LOKE BO POR HASI ORA PREIS SUBI

Keda Kontentu ku Loke Bo Tin

Ora un hende ta kontentu ku loke e tin, e ta sinti su mes bon. I segun ku su sirkunstansia ta kambia, e ta hasi e ahustenan nesesario pa sigui biba segun su forsa.

DIKON ESEI TA IMPORTANTE

Jessica Koehler, un sikólogo, a bisa ku hende ku ta satisfecho ku loke nan tin hopi biaha ta mas positivo. El a bisa tambe ku nan ta envidiá otro hende ménos. P’esei, hopi biaha, hende ku ta satisfecho ta mas felis i tin ménos strès. De echo, algun di e personanan di mas felis ta hende ku no tin hopi kos material. Esei ta asina pasobra nan ta enfoká riba e kosnan di mas importante den bida, manera e goso di pasa tempu ku famia i amigu.

‘Si nos tin kuminda i paña, nos lo keda kontentu ku e kosnan akí.’—1 Timoteo 6:8.

LOKE BO POR HASI

No kompará loke bo tin ku loke otro hende tin. Si bo kompará e poko kosnan ku bo tin ku e kosnan karu ku otro hende tin, esei por hasi bo infelis òf asta pone ku bo por bira yalurs. Kisas bo ta pensa ku hende ku tin hopi kos karu ta riku. Pero e realidat ta ku algun hende ku tin hopi kos, tin hopi debe. Nicole, kende ta biba na Senegal, a bisa: “Mi no tin mester di hopi kos pa mi ta felis. Si mi ta kontentu ku loke mi tin, mi por sinti mi felis asta ora otro hende tin mas kos material ku mi.”

Purba esaki: No wak propaganda òf kos riba ret sosial ku ta mustra kuantu sèn òf kuantu kos karu otro hende tin.

“Asta si un hende tin hopi kos material, su bida no ta dependé di loke e tin.”—Lúkas 12:15.

Sea gradisidu. Hende ku ta gradisidu hopi biaha ta satisfecho i no ta pensa ni kere ku nan mester òf meresé mas kos. Roberton, kende ta biba na Haiti, a bisa: “Mi ta tuma tempu pa pensa riba tur e kosnan bon ku otro hende a hasi pa mi i pa mi famia. Despues, mi ta gradisí nan pa esei. Ademas, mi ta siña mi yu hòmber di ocho aña pa e yama danki pa tur loke e haña.”

Purba esaki: Skirbi loke bo ta gradisidu p’e tur dia. Por ehèmpel, bo por ta gradisidu ku bo tin un bon salú òf ku bo famia ta uní. Tambe, bo por ta gradisidu ku bo tin bon amigu òf asta ku bo a wak un bunita bahada di solo.

“Hende ku kurason alegre semper ta kontentu.”—Proverbionan 15:15.

Tin biaha, ta difísil pa nos keda kontentu ku loke nos tin. Pero ta bale la pena hasi e esfuerso ei! Si nos ta satisfecho, nos lo ta felis, i esei ta algu ku plaka no por kumpra.