Kòrda Riba e Esposa di Lòt

Lòt tabata biba na Kánan. E tabata biba huntu ku su tio Ábraham. Ku tempu, Lòt i Ábraham tabatin asina tantu bestia ku nan no por a keda biba huntu na mesun lugá. Ábraham a bisa Lòt: ‘Nos tur no por biba akinan mas. Bo por skohe kualke parti di e pais kaminda bo ke bai, i ami lo bai un otro kaminda.’ Ábraham no tabata egoista.

Lòt a mira un área di e pais ku tabata masha bunita mes. E área ei tabatin hopi awa i hopi yerba bèrdè. Lòt a skohe e área ei, i el a muda bai biba einan ku su famia. E área ku el a skohe tabata keda pegá ku un stat ku tabata yama Sódoma.

E hendenan di Sódoma i e hendenan di Gomora tabata mal hende. Gomora tabata un stat den bisindario di Sódoma. E habitantenan di Sódoma i e habitantenan di Gomora tabata asina malbado ku Yehova Dios a disidí di destruí e statnan ei. Pero Dios tabata ke salba Lòt i Lòt su famia. P’esei, Dios a manda dos angel pa bisa nan: “Hasi lihé! Sali for di e stat akí, pasobra Yehova ta bai destruí e stat!”

Pero Lòt no a sali mesora. El a tarda pa sali. E angelnan a kohe Lòt i e kasá di Lòt i nan dos yu muhénan na nan man i hiba nan pafó di e stat. E ora ei, e angelnan a bisa nan: ‘Kore! Hui pa boso skapa boso bida! No wak patras. Si boso wak patras, boso lo muri!’

Ora nan a yega e stat ku tabata yama Zoar, Yehova a manda kandela i suafel riba Sódoma i Gomora. E dos statnan ei a keda kompletamente destruí. Lòt su kasá no a obedesé Yehova. El a wak patras, i el a bira un pilá di salu. Lòt i su dos yu muhénan lo mester a keda masha tristu ku e no a obedesé Yehova. Lòt i su yu muhénan sí a obedesé Yehova. P’esei, nan a keda na bida. Nan lo mester a keda masha kontentu ku nan sí a sigui e instrukshonnan di Yehova.