Isaak A Haña un Bon Esposa

BO SA ken e hende muhé riba e plachi ta? Su nòmber ta Rebeka. I e hòmber ku e ta bai topa kuné ta Isaak. Rebeka ta bai bira su esposa. Kon esei a sosodé?

Wèl, Abraham tata di Isaak tabata ke haña un bon esposa pa su yu. E no tabata ke pa Isaak kasa ku muhé di Kánaan, pasobra e hendenan ei tabata adorá dios falsu. P’esei Abraham a yama su kriá i a bis’é: ‘Mi ke pa bo bai bèk kaminda mi famia ta biba na Haran i haña un esposa pa mi yu Isaak.’

Umbes e kriá di Abraham a tuma dies kamel i a hasi e biahe largu. Ora el a yega serka di e lugá kaminda e famia di Abraham tabata biba, el a para na un pos di awa. Tabata atardi lat, ora ku e hende muhénan di e stat tabata bini pa saka awa na e pos. P’esei e kriá di Abraham a hasi orashon na Yehova: ‘Laga e mucha muhé ku saka awa pa mi i mi kamelnan ta esun ku bo a skohe pa bira esposa di Isaak.’

Pronto Rebeka a yega pa saka awa. Ora e kriá a pidié pa dun’é awa pa bebe, Rebeka a dun’é. Anto el a bai i a saka sufisiente awa pa tur e kamelnan yen di set. Esei tabata trabou duru, pasobra kamel ta bebe masha hopi awa.

Ora Rebeka a kaba di hasi esei, e kriá di Abraham a puntr’é e nòmber di su tata. Tambe el a puntra si e por a pasa anochi serka nan. Rebeka a bisa: ‘Mi tata ta Bètuel, i tin lugá pa bo keda serka nos.’ E kriá di Abraham tabata sa ku Bètuel tabata yu di Nakor, ruman hòmber di Abraham. P’esei el a hinka rudia i a gradisí Yehova ku el a gui’é serka e famia di Abraham.

E anochi ei e kriá di Abraham a bisa Bètuel i Laban ruman hòmber di Rebeka pakiko el a bini. Nan tur dos a bai di akuerdo pa Rebeka bai kuné i kasa ku Isaak. Kiko Rebeka a bisa ora nan a puntr’é? El a bisa, ‘Sí,’ e kier a bai. P’esei, su manisé mes nan a subi kamel i a kuminsá e biahe largu pa regresá Kánaan.

Ora nan a yega, tabata atardi. Rebeka a mira un hòmber ta kana den kunuku. Esei tabata Isaak. El a keda kontentu pa mira Rebeka. Sara, mama di Isaak, a muri solamente tres aña promé, i Isaak ainda tabata tristu. Pero awor Isaak a kuminsá stima Rebeka masha hopi, i el a bira kontentu atrobe.