Rebeka Kier A Hasi Yehova Kontentu

Rebeka tabata un mucha muhé ku a stima Yehova. Su kasá tabata yama Isak. E tambe a stima Yehova. Kon Rebeka ku Isak a konosé otro? Anto, kon Rebeka a mustra ku e kier a hasi Yehova kontentu? Ban lesa mas di nan dos.

Isak tabata yu hòmber di Abraham ku Sara. Nan tabata biba na un pais ku yama Kanan. E hendenan ku tabata biba ei no tabata sirbi Yehova. Pero Abraham tabata ke pa su yu kasa ku un mucha muhé ku sí ta sirbi Yehova. P’esei el a manda un di su kriánan, kisas Eliezer, pa buska un kasá pa Isak. El a pidié bai na un lugá ku yama Haran, kaminda Abraham tabatin famia ta biba.

Eliezer a bai huntu ku mas kriá di Abraham. Nan mester a kana, kana, bai masha leu. Nan a bai ku dies kamel kargá ku kuminda i regalo. Kon Eliezer por a sa kua mucha muhé e tabatin ku skohe pa Isak? Ora Eliezer i e otro kriánan a yega Haran, nan a para na un pos pasobra Eliezer tabata sa ku un ora pa otro hende lo bini pa saka awa. El a hasi orashon na Yehova i a bisa: ‘Si mi pidi un mucha muhé duna mi awa, anto e duna ami i mi kamelnan tambe awa, e ora ei lo mi sa ku ta e mucha muhé ei bo a skohe.’

Nèt e ora ei, un mucha muhé a yega na e pos. Tabata Rebeka! Beibel ta bisa ku e tabata masha bunita. Ora Eliezer a pidié un tiki awa, Rebeka a bisa: ‘Sigur no! Mi ta bai saka awa pa abo i pa bo kamelnan tambe.’ Bo sa, ora kamel tin set, nan ta bebe masha masha hopi awa mes. Esei ke men ku Rebeka mester a keda kore bai bin hopi biaha pa saka awa for di e pos. Wak e plachi. Bo ta mira kon duru e ta traha?— Eliezer lo a keda boka habrí ora el a mira kon Yehova a kontestá su orashon.

Eliezer a duna Rebeka hopi regalo bunita. Rebeka a invitá Eliezer i e otro kriánan na kas di su tata. Eliezer a splika Rebeka su famia pakiko Abraham a mand’é serka nan i kon Yehova a kontestá su orashon. Rebeka su famia tabata kontentu pa e kasa ku Isak.

Pero, bo ta kere ku Rebeka mes kier a kasa ku Isak?— Rebeka tabata sa ku ta Yehova a manda Eliezer. P’esei, ora ku Rebeka su famia a puntr’é si e kier a bai Kanan i kasa ku Isak, el a bisa: ‘Sí, mi ke bai.’ El a bai mesora ku Eliezer. Ora nan a yega Kanan, el a kasa ku Isak.

Pasobra Rebeka a hasi loke Yehova tabata ke, Yehova a hasi kos bon p’e. Hopi aña despues, Hesus a nase di e famia di Rebeka! Si abo ta manera Rebeka i bo hasi Yehova kontentu, e lo hasi kos bon pa abo tambe.