Un Mal Rei A Goberná Egipto

E HÒMBERNAN aki ta fòrsa hende traha. Mira e hòmber ku ta suta un trahadó ku zuip! E trahadónan ta di e famia di Jakòb, i ta ser yamá israelita. I e hòmbernan ku ta fòrsa nan traha ta egipsio. E israelitanan a bira esklabo di e egipsionan. Kon esei a sosodé?

Pa hopi aña e famia grandi di Jakòb a biba trankil na Egipto. Hosé, ku tabata e hòmber di mas importante na Egipto despues di Fárao e rei, a kuida nan. Pero ku tempu Hosé a muri. I un Fárao nobo, ku no tabata gusta israelita, a bira rei di Egipto.

P’esei e mal Fárao aki a hasi e israelitanan esklabo. I el a pone hòmbernan malu i kruel pa manda riba nan. Nan a fòrsa e israelitanan traha masha duru den konstrukshon di stat pa Fárao. Pero tòg e israelitanan a sigui oumentá na kantidat. Despues di un tempu e egipsionan a haña miedu ku e israelitanan lo por bira muchu hopi i muchu fuerte.

Bo sa kiko Fárao a hasi? El a papia ku e parteranan ku tabata yuda mamanan israelita haña yu, i a bisa nan: ‘Boso tin ku mata tur yu hòmber ku nase.’ Pero e parteranan tabata bon hende, i nan no a mata e yu hòmbernan.

P’esei Fárao a duna e mandamentu aki na henter su pueblo: ‘Tuma e yu hòmbernan di e israelitanan i mata nan. Laga e yu muhénan so biba.’ Esei no tabata un kos teribel pa eksigí? Laga nos mira kon un yu hòmber a skapa.