LOKE BO POR HASI ORA PREIS SUBI

Aseptá Ku Bo No Tin Tur Kos Bou di Kontrol

Ora e preisnan subi tiki-tiki, kasi nos no ta nota esei, spesialmente si e salarionan tambe subi. Sinembargo, ora e preisnan subi lihé i e salarionan keda meskos, nos por bira anshá i haña strès, foral si nos tin ku perkurá pa nos famia.

Nos no por evitá ku preis ta subi. Pero si nos aseptá ku nos no tin tur kos bou di kontrol, esei lo ta bon pa nos mes.

DIKON ESEI TA IMPORTANTE

Si nos aseptá ku nos no tin kontrol riba e preisnan ku ta subi, lo ta mas fásil pa . . .

keda trankil. Ora nos ta trankil, nos ta pensa mas kla i ta tuma mihó desishon.
evitá mal kustumber. Por ehèmpel, lo no ta sabí pa keda sin paga nos resibunan òf pa gasta sèn na kos ku nos no tin mester.
no diskutí ku famia tokante plaka.
wak kiko nos por hasi pa kumpra e kosnan ku nos tin mester. Esei kisas ta nifiká ku nos mester gasta ménos sèn i disidí loke realmente ta nesesario.

LOKE BO POR HASI

Sea dispuesto pa hasi kambio. Ora e preisnan subi lihé, lo ta bon pa purba di baha gastu. Algun hende ke gasta mas tantu sèn di loke nan tin, i esei ta hasi nan situashon mas i mas difísil! Na final, nan ta perhudiká nan mes. Sin duda, lo bo ke kuida bo famia i sòru pa e kosnan ku nan tin mester. Pero no lubidá ku bo famia mester di bo amor, di bo tempu i di bo atenshon mas ku kualke otro kos.

“Kua di boso lo por rèk su bida niun krenchi si e preokupá?”—Lúkas 12:25, Beibel na papiamentu koriente.

“Nunka preokupá pa e dia di mañan, pasobra e dia di mañan lo tin su mes preokupashonnan. Kada dia tin su mes problemanan.”—Mateo 6:34.

Ora nos purba di mantené un bida luhoso ta manera nos ta landa kontra di e koriente di un riu ku ta kore rápidamente