Sea Generoso

DIKON ESEI TA IMPORTANTE

Si nos ta generoso, asta den kos chikitu, nos lo ta felis i nos lo sinti nos mes bon. De echo, algun dòkter ta bisa ku ora nos tin e kustumber di duna, esei ta bon pa nos salú físiko i salú mental. Por ehèmpel, e por baha ansiedat, strès, preshon haltu i asta e por yuda ora nos tin doló. Ademas, e por yuda nos drumi mihó.

Ora nos yuda otro hende, sea ku sèn òf ku otro kos ku nan tin mester, lo ta mas fásil pa nos aseptá yudansa ora nos mes tin mester di esei. Howard, ku ta biba na Inglatera, a bisa: “Ami ku mi kasá ta buska manera pa nos ta generoso i yuda otro hende. Hasiendo esei nos no ta sinti nos malu ora nos mester di yudansa.” Naturalmente, hende ku realmente ta generoso no ta duna pa nan por haña algu bèk. Pero loke nan ta haña ta berdadero amigu ku ta dispuesto pa yuda ora nan ta den nesesidat.

LOKE BO POR HASI

Kompartí loke bo tin. Asta ora bo no tin hopi kos bo por duna otro hende algu, por ehèmpel un kuminda simpel. Duncan i su famia, ku ta biba na Uganda, ta hopi pober. Sinembargo, nan ta generoso. Duncan a bisa: “Riba djadumingu, ami ku mi kasá ta invitá un hende bini serka nos pa un kuminda simpel. Nos ta gusta pasa tempu ku otro hende.”

Di mes, ora bo duna un hende algu, bo mester ta rasonabel. Lo bo no ke duna asina tantu ku bo famia ta keda sin e kosnan ku nan mester.—Yòb 17:5.

Purba esaki: Invitá un persona pa un kuminda simpel òf pa bebe algu. Si bo tin algun kos ku bo no ta usa mas, lo bo por duna bo famianan òf bo bisiñanan ku sí por hasi uso di nan?

Duna na otro manera. Algun di e mihó regalonan no ta kosta nada. Por ehèmpel, nos por duna di nos tempu i yuda otro hende hasiendo algu práktiko pa nan. Asta un palabra bondadoso por ta un regalo! Pues, bisa otro hende kuantu bo ta apresiá nan òf kuantu bo ta stima nan.

Purba esaki: Yuda otro hende ku trabou di kas, hasi reparashon na nan kas òf hasi kompra. Skirbi un karchi òf manda un mensahe pa un amigu, asta si ta djis pa bisa ku bo a kòrda riba dje.

Ora bo ta generoso, lo bo ta mas felis.