo, di bèrdat mi mester di e último modelo?’

Drecha bo aparatonan i kumpra kos segunda mano.

Kuida bo aparatonan manera frishidèr i stof, i si nan daña, purba di drecha nan. Ademas, kisas bo por spar sèn si bo kumpra kos segunda mano.

Siña planta.

Bo por siña planta bo propio fruta i bèrdura? Di e manera ei, lo bo gasta ménos sèn na kuminda i lo bo tin algu pa troka, pa bende òf pa parti ku otro hende.

“Plan di hende diligente ta duna bon resultado.”—Proverbionan 21:5.