Esposa di Lòt A Wak Atras

LÒT i su famia tabata biba huntu ku Abraham na e tera di Kánaan. Un dia Abraham a bisa Lòt: ‘No tin sufisiente tera pa tur nos bestianan. Por fabor, laga nos separá. Si bo bai den un direkshon, ami ta bai den un otro.’

Lòt a tira bista riba e tera. El a mira un parti masha bunita di e tera ku tabatin awa i hopi bon yerba pa su bestianan. Esei tabata e distrito di Hordan. P’esei Lòt i su famia i bestianan a bai biba ei. Finalmente nan a establesé nan mes na e stat Sodoma.

Hende di Sodoma tabata masha mal hende. Esei a molestia Lòt, pasobra Lòt tabata un bon hende. Esei a molestia Dios tambe. Finalmente, Dios a manda dos angel pa spièrta Lòt, bisando ku Dios ta bai destruí Sodoma i e stat bisiña Gomora debí na nan maldat.

E angelnan a bisa Lòt: ‘Pura! Tuma bo esposa i bo dos yu muhénan i bai for di aki!’ Lòt i su famia a tarda un poko pa bai, i p’esei e angelnan a kohe nan na man i a hiba nan pafó di e stat. Anto un angel a bisa: ‘Kore pa boso bida! No wak atras. Kore te na e serunan, pa boso no wòrdu matá.’

Lòt i su dos yu muhénan a obedesé i a kore bai for di Sodoma. Nan no a para ni un momentu, i nan no a wak atras. Pero e esposa di Lòt a desobedesé. Despues ku nan a yega na un distansia for di Sodoma, el a para i a wak atras. E ora ei e esposa di Lòt a bira un pilar di salu. Bo ta mir’é riba e plachi?

Nos por siña un bon lès for di esei. Esei ta mustra nos ku Dios ta salba hende ku ta obedes’é, pero hende ku no ta obedes’é ta pèrdè nan bida.